चेल्सीमा टचेल युग

फिचर

चेल्सीमा टचेल युग

नेपाल लाइभ शुक्रबार, माघ १६, २०७७ ०८:३५

काठमाडौं- प्रशिक्षक थोमस टचेलको चेल्सी युग बराबरीबाट सुरु भएको छ। प्रिमियर लिग अन्तर्गत वुल्भ्ससँगको खेलमा चेल्सीले गोलरहित बराबरी खेलेको हो। गएको मंगलबार फ्रान्क लापमार्डलाई बर्खास्त गरेको चेल्सीले नयाँ प्रशिक्षकमा रुपमा टचेललाई ल्याएको हो। जहाँ चेल्सीमा उनको पहिलो खेल सोचेअनुरुप हुन सकेन।

सन् २०१९ को अगस्टमा प्रशिक्षकका रुपमा फ्रान्क लामपार्डले पहिलो खेल लेस्टरसँग १-१ को बराबरी खेलाएका थिए। जतिबेला चेल्सी समर्थक ‘वेलकम होम सुपर फ्रान्क’ लेखिएको ब्यानरसहित स्वागतमा थिए। अहिले कोरानाका कारण समर्थकलाई उपस्थित हुन बन्देज भएकाले टचेललाई समर्थकले मैदानबाटै केही भन्न पाएनन्।

जर्मन क्लब बोरुसिया डोर्टमुन्ड र फ्रेन्च क्लब पिएसजी सम्हालिसकेका प्रशिक्षक टचेलका लागि पहिलो खेल हतारमै आइपर्‍यो। चेल्सीको पोस्टमा एउटा पनि प्रहार गर्न नसकेको वुल्भ्ससँग रोकिनु उनको आगामी योजनासँग जोड्न नमिले पनि अवस्था सुखद भने रहेन। ७९ प्रतिशत समय बलमा नियन्त्रण बनाएर पोस्टका ५ प्रहार चेल्सीका लागि गोलमा परिणत हुन सकेन।

‘मैले धेरै कमजोरीहरु देखिनँ, म टिमको बलियो पक्षमा नै विशेष ध्यान दिनेछु। अनुभवि पुराना खेलाडी र युवा खेलाडीबीचको साझेदारी राम्रो रह्यो। खेलहरु जित्नका लागि आवश्यक उत्साह र उर्जा दिलाउने मेरो प्रयास हुनेछ। हामी यस्तो टिम बन्नेछौँ जसविरुद्ध खेल्न सबैलाई डर होस्’ खेलपछि टचेलले भनेका छन्।

वुल्भ्सविरुद्धको खेलमा टचेलको विशेष लगाव अनुभवि खेलाडीमा नै देखियो। गएको आइतबार एफए कपको खेलमा ह्याट्रिक गरेका टामी अब्राहमलाई बेन्चमा राखेर टचेलले खेल सुरु गरे। अब्राहम खेलको ७७औँ मिनेटमा ओलिभर जिरउडको स्थानमा मैदान पसेका थिए। म्यासन मोउन्ट र रीस जेम्स पनि बेन्चमा नै थिए। मोउन्ट ८३औँ मिनेटमा हकिम जियाचको स्थानमा खेले भने जेम्स बेन्चमै सीमित रहे।

पछिल्लो पाँच खेलमा दुई हार, दुई बराबरी र एक जित खेलेको चेल्सी २० खेलमा ३० अंकसहित अंक तालिकामा आठौँ स्थानमा छ। जहाँ शीर्ष स्थानमा रहेको म्यानचेस्टर सिटीको १९ खेलमा ४१ अंक र दोस्रोमा रहेको म्यानचेस्टर युनाइटेडको २० खेलमा ४० अंक रहेको छ। शीर्ष चारभित्र रहने गरी बढ्न नै सिटीका लागि अब ठूलो सघर्ष देखिँदैछ।

गएको सिजन मुस्किल अवस्थाबाट बढिरहँदा लामपार्डले चेल्सी चौथो स्थानसम्म लग्न सकेका थिए। ३८ खेलमा ५४ गोल खाएको अवस्था राम्रो नदेखिए पनि शीर्ष भित्र रहनु सुखद नै भयो। लाम्पार्डको प्रशिक्षणमा चेल्सीले ५७ खेलमा ७७ गोल खाएको थियो। टचेल आउनुअघि यो सिजन चेल्सीले १९ खेलमा नै २३ गोल खाएको थियो। यसैले वुल्भ्ससँगको बराबरीको नतिजा चेल्सीका लागि सुखद नभए पनि गोल नखानु भने राम्रो देखियो।

युरोपियन फुटबलमा टचेलको शैली बुझ्न उति सहज छैन। खेलमाथिको आफ्नो नियन्त्रण र व्यवहारकुशल दुरदर्शिता उनमा देखिन्छ। पिएसजीमा स्पोर्टिङ डाइरेक्टर लियोनार्दोसँगको विवादका कारण उनको समय कठीन भएको थियो। लगातार घरेलु लिग उपाधिसहित गएको सिजन पिएसजीलाई पहिलोपटक च्याम्पियन्स लिग फाइनलसम्म पुर्‍याएका टचेल डिसेम्बरमा बर्खास्तसम्म परे।

अहिले नयाँ सिजनको बीचमा चेल्सी प्रशिक्षक बन्ने प्रस्ताव प्रिमियर लिगमा आफ्नो कला देखाउन नै टचेलले स्वीकार गरेका हुन्। जसरी योर्गेन क्लोप र पेप गार्डिओलाले इंग्ल्याण्डमा आफ्नो छबि देखाइरहेका छन्, उस्तै चाहन्छन् टचेल पनि।

जर्मन क्लब मेन्जबाट सन् २००९ मा प्रशिक्षकका रुपमा सिनियर फुटबलमा अघि सरेका टचेल २०१५ मा बोरुसिया डोर्टमुन्डको प्रशिक्षक बने। २०१८ देखि २०२० सम्म टचेल पिएसजीमा रहे। पिएसजीमा स्टार खेलाडीअनुसारको प्रदर्शन देखाउन नसकेको आरोप लागे पनि टचेलले मैदानमा जे गरे त्यो बलियो अवस्था नै थियो। मैदानबाहिरको साथ नपाएकैले उनी निस्कनुपर्ने अवस्थामा पुगेका हुन्। यसैले चेल्सीमा मैदान र मैदानबाहिर दुवैमा हुने साथले उनले केही नौलो गर्ने आश समर्थकमा छ।

चेल्सीमा आवश्यक देखिएका खेलाडीको समूह बर्खास्तमा परेका लामपार्डले जुटाइसकेका छन्। गएको खेलाडी किनबेचको समयमा चेल्सीले २२२ मिलियन पाउण्ड खर्च गरेको थियो। यसैले सबै खेलाडीको खेल समय मिलाएर जितमा बढ्न टचेलका लागि मुस्किल नै छ। चेल्सीका केही खेलाडीले खेल समय नपाएको र प्रशिक्षकसँग खुलेर कुराकानीको वातावरण नरहेको भन्दै दुःखेसो पहिले पनि गरेका थिए।

टचेल यस्ता प्रशिक्षक हुन् जो मैदानको अवस्थामा मात्र नजर राख्दैनन्। उनले यसअघि सम्हालेका क्लबको अनुभवका आधारमा हेर्दा उनी खेलाडीको खानपिनको तालिकादेखि सुत्ने समयसम्म विचार गर्छन्। खेलाडीले पाइरहेका सुविधामा पनि उनी ध्यान दिन्छन्। तर यही स्वभावले उनी क्लबमा ब्यवस्थापनमा रहेकाबाट सत्रुतापूर्ण व्यवहार भोग्न बाध्य भइरहेका हुन्छन्।

अहिले टचेलको आगमनले चेल्सीमा रहेका ‘अट्याकिङ प्लेयर’ टिमो वेर्नर र काए हाभरेट्ज जस्ता खेलाडीको प्रदर्शन निखारिने विश्वासमा समर्थक देखिन्छन्। पिएसजीमा नै विश्वास कमाएर चेल्सी आएका डिफेन्डर थियागो सिल्भामाथि पनि टचेल आएपछिको विश्वास बढेको छ। टचेलले बोरुसिया डोर्टमुन्डको प्रशिक्षक रहँदा क्रिष्टियन पुलिसिकसँग पनि काम गरिसकेका छन्।

टचेल पिएसजीमा रहँदा १२७ खेलमा ९५ जित, १३ बराबरी र १९ हार भएको थियो। जसमा पिएसजीले ३३७ गोल गरेको थियो भने १०३ गोल खाएको थियो। पिएसजीमा उनको ७४.८ को जित प्रतिशत उत्कृष्ट नतिजा नै हो। जहाँ साढे दुई वर्षको समयमा उनले विभिन्न ६ उपाधि जिते। जसमा दुई लिग वान, एक कोपा डि फ्रान्स, एक कोपा डि ला लिग, दुई ट्रफी देस च्याम्पियन्स उपाधि रहेका छन्।

टचेल बोरुसिया डोर्टमुन्डमा रहँदा उनले १०७ खेलमा ६७ जित, २३ बराबरी र १७ हार भएको थियो। जसमा २५१ गोल गर्दा ११५ गोल खाएको थियो। बोरुसियामा उनको जित प्रतिशत ६२.६ रहेको थियो। जर्मनीमा रहँदा बायर्न म्युनिकको दबदबा तोड्न नसके पनि उनको समय राम्रो नै मान्नुपर्छ। बोरुसियामा उनले २०१७ मा डिएफबी पोकलको उपाधि जिताएका थिए।

पछिल्ला दुई क्लबको तथ्यांक हेरेर प्रिमियर लिगमा उनको समय अनुमान गर्न नमिल्ने भए पनि उनी मैदानमा नतिजा दिन सक्ने प्रशिक्षक हुन् भन्ने देखिएको छ। यसैले चेल्सीको नयाँ टचेल युगमा केही फरक देखिने नै छ।

(यो सामग्री बिबिसी, गार्जियन र गोलमा आधारित रहेर तयार पारिएको हो।)

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।