फुटबलमा फर्किएको लय

फिचर

फुटबलमा फर्किएको लय

सराेज तामाङ बुधबार, माघ ७, २०७७ १९:०९

काठमाडौं- करिब एक वर्षपछि खेलकुदका गतिविधि फेरि चलायमान बन्न थालेका छन्। बुधबार दशरथ रंगशालामा राष्ट्रिय महिला लिग फुटबल सुरु भएसँगै कोरोनाले थिलोथिलो बनेको नेपाली फुटबल लयमा फर्कने विश्वास गरिएको छ।

२०७२ वैशाख १२ गते नेपालीका लागि एक अप्रिय प्राकृतिक विपत्ति परेको दिन। त्यही दिन दशरथ रंगशालामा एएफसी यु-१४ गर्ल्स च्याम्पियनसिपको फाइनलमा नेपाल र बंगलादेशबीचको खेल तय भएको थियो। तर खेलाडी मैदानमा प्रवेश गर्दैनगर्दा विनाशकारी भूकम्प गयो। फाइनल खेल रोकियो। त्यो बेला नेपाली यु–१४ गर्ल्स टिमकी कप्तान थिइन्, पूजा राना।

५ वर्षपछि उनै पूजाले बुधबार रंगशालामा पहिलो पटक फुटबल खेलिन्। नेपाल पुलिसकी पूजाले आर्मीविरुद्ध उत्कृष्ट प्रदर्शन गर्दै वुमेन्स अफ दि म्याच समेत घोषित भइन्।

राष्ट्रिय महिला लिगमा नेपाल पुलिस क्लबले त्रिभुवन आर्मी फुटबल क्लबलाई गोलरहित बराबरीमा रोक्न सफल भयो।

खेलको सुरुवाती अवधिमा उत्कृष्ट प्रदर्शन गर्दै राम्रा अवसर निकालेको आर्मीले गोल गर्न भने सकेन। आर्मीका फरवार्ड गोल गर्न चुकेको मुख्य प्रशिक्षक राजु तामाङ स्वीकार्छन्।

‘धेरैपछि खेल भयो। सुरुमा राम्रा अवसर निकालेपनि गोल गर्न सकिएन। फरवार्डले राम्रो फिनिसिङ गर्न चुके,' मुख्य प्रशिक्षक राजु तामाङ भन्छन्।

पुलिसले पनि राम्रो अवसर उपयोग गर्न सकेन। खेलको २७औं मिनेटमा सुनकला राईका स्थानमा मैदान छिरेकी रेखा पौडेलले आर्मीकी डिफेन्डरलाई व्यस्त बनाउने प्रयास गरिन्। रेखा मैदानमा छिरेसँगै पुलिसको फरवार्ड लाइनमा केही सुधार भयो।

पहिलो हाफमा निरुले प्रहार गरेको बल आर्मीको पोल नजिकैबाट बाहिरिँदा अग्रता बनाउने मौका गुमेको थियो। ६५औं मिनेटमा रन्जिता गुरुङको क्रस पासमा रेखाले गोल गर्ने राम्रो अवसर गुमाउँदा पुलिसले अग्रता बनाउन सकेन।

खेलको ७२औं मिनेटमा इन्दिरा राईले हानेको बल पुलिसकी गोलकिपर सपना राईले बचाएपछि आर्मीले अग्रता बनाउने अवसर चुक्यो।

पुलिसका मुख्य प्रशिक्षक सञ्जीव जोशी भन्छन्, ‘५०-५० प्रतिशत अवसर थियो। दुवै टिमले अवसर पाएका थियौं। 'जसले गोल गर्‍यो, उसैले खेल जित्यो' स्थितिमा थियो। तर दुवै टिमबाट गोल भएन।’

खेलको अन्तिम समयमा आर्मीले करिब २५ यार्ड टाढा 'फ्री-किक' पाएको थियो। इन्दिरा राईले प्रहार गरेको बल पुलिसकी गोलकिपर सपना राईले बचाएपछि खेल बराबरीमा सकिएको थियो।

तयारीको कमी
गत वर्ष चैतबाट नेपाली खेलाडी लामो समयसम्म अभ्यासविहीन बने। विश्वभर फैलिएको कोरोना भाइरसका कारण यो अवधिमा खेलाडीको लय गुम्यो। फिट्नेसमा समस्या आयो।

अखिल नेपाल फुटबल संघ (एन्फा)ले सरकारबाट स्वीकृति लिँदै राष्ट्रिय महिला लिग आयोजना गर्‍यो। तर खेलाडीहरूले राम्रोसँग तयारी गर्न पाएनन्।

विभागीय टिमहरुले नै करिब डेढ महिनाको अभ्यासपछि राष्ट्रिय महिला लिग खेलेका छन्। कोरोना भाइरसकै कारण लामो समय तयारी गर्न नपाएको क्लबहरुको दाबी छ।

पहिलो पटक प्रशिक्षकको भूमिकामा देखिएका राजु तामाङ भन्छन्, ‘कोरोना भाइरसका कारण राम्रो अभ्यास पनि गर्न सकिएन। करिब ४५ दिनको तयारीले प्रतियोगिता खेलेका हौं।’

सन् २००५ देखि २०१३ सम्म राष्ट्रिय फुटबल टिमबाट खेलेका राजु तामाङ अहिले फरक भूमिकामा देखिएका छन्। घरेलु प्रतियोगितामा आर्मीबाट फुटबल खेल्दै आएका तामाङ पहिलो पटक आर्मीको महिला फुटबल टिममा प्रशिक्षकको भूमिकामा देखिएका हुन्। तर उनकै प्रशिक्षणमा आर्मीले पहिलो खेलमा नै अंक बाँड्न पुग्यो।

‘हाम्रो लागि यो महत्वपूर्ण खेल थियो। जित्दै तीन अंक बटुल्ने अवसर त थियो। तर पुलिस नराम्रो टिम भने थिएन। त्यसैले बराबरी खेल्दै अंक बाँड्दा पनि हामीले सन्तुष्ट नै छौं,’ प्रशिक्षक तामाङ थप्छन्, ‘शारीरिक रूपमा पहिले बलियो हुन्थ्यो। यो पटक भने टेक्निकल रूपमा हामी बलियो भएका छौं।’

यता, पुलिसका प्रशिक्षक जोशी पनि राजुको भनाइमा सहमत छन्। धेरै तयारी गर्ने अवसर कोरोनाको कारण नमिलेको उनको बुझाई छ।

‘त्यति धेरै फिटनेसमा समस्या नदेखिएपनि केही असर भने खेलाडीमा परेको छ। हामीले डेढ महिनाको तयारीले खेलेका हौं,' उनले भने।

११ महिना खेलकुद गतिविधि ठप्प हुँदा यसको प्रत्यक्ष मार खेल र खेलाडी परे। महिला खेलाडीलाई त झनै आफ्नो आर्थिक समस्या सुल्झाउन समस्या भयो भने पूरानै लयमा फर्किने डर पनि थियो। तर राष्ट्रिय महिला लिग सुरु भएसँगै नेपाली फुटबल फर्किएको छ।

फागुन ७ गतेसम्म सञ्चालन हुने राष्ट्रिय महिला लिग डबल राउन्ड रोबिनमा हुनेछ। प्रतियोगितामा कुल ४२ खेल हुनेछ। प्रतियोगितामा पुलिस, आर्मीसँगै एपिएफ क्लब, उदयरपुरको चौदन्डीगढी नगरपालिका, मोरङको विराटनगर महानगरपालिका, स्याङ्जाको वालिङ नगरपालिका र रौतहटको चन्द्रपुर नगरपालिका रहेका छन्।