काठमाडौं–नेप्से सूचक आगामी साता ‘बियरिस ट्रेण्ड’ मा चल्न सक्ने अनुमान गरिएको छ। गएको साता नेप्से सूचक एक वर्ष यताकै अधिकतम बिन्दु कायम भएकाले आगामी साता बियरिस ट्रेण्डमा चल्नसक्ने अनुमान गरिएको हो आगामी साता नेप्से सूचक अधिकतम १६८४ अंकसम्म पुग्ने विश्लेषण गरिएको छ। त्यस्तै न्युनतम १६०४ अंकसम्म तल झर्ने अनुमान प्राविधिक विश्लेषकहरुले गरेका छन्।
अल्पकालीन बियरिस ट्रेण्डलाई पछिल्लो राजनीतिक घटनाक्रमले पनि प्रभाव पारिरहेको छ। यसले शेयर बजारमा केही अन्योल पैदा गरेको हो। अहिलेको राजनीतिक किचलोले अवस्था अझ नराम्रो हुने विश्लेषण गरिएको छ।
अल्पकालीन बियरिस ट्रेण्डलाई छोट्याउन सक्ने केही आधार भने कायम नै छ। अबको केही समय सूचीकृत कम्पनीहरुले लाभांश घोषणा गर्नेछन्। यसले अल्पकालीन बुलिस ट्रण्डलाई छोट्याउन मद्दत गर्ने विश्लेषण गरिएको छ। कोभिड १९ का कारण सूचीकृत कम्पनीहरुले समयमा लेखापरीक्षण गर्न नसक्दा साधारणसभा पनि पछाडि सरिरहेको छ।
बैंक तथा वित्तीय संस्थाहरुले लाभांश घोषणा गरिरहेका छन्। नेपाल राष्ट्र बैंकले नगद लाभांशभन्दा बोनस शेयरलाई प्राथमिकता दिन अघोषित निर्देशन दिँदै गर्दा यसले पनि दोस्रो बजारलाई केही ‘सपोर्ट’ गर्ने देखिन्छ। संस्थापक शेयरधनीहरुले नगद लाभांश चाहे पनि सर्वसाधारण शेयरधनीहरुलाई नगदभन्दा बोनस शेयर दिँदा बढी फाइदा हुन्छ। तत्कालका लागि बोनस शेयर फाइदाजनक देखिए पनि दीर्घकालीन रुपमा बोनस शेयरले आगामी वर्षको प्रतिफललाई घटाउछ। बजारमा पर्याप्त तरलता भएका कारण शेयर लगानीकर्ताले शेयर धितो लिएरै शेयर खरिद गरिरहेका छन्।
अर्कोतर्फ साधारण व्याजभन्दा अहिले शेयरमा गरिएको लगानीबाट बढी प्रतिफल हुने भएकाले पनि लगानीकर्ताहरु बैंकमा निक्षेप जम्मा गर्नभन्दा पनि शेयर खरिद गरेर बढी लाभ लिन खोजिरहेका छन्। बिमा कम्पनीहरु पनि दोस्रो बजारका खेलाडी हुन्। लगानी व्यवस्थापन गर्ने क्रममा बिमा कम्पनीहरुले दोस्रो बजारमा लगानी बढाइरहेका छन्। त्यस्तै म्युचुअल फण्ड क्यापिटल कम्पनीहरुले दोस्रो बजारमा लगानी बढाइरहेका छन्।
यसैले गर्दा कारोबार रकम औसतमा दुईदेखि तीन अर्बको बीचमा हुने गरेको छ। यो सातामात्रै १२ अर्ब २२ करोड रुपैयाँको कारोबार भयो। बजारका ब्लु चिप कम्पनीहरुले यस वर्ष लाभांश घटाइरहेका छन्। स्ट्याण्र्ड चार्टर्ड, एभरेष्ट बैंक, युनिलिभरजस्ता कम्पनीको लाभांशमा भारी गिरावट आएको छ। तर धेरै लाभांशको अपेक्षा नगरिएका कतिपय कम्पनीले राम्रो लाभांश घोषणा गरेका छन्।
राम्रो लाभांश दिनसक्ने क्षमता भएका कम्पनीले पनि कोभिड–१९ का कारण कोष बलियो बनाउन खोजेको देखिन्छ। त्यसै पनि गत वर्ष कोभिडका कारण लाभांशमा भारी गिरावट आएको छ। यस वर्ष थोरै लाभांश दिएर आगामी वर्षमा राम्रो लाभांश दिने रणनीतिका कारण पनि उनीहरुले लाभांश बाँड्न हतारिएको देखिँदैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
