प्रधानमन्त्री कप : आधा घट्यो पुरस्कार रकम

क्रिकेट

सराेज तामाङ मंगलबार, माघ १३, २०७७ १८:४३

काठमाडौं- प्रधानमन्त्री कप राष्ट्रिय पुरुष एकदिवसीय क्रिकेट प्रतियोगिताको विजेताले १० लाख मात्रै पुरस्कार पाउने भएको छ। यसअघि २० लाख दिँइदै आएको पुरस्कार नेपाल क्रिकेट संघ (क्यान)ले १० लाख घटाएको हो।

कप विजेताले २० लाख रुपैयाँ पुरस्कार पाउँदा नेपाल क्रिकेट संघ (क्यान) अन्तर्राष्ट्रिय क्रिकेट परिषद् (आइसिसी)बाट निलम्बित थियो। क्यान नहुँदा राष्ट्रिय खेलकुद परिषद् (राखेप)ले अभिभावकत्व ग्रहण गर्दै २०१७ मा प्रधानमन्त्री कप क्रिकेटको आयोजना गरेको थियो।

विजेताले २० लाख पाउने प्रतियोगितामा उपविजेताले १० लाख पाउँदै आएका थिए। सन् २०१९ को संस्करणसम्म पनि यही पुरस्कारले यथावत् थियो।

आइसिसीबाट फुकुवा भएपछि क्यानले पहिलो पटक आयोजना गरेको प्रधानमन्त्री कपको पुरस्कारमा आधा बनाएको छ। मंगलबार क्यानको बोर्ड बैठकले विजेताले १० लाख र उपविजेताले ५ लाख पुरस्कार पाउने निर्णय गरेको हो।

त्यस्तै, क्यानले सेमिफाइनल पुग्ने टिमले ५० हजार पाउनेछन्। त्यस्तै, प्लेयर अफ द सिरिज घोषित हुने खेलाडीले ५० हजार पाउँदा बेस्ट ब्याट्सम्यान, बलरले जनही २५ हजार पाउने क्यानको निर्णय छ। त्यसैगरी प्रत्येक खेलका प्लेयर अफ द म्याच हुने खेलाडीले पाँच हजार पाउने क्यानले जानकारी दिएको छ।

२०१७ मा भएको पहिलो संस्करणको उपाधी भने नेपाल पुलिस क्लब र त्रिभुवन आर्मी क्लबले संयुक्त रुपमा जितेको थियो। फाइनल खेलमा वर्षा बाधक बनेपछि राखेपले संयुक्तरुपमा विजेताको घोषणा गरेको थियो। विजेताले पाउने २० र उपविजेताले पाउने १० लाख गरी कुल ३० लाखको आधा–आधा गरी पुलिस र आर्मीले १५–१५ लाख पाएका थिए। भलै, उपाधि जितेको लामो समयपछि रकम विजेता टिमले पाएका थिए।

२०१८ को प्रधानमन्त्री कपको दोस्रोको उपाधि एपिएफले जित्दा उपविजेता भने आर्मी क्लब भएको थियो। एपिएफले फाइनलमा आर्मीलाई ६ विकेटले पराजित गर्दै २० लाख पुरस्कार पाएको थियो। उपविजेतामा चित्त बुझाएको आर्मीले १० लाख हात पारेको थियो। त्यसैगरी २०१९ को तेस्रो संस्करणमा भने पुलिसले उपाधि जित्यो। चार विकेटले जित्दै विजेता पुलिसले २० लाख पाउँदा फेरि उपविजेता बनेको आर्मीले १० लाख पाएको थियो।

झनै पुरस्कार राशी बढ्दै जानुपर्नेमा क्यानले भने घटाएको छ। विश्व खेल जगतकै नियम हो। पुरस्कार बढाउँदै लाने। विश्वकपदेखि अन्तर्राष्ट्रिय प्रतियोगिताहरुमा पनि यस्तै अभ्यास छ। फ्रेन्चाइज क्रिकेट लिगहरुमा त झनै प्रत्येक वर्ष पुरस्कार बढाउँदै प्रतियोगिता गर्ने चलन छ। यसले खेलाडीको मनोबल पनि बढ्ने गर्छ। प्रधानमन्त्री कपकै पुरस्कार राशी २० लाख बनाउँदा नेपालमा भएका फ्रेन्चाइज लिगहरुले पनि बढाएको थियो। यसले खेलाडीलाई झनै ऊर्जा थपिएको थियो।

तर क्यानको ढिलो गरी घोषणा गरेको पुरस्कार राशीले कति पनि खेलाडी उत्साहित हुने छैनन्। बरु आधा नै घटाएको पुरस्कार राशीले खेलाडीलाई निराश भने पैदा गर्ने निश्चित छ। चौथो संस्करणको प्रधानमन्त्री कपको सेमिफाइनल समिकरण पूरा भइसकेको छ। पहिलो सेमिफाइनलमा अब एपिएफले नेपाल पुलिस क्लबसँग बुधबार प्रतिस्पर्धा गर्दा दोस्रो सेमिफाइनलमा बागमती प्रदेश र आर्मीबीच बिहीबार फाइनल प्रवेशका लागि प्रतिस्पर्धा हुनेछ।

त्यस्तै, क्यानले गरेको निर्णय अनुसार कतार स्पोर्ट्स डे को अवसरमा कतार क्रिकेट एसोसिएसनले बाइल्याट्रल टि–२० आई क्रिकेट प्रतियोगितामा नेपाली राष्ट्रिय टिमले सहभागिता जनाउने भएको छ। आगामी फेब्रुअरी १ तारिखबाट राष्ट्रिय क्रिकेट टिमको बन्द प्रशिक्षण गर्ने पनि क्यानले निर्णय गरेको छ।