काठमाडौं- नेमारका लागि फुटबल जीवनमा सम्झनलायक क्षणमध्ये हो, २०१६-१७ को च्याम्पियन्स लिगमा बार्सिलोनाले पिएसजीलाई ६-१ ले हराएको खेल। अन्तिम १६ को पहिलो लेगमा ४-० ले पछि परेको बार्सिलोनाले समग्रमा ६-५ ले खेल जित्दै च्याम्पियन्स लिगकै उत्कृष्ट ‘कमब्याक’ देखाएको थियो।
बार्सिलोनाको जितका त्यसबेलाका हिरो नेमार अहिले पुनः बार्सिलोनाविरुद्ध नै च्याम्पियन्स लिग अन्तिम १६ मा उही पिएसजीबाट खेल्दैछन्। गएको सोमबार यो सिजन च्याम्पियन्स लिग अन्तिम १६ को खेल तालिका सार्वजनिक भएसँगै फुटबल समर्थकको नजरमा पुनः त्यही खेल परिरहेको छ।
खेल तालिका सार्वजनिक हुनुभन्दा केही दिन अघि मात्र नेमारले आफ्नो इच्छा पुनः लियोनल मेस्सीसँगै खेल्ने रहेको बताएका थिए। ‘म अझै मेस्सीसँग खेल्न चाहन्छु। उनीसँगै मैदानमा हुनु मेरो ठूलो इच्छा हो। आश छ आउने वर्ष हामी सँगै खेल्नेछौँ’ नेमारले भनेका थिए। नेमारको एउटै मैदानमा हुने इच्छा त यसै वर्ष पूरा हुँदैछ तर मेस्सीको विपक्षी हुनु उनको चाहना होइन।
नेमार २०१७ मा बार्सिलोना छाडेर पिएसजी गएका थिए। त्यो पनि विश्व कीर्तिमानी मूल्य २२२ मिलियन युरोमा। तर उनको सुरुवाती वर्ष पिएसजीमा खुसीसाथ बित्न सकेन। उनी गएको अर्को सिजनदेखि नै बार्सिलोना फर्कने प्रयासमा लागे। तर पिएसजीको चाहना विपरीत त्यो सहज भएन। नजिक पुगेका प्रयासहरु पनि अन्तिम समयमा असफल भए। यतिसम्म कि नेमार अपुग केही रकम आफै खर्चेर समेत बार्सिलोना फर्कन तयार भएका थिए।
बार्सिलोना फर्किएर मेस्सीसँग खेल्ने नेमारको चाहना जति छ, उस्तै रह्यो नेमारलाई बार्सिलोना फर्काउने मेस्सीको चाहना पनि। बार्सिलोना ब्यवस्थापनसँग पनि उनले त्यसबारे कुराकानी गरेका खबर आइरहेका थिए। तर मेस्सीको चाहना अनुरुप नेमार बार्सिलोना फर्काउन ठूलो रकम नै बाधक बनिरह्यो।
यस्तोमा गएको सिजनको अन्त्यमा मेस्सीले नै बार्सिलोना छाड्ने चाहना व्यक्त गरे। सिजनको अन्त्यमा क्लब छाड्न पाउने आफ्नो सम्झौता देखाउँदै बाहिरिने मेस्सीको इच्छा पूरा हुन भने पाएन। ७०० मिलियनको रिलिज क्लजबिना उनलाई छाडेर जान नदिने तत्कालीन अध्यक्ष जोसेप मारिया बर्टामेउको ढिपिले मेस्सी रोकिए। आफ्नो प्रिय क्लबसँग कानुनी लडाइँमा नजाने मेस्सीले स्पष्ट बताए।
अबको सिजन सकिँदा मेस्सीले क्लब छाड्छन् या नयाँ ब्यवस्थापन आएपछि पुनः बार्सिलोनामा नै रोकिन्छन् भन्ने अनुमान व्यापक छ। यस्तोमा यसअघि उनलाई लैजाने प्रयासमा लागेको म्यानचेस्टर सिटीसँगै नेमारले भनेजस्तै पिएसजीमा नै मेस्सी जान्छन् भन्ने तर्क पनि सुनिँदै आइएको छ। जे होस्, मेस्सी र नेमार एउटै टिममा रहने सम्भावना भन्दा पहिले अब उनीहरु एकअर्काविरुद्ध देखिने भने पक्का भएको छ।
यसैले च्याम्पियन्स लिगको तालिका सार्वजनिक भएपछि समाजिक सञ्जालमा मेस्सीसँगको तस्बिर राख्दै नेमारले लेखेका छन्- ‘छिट्टै भेट्ने छौँ साथी।’
२०१३ देखि २०१७ सम्म मेस्सीसँगै बार्सिलोनामा रहँदा नेमारले दुई ला लिगा, एक च्याम्पियन्स लिग र तीन कोपा डेल रेको उपाधि जितेका थिए। तर ती सबै उपाधिहरु भन्दा विशेष रह्यो च्याम्पियन्स लिगमा पिएसजीविरुद्धको उत्कृष्ट ‘कमब्याक’। जसलाई अहिलेसम्म ‘ला रेमानटाडा’ भनेर समर्थकहरु सम्झिइरहन्छन्।
पिएसजी र बार्सिलोना च्याम्पियन्स लिग नकआउट चरणमा भेटिएको त्यो तेस्रो पटक थियो। त्यसअघि २०१२-१३ को सिजनमा क्वाटरफाइनलमा भेटिँदा पहिलो लेग २-२ को बराबरी र दोस्रो लेग १-१ को बराबरीमा सकिएको थियो, अवे गोलका आधारमा बार्सिलोना अघि बढ्यो।
२०१४-१५ को च्याम्पियन्स लिगमा पनि बार्सिलोना र पिएसजी क्वाटरफाइनलमा नै भेटिएका थिए। जहाँ पहिलो लेगको खेल बार्सिलोनाले ३-१ जित्यो। दोस्रो लेग २-० ले जित्दै बार्सिलोना अगाडि बढेको थियो। बार्सिलोनाले पछिल्लो पटक च्याम्पियन्स लिग जितेको त्यो सिजन सेमिफाइनलमा बायर्न म्युनिक र फाइनलमा युभेन्टसलाई हराएको थियो।
यस्तो इतिहास हेरेर २०१६-१७ को च्याम्पियन्स लिगमा अन्तिम १६ मा भेट हुँदा धेरैले जितको अनुमान बार्सिलोनातिर नै लगाइरहेका थिए। तर समूह ए बाट उपविजेता बनेर अघि बढेको पिएसजीले समूह सी को विजेताको रुपमा अघि बढेको बार्सिलोनालाई पहिलो लेगमा नसोचेको हार चखायो।
पेरिसमा भएको पहिलो लेगको खेलमा १८औँ मिनेटमा नै गोल गरेर डि मारियाले पिएसजीलाई अग्रता दिलाए। खेलको ४०औँ मिनेटमा ड्राक्सलर, ५५औँ मिनेटमा डि मारिया र ७२औँ मिनेटमा काभानीले गोल गर्दै बार्सिलोनालाई ४-० ले हराए। ५७ प्रतिशत समय बलमा नियन्त्रण बनाएर पनि बार्सिलोनाले गोलमा कमजोरी देखाएको थियो।
दोस्रो लेगको खेल क्याम्प नाउमा हुनुअघि बार्सिलोनाको पक्षमा समर्थकहरुको विश्वास निकै कमजोर भइसकेको थियो। दुई टिमबीच खेल हुनुअघि बार्सिलोनाले लिगमा सेल्टा भिगोलाई ५-० ले हराएको थियो भने पिएसजीले लिगमा नान्सीलाई १-० ले हराएर आएको थियो।
खेलको तेस्रो मिनेटमा नै लुइस स्वारेजको गोलमा बार्सिलोनाले अग्रता बनायो। ४०औँ मिनेटमा इनिएस्टालाई रोक्न खोज्दा लेभिनको आत्मघाती गोलमा बार्सिलोनाले अग्रता दोब्बर बनायो। ५०औँ मिनेटमा थोमसले नेमारलाई फोउल गर्दा बार्सिलोनाले पेनाल्टी पायो। मेस्सीले गोल गरे। ६२औँ मिनेटमा काभानीको गोलमा पिएसजीले खेलमा फर्कने संकेत देखायो।
त्यतिञ्जेल बार्सिलोनाको खेलमा मजा लिइरहेका समर्थकमा जितको विश्वास आइसकेको थिएन। तर ८८औँ मिनेटमा नेमारले फ्रि किकमार्फत गरेको गोलले जितको विश्वास पलाएको थियो। समग्रमा खेल ४-५ को स्थितिमा पुग्यो। बार्सिलोनाका लागि अझै दुई गोल आवश्यक थियो। ९० मिनेटपछिको अतिरिक्त समयमा पहिलो मिनेटमै नेमारले पेनाल्टीमार्फत गोल गरे। थप समयको पनि अन्तिम मिनेटमा नेमारकै पासमा सर्जी रोबर्टोले गोल गर्दै बार्सिलोनालाई जित दिलाए।
एउटा अपत्यारिलो जितका साक्षी ९६ हजार २ सय ९० समर्थक भए। रंगशाला खुसीले उचालियो। टेलिभिजनमा प्रत्यक्ष खेल हेरिरहेका लाखौँ फुटबल समर्थक पनि अवाक भए। च्याम्पियन्स लिगमा नै बिर्सन नसकिने ‘कमब्याक’ देखियो। जसमा मैदानमा मेस्सी, स्वारेज र नेमारको साझेदारीले स्याबासी पायो।
अहिले उही पिएसजीको जर्सीमा बार्सिलोनाविरुद्ध नेमार देखिँदै छन्। त्यसमा पनि उनका प्रिय खेलाडी मेस्सीको विरुद्धमा। यो सिजन च्याम्पियन्स लिग अन्तिम १६ को पहिलो लेगको खेल बार्सिलोनाको मैदानमा फेब्रुअरी १७ मा दोस्रो लेग पेरिसमा मार्च ११ मा हुँदैछ।
बार्सिलोनामा अहिले मैदानमा मात्रै होइन मैदानबाहिरको समस्या पनि ठूलो छ। विशेष गरी आर्थिक अभावको। खेलाडीलाई पटक पटक तलब कम गर्न पहल गरिरहेको बार्सिलोनाले नेमारलाई बेचेपछि उनको स्थानमा धेरै प्रयास गरिसकेको छ। १०५ मिलियन युरोमा उसमान डेम्बेले, १६० मिलियन युरोमा फिलिप कोउटिन्हो र १२० मिलियन युरोमा एन्टोनी ग्रिजम्यान कसैको पनि मैदानको प्रदर्शन सोचेअनुरुप हुन सकेको छैन।
तलब जोगाउनकै लागि प्रतिस्थापन गर्ने खेलाडीबिना लुइस स्वारेजलाई सित्तैमा एथ्लेटिको मड्रिड पठाउनु बार्सिलोनाका लागि अप्ठ्यारो निर्णय बनिरहेको छ। च्याम्पियन्स लिगमा युभेन्टस, रोमा र बायर्न म्युनिकसँगको लज्जास्पद अवस्थाले बार्सिलोनामा मैदानको स्थिति पनि नियन्त्रणमा आउन सकेको देखिँदैन।
२०१७ पछाडिको यो समय मेस्सी, नेमार, बार्सिलोना र पिएसजीमा धेरै कुरा फेरिइसक्यो। मैदानमा सम्हालिने संघर्षमा रहेको बार्सिलोना र गएको सिजन च्याम्पियन्स लिग फाइनल खेल्नुका साथै लगातार तीन लिग उपाधि जितेको पिएसजीमा अहिले धेरैको विश्वास पिएसजीमाथि छ। पहिले बार्सिलोनामाथि भएजस्तै।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751886908.jpg)
-1752043710.jpg)
-1752245592.jpg)
-1749826086.png)
