प्रहरी चौकीमा स्थानीयवासीको आक्रमण : अश्रुग्यास र हवाई फायर, चार प्रहरी घाइते

शनिबार विशेष

नेपाल लाइभ सोमबार, वैशाख २४, २०७५ ०५:५७

पर्सा- पक्राउ गरिएका अभियुक्तलाई छुटाउन प्रहरी चौकी सेढवामा स्थानीयवासीले आक्रमण गर्दा चार सुरक्षाकर्मी घाइते भएका छन्। अभियुक्तलाई छुटाउन स्थानीय बासिन्दाले आज बिहान करिब ३ बजे प्रहरी चौकी सेढवानमा आक्रमण गर्दा तीन प्रहरी सहायक निरीक्षक र एक प्रहरी जवान घाइते भएका हुन्।

घाइते चारैजनाको वीरगञ्जको नारायणी उपक्षेत्रीय अस्पतालमा उपचार भइरहेको छ। घाइते हुनेमा प्रहरी सहायक निरीक्षकहरु गोपाल खड्का, सुकेश्वर महतो र शम्भु महतो तथा प्रहरी जवान जयप्रकाश यादव रहेको जिल्ला प्रहरी कार्यालय पर्साका प्रहरी नायब उपरीक्षक राजन लिम्बूले जानकारी दिए।

प्रहरीलाई दुर्व्यवहार गरेको अभियोगमा पक्राउ परेका चार भारतीय नागरिक र चोरीको अभियोगमा पक्राउ परेका दुई नेपाली नागरिकलाई छुटाउन सेढवावासीले प्रहरी चौकीमा आक्रमण गरेको लिम्बूले बताए।

स्थानीयवासीले प्रहरी चौकीमा रहेका दुई थान मोटरसाइकलमा समेत आगजनी गरेका छन्। उनीहरुले प्रहरीको वाहनमा समेत तोडफोड गरेपछि भिडलाई नियन्त्रणमा लिन प्रहरीले अश्रुग्यास र केही राउण्ड हवाई फायर गरेको थियो। आक्रमणमा प्रहरी चौकीमा क्षति पुगेको छ।

मादक पदार्थ सेवन गरी एउटै मोटरसाइकलमा सवार भई भारततर्फ गइरहेका चार भारतीयलाई आइतबार बेलुका प्रहरी चौकी महादेवपट्टिका सुरक्षाकर्मीले रोकी सोधपुछ गर्दा प्रहरीलाई नै हातपात गरेपछि उनीहरुलाई नियन्त्रणमा लिई आवश्यक कारवाहीका लागि प्रहरी चौकी सेढवामा राखिएको थियो।

यस्तै, चोरीको अभियोगमा सुवर्णपुरबाट पक्राउ गरिएका दुई अभियुक्तलाई समेत सोही चौकीमा राखिएको प्रहरीले जनाएको छ। चौकीमा रहेका ६ जना अभियुक्तलाई छुटाउन ढुङ्गामुडा तथा आगजनी गरिएको हो।रासस

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

आजको मौसमः देशका पहाडी क्षेत्रमा आंशिक बदली, वर्षाको सम्भावना

जिप मादी नदीमा खस्दा ३ जनाको मृत्यु, २ जना घाइते

प्रतियोगिताबाट बाहिरिसकेको दिल्लीले पञ्जाबलाई ६ विकेटले हरायो