फिचर

मूलपानीमा पाँचौँ दिन : कमल, आसिफ र वाटमोर

काठमाडौं- सशस्त्र प्रहरी बलको एपीएफ क्लबसँग ६ विकेटले पराजित हुँदै गण्डकी प्रदेश प्रधानमन्त्री कप राष्ट्रिय पुरुष एकदिवसीय क्रिकेट प्रतियोगिताबाट बाहिरिएको छ। मूलपानी मैदानमा भएको पाँचौँ खेलमा गण्डकी प्रदेशको अन्तिम अवसर, कमलको बलिङ, आसिफको ब्याटिङ र प्रशिक्षक डेभ वाटमोरको पिच निरीक्षण विशेष रह्यो।

एपीएफका लागि कमल ऐरीले १० ओभर बलिङ गर्दै ११ रन मात्र खर्चेर ४ विकेट लिए। १.१० को इकोनोमीमा रहेको उनको बलिङ गण्डकीका लागि मूलपानीको बिहानी पिचमा कठीन देखियो। उनै कमल ‘प्लेयर अफ दि म्याच’ पनि भए। ब्याटिङमा एपिएफका आसिफ शेखले उम्दा खेल देखाए। ५६ बल खेलेका उनले ६ छक्का, ५ चौकासहित ७८ रन बनाए।

पहिलो ओभरमा नै सुवास खकुरेल र रित गौतम शून्यमा आउट भएको अवस्थामा आसिफको ब्याटिङ आक्रामक मात्र होइन, सम्हालिएको पनि थियो। उनले बल बुझेर खेल्ने प्रयास गरिरहेका थिए। ३४ बलमा १८ रन बनाएर सुमितले उनलाई साथ दिए। आसिफ जितका लागि एक रन आवश्यक हुँदा विशाल पौडेलको बलमा एलबिडब्ल्यू आउट भए। १०७ रनको सामान्य लक्ष्य एपिएफले १७.३ ओभरमा ४ विकेटको क्षतिमा पूरा गर्‍यो।

आसिफको खेलको तारिफ गर्दै एपिएफका कप्तान शरद भेषावकर भन्छन्, ‘उसको प्रतिभा एकदम भरपुर छ। पहिलो प्रतियोगिता खेल्दादेखि नै उसले सम्भावना देखाएको हो। कहिँ न कहिँ उही खेलको निरन्तरताको कमी थियो तर, अहिलेको प्रतियोगितामा धेरै राम्रो भइरहेको छ। टिमको आश पनि राम्रो गरोस् भन्ने नै छ।’

प्रतियोगितामा राम्रो सुरुवात पाएको भन्दै त्यसलाई निरन्तरता दिने आशमा आसिफ पनि देखिन्छन्। ‘राम्रो भइरहेको छ, नकआउट खेलमा पनि यस्तै गर्न सकियोस् भन्ने छ। आज पनि रिस्क भए पनि आफ्नो सटहरु खेल्न रोक्दिन भन्ने सोचेर गएको थिएँ, त्यस्तै नै भयो।’

दुई दिनको क्यापले प्रतियोगिता
पहिले ब्याटिङ गरेको गण्डकीले ४६ ओभरमा सबै विकेटको क्षतिमा १०६ रन बनाएको थियो। गण्डकीका लागि समिर कँडेलले ११४ बलमा ३६ रन, विष्णु पाण्डेले ४८ बलमा १५ रन, दिनेश बुढामगरले २४ बलमा १२ रन, दिपेश खत्रीले ३८ बलमा १५ रन बनाए। ४६ ओभर खेले पनि गण्डकीले त्यहीअनुसार रन जोड्न भने सकेन।

गण्डकी प्रदेशका प्रशिक्षक रिजन प्रजु मूलपानीको पिच बिहानको समयमा ब्याटिङका लागि कठीन नै देखिएको बताउँछन्। ‘पिचको कन्डिसन राम्रो थिएन। विकेट गिलो भएर बिहानको समयमा अलि गाह्रो नै थियो। ४६ ओभर टिकेर खेले पनि त्योअनुसार रन बनाउन भने सकेनौँ’ प्रशिक्षक प्रजुले भने।

प्रधानमन्त्री कपमा यसपटकको यात्रा टुंगिएको भए पनि समग्रमा आफूहरुको आगमन सकारात्मक नै देखिएको उनले बताए। ‘युवा खेलाडीले अनुभव बटुल्ने अवसर पाए। अहिलेको खेलमा अनुभवको कमी देखिने ठाउँहरु पनि रह्यो। अर्जुन, समिर, विशाल, विपीन जस्ता खेलाडीहरुले गण्डकीमा क्रिकेटको भविष्य राम्रो देखाएका पनि छन्’ उनले भने।

विभागीय टिमबाहिर प्रतियोगिताको तयारीमा हुने सधैँको समस्या यसपटक गण्डकी टिमका लागि पनि दोहोरियो। प्रशिक्षक प्रजुले टिम छनोटको समयपछि जम्मा दुई दिनको क्याम्प बसेर खेल्ने आएकाले मुस्किल भएको बताए। ‘जिल्लाहरुबाट भएको छनोटपछि हामीले समग्र क्याम्प गर्न पाएको दुई दिन मात्र हो, प्रदेशको टिममा यस्तै नै छ। बजेटको सधैँ नै अभाव नै हुन्छ’ उनले भने।

प्रतियोगितामा गण्डकीले तीन खेलमा हार ब्यहोर्दा एक खेलमा जित निकालेको छ। आफ्नो पहिलो खेलमा आर्मीसँग ९८ रनले हारेको गण्डकीले दोस्रो खेलमा प्रदेश नम्बर १ लाई दुई विकेटले पराजित गरेको थियो। त्यसपछि कर्णालीसँग पाँच विकेट र एपिएफसँग ६ विकेटले पराजित हुँदै गण्डकी प्रतियोगिताबाटै बाहिरिएको हो।

मूलपानीमा छैन सहज
एपिएफका कप्तान शरद भेषावकर गण्डकीविरुद्धको खेलमा टस जित्नु आफूहरुको लागि राम्रो भएको बताउँछन्। ‘बिहानको समय पिच भिजेको थियो, खेल्न गाह्रो नै थियो। टस जित्नु राम्रो भयो। उनीहरुलाई थोरै योगफलमा राख्न सक्यौँ। कमल, किशोर र अभिनाशले राम्रो बलिङ गरे’ भेषावकरले भने।

मूलपानी मैदान उचाइमा भएकाले हावा लाग्ने, चिसो हुने हुँदा कीर्तिपुर भन्दा फरक हुने कप्तान भेषावकरको अनुभव छ। ‘मैदानको साइज केही सानो होला तर धेरै नै फरक त छैन। बिहानको समयमा एक घन्टा त खेल्न गाह्रो छ यहाँ। आउटफिल्ड पनि अलिकति मेहनत गरेर राम्रो बनाउन सकिन्थ्यो कि जस्तो लाग्छ, अलिकति सम्याउने हो भने राम्रो हुन्छ’ उनले भने।

मूलपानी मैदानको अवस्था कठीन नै रहेको आसिफ पनि बताउँछन्। ‘कीर्तिपुर र यता फरक नै छ। कीर्तिपुरको पिच अलि फास्ट छ यहाँको भन्दा, यहाँ बल रोकिएर आउँछ। बल ब्याटमा आइरहेको हुँदैन, स्पीन धेरै भइदिन्छ। त्यसैले कीर्तिपुरमा खेल्ने सट यहाँ खेल्न मिल्दैन, मूलपानीमा बल रोकिएर घुम्छ भन्ने बुझेर नै खेल्नुपर्ने हुन्छ’ आसिफले भने।

आफूहरुले मैदानको अवस्था बुझेर नै गण्डकीविरुद्धको खेलमा टस जितेर पहिले फिल्डिङ गरेको भेषावकरको भनाइ छ। गण्डकी टिममा पनि राम्रा खेलाडी रहेको भन्दै भेषावकर भन्छन्, ‘युवा खेलाडीहरु राम्रा थिए, विशेष गरी अर्जुन, बिशाल, समिर जस्ता भाइहरुले राम्रो खेल्नुभयो। खेलाडी आइरहनुभएको छ भन्ने देखिन्छ, नयाँ प्रतिभा देख्दा खुसी लाग्छ।’

वाटमोरले हेरे पिच
बिहीबार मूलपानी मैदानमा खेलका दौरान कमल र आसिफ चम्किए। खेलपछि केन्द्रमा थिए, राष्ट्रिय क्रिकेट टिमका नयाँ प्रशिक्षक डेभ वाटमोर। खेल हेर्ने र मैदानको पनि अवलोकन गर्ने गरी मूलपानीमा वाटमोर पुग्दा खेल सक्किसकेको थियो। यसैले उनी पिच र मैदान हेरेर फर्किए।

त्रिवि क्रिकेट मैदान र मूलपानी मैदानमा प्रधानमन्त्री कपको खेल चलिरहँदा बिहीबार बिहान एल्लो प्यागोडा होटलमा प्रशिक्षक वाटमोरसँग पत्रकार सम्मेलनसहित परिचयात्मक कार्यक्रम राख्यो। कार्यक्रमसँग सम्बन्धित सबै व्यक्ति क्रिकेट मैदानमा हुँदा मैदानबाहिर होटलमा किन कार्यक्रम गर्नुपर्‍यो क्यान नै जानोस्।

जे होस् नयाँ प्रशिक्षक होटलको कार्यक्रममा मात्र सीमित भएनन्, खेल भइरहेको दुवै मैदान पुगे। प्रशिक्षकसँगै थिए क्यानका सचिव अशोकनाथ प्याकुरेलसहित अन्य कर्मचारी। मूलपानी मैदानमा वाटमोरले पिच निरीक्षण गरेपछि क्युरेटर अजय पाण्डेसँग पनि कुराकानी गरे। मैदानको उचाइका कारण घामको प्रकाश सिधा पर्ने हुँदा अप्ठ्यारो हुने बताए।

‘एसियाको लागि उहाँ सफल प्रशिक्षक मानिनुहुन्छ। एसियन टिमहरु धेरै हेरिसक्नुभएको छ। नतिजाका हिसाबले पनि उहाँको काम राम्रो छ, त्यसैले आश छ, हाम्रो टिममा पनि केही न केही सकारात्मक परिवर्तन हुन्छ होला’ नयाँ प्रशिक्षक डेभ वाटमोरको आगमनपछिको अवस्थाबारे शरदले भने।

विश्व क्रिकेटमा सफल मानिएका प्रशिक्षक डेभ वाटमोरले आफ्नो अनुभव नेपाली क्रिकेटको विकासमा लगाउने बताएका छन्। एकदिवसीय क्रिकेटमा नेपालको वरियता सुधार गर्न आफ्नो विशेष ध्यान रहने बताएका वाटमोरले मूलपानी मैदानको बारेमा धेरै खुलेर बोलेनन्। मैदानको अवस्था कस्तो लाग्यो भन्ने प्रश्नमा उनले भने- ‘सबै हेरेँ, ठीकै छ।’

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।