काठमाडौं- नेपाल क्रिकेट संघ (क्यान) लाई मुख्य प्रशिक्षक नियुक्त गर्न सकस परिरहेको छ। प्रशिक्षकका लागि गत भदौमा पहिलो पटक खुला दरखास्त आह्वान गरेको क्यानले चार महिनामा पनि प्रशिक्षकको नियुक्ति टुंग्याउन सकेको छैन।
नेपाली क्रिकेट टिमको मुख्य प्रशिक्षक को बन्ला? नयाँ रणनीति के हुनेछ? टिम कसरी अगाडि बढ्ला भन्ने अनुमान र अपेक्षा बढिरहँदा अन्योल पनि उसैगरी बढिरहेको छ।
मुख्य प्रशिक्षकबाट २०७६ माघमा उमेश पटवालले राजीनामा दिएर छोड्दाको जस्तो टिमको कमजोर अवस्था कसरी सुधार हुने हो भन्ने चिन्ता पनि उस्तै छ। सधैँको समस्या देखिने ओपनिङ ब्याटिङमा नयाँ प्रयोग गर्न खोज्दा पटवालले उपयुक्त छनोट भेट्न असफल देखिएका थिए। जसले टिमको नतिजामा पनि असर गरिरह्यो।
टिममा कमजोर रणनीति र खेलाडीको खेल कौशल नबुझ्दा राम्रा भनिएका प्रशिक्षक पनि असफल भएका उदाहरण विश्व क्रिकेटमा धेरै नै छ। प्रशिक्षकले टिमको अवस्था र देशभित्रको क्रिकेटको माहोल कसरी बुझेको छ भन्नेले ठूलो अर्थ राख्नेछ। नयाँ प्रशिक्षक राष्ट्रिय टिमका लागि हुने भए पनि उनको भूमिका देशभित्र क्रिकेटको विकासमा प्रमुख हुनेछ। जसले जिल्लादेखि संरचनागत रुपमा खेलाडीको विकासमा सहयोग गर्न सक्नेछन्।
यी सबै विषयले अब नियुक्त भएर आउने प्रशिक्षक कस्ता छन्? के आधारलाई लिएर प्रशिक्षक नियुक्त गर्न लागिएको हो? यी प्रश्नले निकै अर्थ राख्छ।
क्यानका अध्यक्ष चतुरबहादुर चन्द भन्छन्- ‘प्रशिक्षकले विगतमा गरेको योगदान, पाएका सफलता, छविलाई हामीले आधार मानेका छौँ। त्यसबाहेक उसको रणनीति र उसले हामीलाई दिने विश्वास र योजना पनि मुख्य आधार हुन्।’
क्यानले खुला आह्वान गर्दा विभिन्न देशका ७२ प्रशिक्षकले आवेदन दिएका थिए। त्यसबाट छानिएका १२ जनाको अन्तर्वार्तापछि क्यानले अन्तिम नामावली टुंगो लगाउँदै आइसिसीलाई पठाएको छ। क्यानले पठाएको अन्तिम तीन जनामध्ये श्रीलंकालाई विश्वकप जिताएका अस्ट्रेलियाका डेभ वाटमोर, स्कटल्यान्डका निल म्याकरे र भारतका अपूर्व देसाई छन्।
क्यान सचिव अशोकनाथ प्याकुरेल भन्छन्- ‘हामीले अन्तिम लिस्ट बनाएर आइसिसीलाई पठाइसकेका छौँ। अब त्यो लिष्टमध्येका प्रशिक्षकहरुमा आइसिसीको सुझाव हुनेछ। त्यसपछि हामी नियुक्ति गर्नेछौँ।’
यस्तै, क्यानले अब मुख्य प्रशिक्षक बन्न लागेकासँग तलब र सेवा सुविधाको बारे दुई पक्षबीच छलफल गर्नेछ। उच्च पारिश्रमिक र सेवासुविधा माग्ने प्रशिक्षकलाई नियुक्ति दिन क्यानका लागि मुस्किल हुने देखिन्छ। क्यान अध्यक्ष चन्दले भनेका छन्, ‘हामीसँग आयश्रोत छैन। आइसिसीसँग नै निर्भर छौँ। अब धेरै पारिश्रमिक र सेवासुविधा लिने भन्दा पनि कममा राम्रो गर्न सक्ने प्रशिक्षक ल्याउँछौँ।’
नेपाली क्रिकेट टिमले मंसिर दोस्रो साता मुख्य प्रशिक्षक पाउने क्यानले बताएको थियो। तर त्यसमा भनेअनुसार काम भइरहेको देखिँदैन।
क्यानको आफ्नै आन्तरिक कारणले पनि ढिलो भएको हो भने हरेक निर्णय आइसिसीलाई जानकारी गराउनु पर्ने हुँदा पनि प्रशिक्षक नियुक्तिमा समय लागिरहेको छ। क्यानमाथिको प्रतिबन्ध फुकुवा भए पनि क्यानले अहिले स्वतन्त्र रुपमा काम गर्न पाएको छैन।
गएको वर्ष आइसिसीले क्यानलाई सर्तसहित लामो समयपछि प्रतिबन्धबाट फुकुवा गरेको थियो। त्यसकारण पनि क्यानले हरेक ठूला कामको निर्णय गर्नुअघि आइसिसीसँग सुझाव र अनुमति माग्नु पर्छ।
यसकारण आइसिसीले राय सुझावसहित पठाएको लिस्ट क्यानले प्राप्त गरेलगत्तै नेपालले नयाँ प्रशिक्षक पाउने सम्भावना छैन। केही दिनभने अझै लाग्ने नै छ। क्यान सचिव प्याकुरेल भन्छन्, ‘आइसिसीले लिष्ट पठाएपछि प्रशिक्षकसँग केही सर्तहरुमा कुरा हुन्छ। हाम्रो योजना भनेको एकदिवसीय मान्यताको अवधिभर एउटै प्रशिक्षक रहिरहोस् भन्ने हो। एक वर्षभन्दा बढि अवधिको राख्नु त परिहाल्यो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771566457.png)
