काठमाडौं– सुन तस्करीमा संलग्न समूहलाई सहयोग गरेको अभियोगमा पक्राउ प्रहरी तथा नेपाल एयरलाइन्सका कर्मचारीविरुद्ध भ्रष्टाचार र सम्पत्ति शुद्धीकरण मुद्दासमेत चल्ने भएको छ। जिल्ला सरकारी वकिलको कार्यालय, मोरङले दुई प्रहरीबाहेक अन्य अभियुक्तविरुद्ध सम्पत्ति शुद्धीकरण अनुसन्धान मुद्दा चलाउने निर्णय गरेको छ।
सरकारी वकिलको कार्यालयको अभियोजनमा भनिएको छ, ‘यस मुद्दाका प्रतिवादीहरुमध्ये प्रहरी नायव महानिरीक्षक गोविन्दप्रसाद निरौला, प्रहरी वरिष्ठ उपरीक्षक श्यामबहादुर खत्री, प्रहरी उपरीक्षक विकासराज खनाल, प्रहरी नायव उपरीक्षक सञ्जयबहादुर राउत, प्रहरी नायव निरीक्षक बालकृष्ण सञ्जेल, प्रहरी जवान विष्णु खड्का, प्रहरी हवल्दार अमर भन्ने अम्बरबहादुर थापा मगर र नेपाल वायु सेवा निगमका कर्मचारी राजु महर्जन, राजन थापा, तुलाराम थारु र अमरमान डंगोल राष्ट्र सेवक भएको र प्रस्तुत मुद्दाको अनुसन्धानमा निजहरुले पदीय काम कारबाहीको सिलसिलामा अनुचित लाभ लिएको विषय समेत खुल्न आएकाले निज प्रतिवादीहरुले संगठित अपराध निवारण ऐन, २०७० को दफा २० र भ्रष्टाचार निवारण ऐन, २०५९ को दफा ५९ बमोजिम समेत अनुसन्धान हुनुपर्ने देखिएकाले तत् सम्बन्धमा अनुसन्धानका लागि अख्तियार दुरुपयोग अनुसन्धान आयोगमा लेखी पठाउने निर्णय गरिएको छ।’
अर्काे बुँदामा भनिएको छ, ‘प्रस्तुत संगठित अपराध मुद्दामा प्रतिवादीहरुमध्ये कोही छुटी जाने भएमा राष्ट्रसेवक कर्मचारीका हकमा प्रतिवादीहरु राजु महर्जन, अमरमान डंगोल, तुलाराम थारु, राजन थापा, विष्णुबहादुर खड्का, सञ्जयबहादुर राउत, बालकृष्ण सञ्जेल, विकासराज खनाल, गोविन्दप्रसाद निरौला, श्यामबहादुर खत्री र अमर भन्ने अम्बरबहादुर थापा मगरलाई अख्तियार दुरुपयोग अनुसन्धान आयोगमा र अन्य गैर राष्ट्र सेवक व्यक्तिको हकमा सम्पत्ति शुद्धीकरण अनुसन्धान विभागमा अनुसन्धानका लागि लेखी पठाउने निर्णय भएको हुँदा निजहरु प्रस्तुत मुद्दाबाट सुनुवाईका क्रममा कुनै किसिमले छुटी जाने भएमा उक्त निकायमा पठाउने प्रयोजनार्थ जिल्ला प्रहरी कार्यालय मोरङमा फिर्ता पठाइदिनु भनी तहाँ मोरङ जिल्ला अदालत समक्ष अनुरोध छ।’
जिल्ला अदालत मोरङमा सुन तस्करीका अभियुक्तविरुद्ध संगठित अपराध, कर्तव्य ज्यान र अपहरण मुद्दा दायर भएको छ।
पक्राउ परेकामध्ये एसएसपी दिवेश लोहनी र डिएसपी प्रजित केसीको हकमा थप मुद्दा चलाउने सिफारीस भएको छैन। उनीहरुले तस्कर समूहलाई सहयोग गरेको नभई अनुसन्धानमा मात्र लापरबाही गरेको खुलेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
