काठमाडौं- नेपाली राष्ट्रिय क्रिकेट टिमको प्रशिक्षक खोजी हुन थालेको तीन महिनाभन्दा बढी भयो। गएको वर्ष माघमा तत्कालीन प्रशिक्षक उमेश पटवालले राजीनामा दिएपछि गएको भदौमा पहिलोपटक नेपाल क्रिकेट संक (क्यान)ले प्रशिक्षकका लागि खुला आवेदन मागेको थियो।
जहाँ विभिन्न देशका ७२ प्रशिक्षकले आवेदन दिएका थिए। त्यसबाट छानिएका १२ जनाको अन्तर्वार्तापछि अहिले अन्तिम नामहरु टुंगो लाग्दैछ। जहाँ श्रीलंकालाई विश्वकप जिताएका अस्ट्रेलियाका डेभ वाटमोर, स्कटल्यान्डका निल म्याकरे र भारतका अपूर्व देसाई अन्तिम तीन नाममा परेका छन्।
मंसिर दोस्रो साता नै नेपाली क्रिकेट टिमले मुख्य प्रशिक्षक पाउने क्यानले बताउँदै आएको थियो। तर आन्तरिक कारण क्यानले मुख्य प्रशिक्षकको टुंगो समयमा लगाउन सकेको छैन। यसअघि अन्तर्वार्ता हुँदा १२ प्रशिक्षकको सूचिमा पुबुदु दासानाएके पनि थिए। तर नेपाली क्रिकेट टिमका पूर्व प्रशिक्षक समेत रहेका पुबुदु भने अन्तिम तीनमा अटाएका छैनन्। अन्तर्वार्तापछि क्यानले तीन जना मुख्य प्रशिक्षकको दाबेदार तयार गरेको हो। जसमा वाटमोर, म्याकरे र देसाई छन्।
२०७६ माघमा उमेश पटवालले राजीनामा दिएपछि नेपाली क्रिकेट टिमको मुख्य प्रशिक्षकको जिम्मेवारी जगत टमाटाले लिँदै आएका थिए। त्यसअघि पनि नेपालले एकदिवसीय अन्तर्राष्ट्रिय क्रिकेटको मान्यता पाउँदा मुख्य प्रशिक्षकमा टमाटा नै थिए। अहिले नेपाली क्रिकेट टिम बन्द प्रशिक्षणमा रहँदा टमाटाले नै मुख्य प्रशिक्षकको जिम्मेवारी सम्हाल्दै आएका छन्।
यस्ता छन् सम्भावित प्रशिक्षक
डेभ वाटमोर
श्रीलंकालाई १९९६ मा प्रशिक्षकको रुपमा विश्वकप क्रिकेटको उपाधि जिताएका वाटमोर आफ्नो समयका उम्दा खेलाडी हुन्। राइट ह्यान्डेड ब्याट्सम्यान वाटमोरले अस्ट्रेलियाबाट सात टेस्ट, एक एकदिवसीय, १०८ फस्ट क्लास र २६ लिष्ट ए क्रिकेट खेलेका छन्।
२००३ देखि २००७ सम्म बंगलादेशको प्रशिक्षक भएर पनि काम गरे। बंगलादेशको क्रिकेटलाई विश्व जगतमा चिनाउन उनको भूमिका महत्वपूर्ण मानिन्छ।
एक समय भारतीय क्रिकेट टिमको प्रशिक्षकको रुपमा चर्चा गरिएका वाटमोरले भारतको यु–१९ राष्ट्रिय क्रिकेट टिमको जिम्मेवारी पनि सम्हालेका छन्। २००८ मा विराट कोहलीको कप्तानीमा भारतले यु–१९ विश्वकपको उपाधि जित्दा प्रशिक्षकमा उनै वाटमोर थिए। त्यसका साथै भारतको राष्ट्रिय क्रिकेट एकेडेमीको डाइरेक्टर भएर पनि उनले काम गरे।
.jpg)
यस्तै उनले इन्डियन प्रिमियर लिग (आइपिएल) मा कोलकाता नाइट राइडर्सको प्रशिक्षकको रुपमा पनि काम गरे।
उनी २०१२ मा पाकिस्तान राष्ट्रिय क्रिकेट टिमको प्रशिक्षक बने। उनकै प्रशिक्षणमा पाकिस्तानले एसिया कपको उपाधि समेत जितेको थियो। उनी २०१२ देखि २०१४ सम्म पाकिस्तानको प्रशिक्षक भूमिकामा रहे।
पाकिस्तानपछि २०१४ को डिसेम्बरमा वाटमोर जिम्बाब्वेको प्रशिक्षक बने। जिम्बाब्वेसँग ९ महिनाको सम्झौता बाँकी रहँदै बर्खास्त भएका वाटमोर त्यसपछि २०१७ मा केरला क्रिकेट एसोसिएसनको मुख्य प्रशिक्षक बने। उनी २०२० को फेब्रुअरीमा सिंगापुर राष्ट्रिय क्रिकेट टिमको प्रशिक्षक बने। उनले सिंगापुरलाई एसीसी टि–२० एसिया कपमा छनोट गराए।
वाटमोरले नेपाली खेलाडीहरुलाई यसअघि प्रशिक्षण दिइसकेका छन्। ब्याट एण्ड बल फाउण्डेसनले आयोजना गरेको हाई पर्फर्मेन्स क्याम्पमा ११ दिन नेपाली खेलाडीहरुलाई प्रशिक्षण दिएका थिए।
निल म्याकरे
म्याकरे स्कटल्यान्डका अन्तर्राष्ट्रिय क्रिकेट खेलाडी हुन्। उनले २ एकदिवसीय र ६ फस्र्ट क्लास र १७ लिष्ट ए खेल खेलेका छन्। इंग्ल्यान्डमा जन्मिएका ४८ वर्षीय म्याकरे आफ्नो समयका राइट ह्यान्डेड ब्याट्सम्यान थिए।
.jpg)
उनले सन् २००६ पाकिस्तानविरुद्ध एकदिवसीय क्रिकेट खेलमा डेब्यु गरेका थिए। त्यसपछि त्यही वर्ष आयरल्यान्डसँगको खेल उनको अन्तिम एकदिवसीय खेल रह्यो। फष्र्ट क्लास क्रिकेटमा भने उनले १९९९ मा डेब्यु गरेका थिए। २००७ पछि उनी मैदान बाहिर छन्। उनले डिसेम्बर २०१३ मा जर्सी राष्ट्रिय क्रिकेट टिमको मुख्य प्रशिक्षक भएर काम गरे।
अपूर्व देसाई
भारत गुजरातका देसाईसँग खेलाडीको रुपमा दुई फस्ट क्लास र दुई लिस्ट ए क्रिकेट खेलेको अनुभव मात्र छ। उनी २०१८ मा भएको एसिया कप छनोट क्रिकेटमा नेपाली क्रिकेट टिमको ब्याटिङ कन्सल्ट्यान्टका रुपमा थिए।
.jpg)
भारत बैंगलोरमा रहेको नेशनल क्रिकेट एकेडेमीमा १० वर्षभन्दा बढी समय ब्याटिङ प्रशिक्षकको काम गरेको अनुभव भएका देसाईले आइपिएल टिम कोलकाता नाइट राइडर्समा ब्याटिङ प्रशिक्षकको रुपमा पनि काम गरिसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1771566457.png)
