काठमाडौं–सत्तारुढ नेपाल कम्युनिष्ट पार्टी (नेकपा) को जारी विवाद चाडपर्वको समयमा पनि रोकिएको छैन। तिहारका बीच पनि दुवै पक्षले आफूअनुकूल रणनीति बनाउन भेटघाट तीव्र पारे।
प्रधानमन्त्री केपी शर्मा ओलीले टीकाकै दिन साँझदेखि रातिसम्म पूर्वमाओवादी पक्षका नेताहरु भेटेका थिए। अघिल्लो दिन वामदेव गौतम र माधव नेपाललाई भेटेका ओलीले सोमबार पूर्वमाओवादी खेमाका नेताहरुलाई भेटे।
यता अर्को पक्ष अध्यक्ष पुष्पकमल दाहाल ‘प्रचण्ड’ र माधव नेपाल समूह पनि आन्तरिक भेटघाट र रणनीति बनाउन लागि परेका छन्। बुधबार सचिवालय बैठक बस्ने भएकाले त्यसअघि नै आफ्नो समूह कसरी अघि बढ्ने भन्ने बारेमा ठोस रणनीति बनाउन दुवै पक्षले आन्तरिक छलफल र तयारी तीव्र पारेका हुन्।
अध्यक्ष दाहालले ओलीमाथि आरोप लगाउँदै पेश गरेको १९ पाने राजनीतिक प्रतिवेदनमा एकजुट भएर ओली पक्षलाई दबाब दिने रणनीतिमा लागेका छन्। सचिवालयमा रहेका प्रचण्ड, नेपाल ,झलनाथ खनाल र वामदेव गौतम एक ठाउँमा छन्। प्रधानमन्त्री एवं अध्यक्ष ओली, इश्वर पोखरेल, महासचिव विष्णु पौडेल एक ठाउँमा छन्। पूर्वमाओवादी तथा गृहमन्त्री रामबहादुर थापा बादल अहिले तटस्थ समूहमा छन। प्रचण्डबाट पर रहेका उनी एकताको पक्षमा रहेको बताउँदै आएका छन् ।
प्रचण्ड पक्ष सचिवालयमा बहुमत भएकाले थप दबाब दिएर ओलीलाई अध्यक्ष वा प्रधानमन्त्री मध्ये एक पद छोड्न वाध्य बनाउने रणनीतिमा लागेको छ। तर ओली पक्ष भने सत्ता र पार्टी दुवै नछोड्ने रणनीतिको खोजीमा छ।
अध्यक्ष दाहाल र वरिष्ठ नेता नेपाल पक्षले बुधबारको सचिवालय बैठकमा ओली पक्ष सामेल नभए पनि सचिवालयको औपचारिक बैठक डाक्ने आन्तरिक तयारी गरेका छन्। ओली पक्षले सचिवालय बैठक नै नराखी टार्न सक्ने उनीहरुको प्रारम्भिक आँकलन छ। त्यसका लागि प्रचण्ड–नेपाल पक्षले मंगलबार साँझसम्म ओलीपक्षका गतिविधि नियाल्ने, त्यसपछि साँझै या भोलि बिहान अनौपचारिक बैठक बसी सचिवालयको औपचारिक बैठकका एजेण्डा तय गर्ने गरी आन्तरिक तयारी गरेको एक नेताले बताए।
प्रवक्ता नारायणकाजी श्रेष्ठले बुधबार पूर्वनिर्धारित समयमा सकेसम्म सहमतिमा बैठक हुने, नभए आफूहरुले बैठक डाक्ने बताए। ‘सहमतिमै बैठक राख्न पर्छ भन्ने हाम्रो कुरा हो। त्यसका लागि हामी अन्तिम समयसम्म प्रतिक्षा गर्छौ,’ उनले भने, ‘तर प्रधानमन्त्री मान्नु भएन भने हामी बस्ने छौँ र त्यो बैठक औपचारिक हुनेछ।’
विवादकाबीच पछिल्लो पटक प्रचण्डले सचिवालय बैठकमा ओलीलाई भ्रष्टाचारलाई प्रोत्साहन गरेको, एकाधिकारवादी भएको , रअ प्रमुखसँग कूटनीतिक मर्यादाविपरीत भेटेको र पार्टीभन्दा गुट चलाएको जस्ता दर्जनौँ आरोपसहित १९ पृष्ठ लामो प्रस्ताव पेश गरेका थिए।
ओली पक्षले त्यो प्रस्ताव नभई ‘अभियोग पत्र’ भएको भन्दै फिर्ता नभएसम्म पार्टीका पूर्वनिर्धारित बैठक मात्रै होइन, संवादसमेत अघि नबढ्ने बताउँदै आएको छ। यही विषयलाई लिएर दुई पक्षका नेताहरुका बीचमा सामाजिक सञ्जालमा दोहोरी नै चलेको थियो ।
पूर्वमाओवादी पृष्ठभूमिका नेताहरुसमेतको सोमबारको छलफलमा ओलीले प्रचण्डको प्रस्ताव हेर्ने हो भने पार्टी एक नरहने बताएका थिए।
ओलीलाई पूर्वमाओवादी नेताहरुको सुझाव–एक कदम पछि हटेर भए पनि एकता बचाउनुस्
सचिवालयको बैठक नजिकिँदै गर्दा नेकपा अध्यक्ष तथा प्रधानमन्त्री केपी शर्मा ओलीले सोमबार बेलुका निवासमा पूर्वमाओवादीका नेताहरूसहितलाई राखेर छलफल गरेका थिए।
उक्त छलफलमा पूर्वमाओवादीका नेताहरूले प्रधानमन्त्रीलाई लचिलो हुन सुझाव दिएका थिए । प्रधानमन्त्री र पार्टीको पहिलो वरियताको अध्यक्ष हुनुको नाताले लचिलो हुने दायित्व हुने भन्दै उनीहरुले पार्टी विभाजन भएमा कम्युनिष्ट आन्दोलन नै समाप्त हुने निचोड सुनाएका थिए । छलफलमा ओली पक्षबाट उपप्रधान तथा प्रधानमन्त्री तथा मन्त्रिपरिषद् कार्यालयका मन्त्री ईश्वर पोखरेल, महासचिव विष्णु पौडेल, गण्डकी प्रदेशका मुख्यमन्त्री पृथ्वीसुब्बा गुरूङ, सुवास नेम्वाङसहितका नेताहरू सहभागी थिए । पूर्वमाओवादी समूहबाट स्थायी कमिटी सदस्यद्वय देवेन्द्र पौडेल र टोपबहादुर रायमाझी सहभागी थिए।
नेता पौडेलले आफूले दुवै अध्यक्षलाई भेटेर पार्टी फुटबाट जोगाउन र एकताको रक्षा गर्न आग्रह गरेको बताए। ‘पार्टीभित्र संकट गहिँरिदै गएको छ,’ पौडेलले भने, ‘अव दुवै अध्यक्ष लचिलो भएर एकताको स्प्रिट अनुसार काम गर्नु पर्छ । सबैतिर भेटेर एकता जोगाउन भनेका छौं ।’
गण्डकी प्रदेशका मुख्यमन्त्री गुरूङले विषको ‘विषको घडा पिएर’ भए पनि पार्टी एकता बचाउन आग्रह गरेको बताए।
ओलीले भने– पार्टी फुटाउँदिन
ओलीले भेटमा आफूले कुनै पनि अवस्थामा पार्टी नफुटाउने प्रतिबद्धता जनाएका थिए। तर प्रचण्डले आरोपपत्रमा प्रस्तुत गरेका कुरा नसच्याए पार्टी एक रहने अवस्था नहुने उनले बताएका थिए।
आफूले पार्टी र सरकारका लागि सक्दो गरे पनि कसैले सहयोग नगरेको गुनासो ओलीले गरेका थिए। प्रधानमन्त्रीले सरकारका राम्रा कामहरुको प्रतिरक्षा पार्टीले नगरेको गुनासो गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
