सिओल- सरकारले कात्तिक १ देखि हिमाल आरोहण र ट्रेकिङमा जान चाहने कोरियाली पर्यटकका लागि भिसा उपलब्ध गराउने भएको छ। कोरोना माहामारीका कारण लामो समयदेखि रोकिएको भिसा स्वीकृति प्रकृया कात्तिक १ देखि पुनः सञ्चालन गर्ने निर्णय भएको नेपालस्थित पर्यटन मन्त्रालयलाई उद्धृत गर्दै सिओलस्थित नेपाली दूतावासले जनाएको छ।
पहिलो चरणमा तत्कालका लागि हिमाल आरोहण र ट्रेकिङका लागि मात्र भिसा उपलब्ध गराइने दूतावासको भनाइ छ।
भ्रमणका लागि जान चाहने पर्यटकले भिसा लिँदा आफू सोही क्षेत्रका लागि जान लागेको भनी उल्लेख गर्नुपर्ने दूतावासका उपनियोग प्रमुख रामसिंह थापाले जानकारी दिए।
हिमाल आरोहण र ट्रेकिङजस्ता पर्यटकीय क्षेत्रमा बाक्लो भिडभाड नहुने भएकाले सोही क्षेत्रलाई लक्षित गरी भिसा उपलब्ध गराउन लागिएको थापाको भनाइ छ।
कोरियाली पर्यटकले नेपाल जानुभन्दा पहिले विमानस्थलमा ७२ घण्टा भित्रको कोरोना परीक्षणको पिसिआर नेगेटिभ रिपोर्ट पेश गर्नुपर्ने दूतावासले जनाएको छ।
पर्यटकका लागि ट्रेकिङ वा ट्राभल एजेन्सीमार्फत् उल्लेखित क्षेत्रका लागि भ्रमणमा जान लागेको भनी प्रमाणित प्रतिलिपी अनिवार्य गरिएको छ। त्यस्तै नेपालमा गई ७ दिन क्वारेन्टाइनमा बस्नुपर्ने र त्यसका लागि नेपालस्थित होटल क्वारेन्टाइन सुनिश्चित गरिएको प्रमाणपत्र पनि अनिवार्य गरिएको छ।
पर्यटकले ५ हजार अमेरिकी डलर बराबरको कोरोना बिमा गरेको पोलिसी प्रमाण पनि पेश गर्नुपर्ने उल्लेख छ।
नेपाल पुगिसकेपछि होटल क्वारेन्टाइनमा बस्ने पर्यटकको पाँचौं दिनमा कोरोना परीक्षण गरिने र रिपोर्ट पोजेटिभ आएको खण्डमा निको नहुँदासम्म सोही होटलमा आइसोलेसनमै बस्नुपर्ने उल्लेख छ।
नेपालमा कोरोना प्रकोप फैलनुभन्दा पहिले कोरियालीहरुले नेपाल भ्रमणमा जान चाहेको आशय व्यक्त गर्दै कहिलेबाट भिसा स्वीकृति खुल्छ? भन्ने जिज्ञासा राख्ने गरेको भएपनि पछिल्लो समय भने त्यसरी जिज्ञासा राख्नेहरु नआउने गरेको थापाले बताए।
पर्यटन मन्त्रालयको उक्त निर्णय स्वागतयोग्य भएको कोरियाका लागि नेपाली पर्यटन दूत केपी सिटौलाको भनाइ छ। तर अन्य विषयलाई बेवास्ता गरेर भिसा उपलब्ध गराएर मात्र कोरियाली पर्यटक नेपाल नजाने उनको तर्क छ।
उनले कोरोना महामारी सुरु भए यता कोरिया-नेपाल हवाई सम्पर्क जटिल विषय भएकाले त्यसलाई सहज नबनाई भिसामात्र उपलब्ध गराएर नपुग्ने बताए।
महामारीमा पनि कोरियाको आन्तरिक पर्यटन व्यवसाय फस्टाएकोले कोरियालीहरु भ्रमणमा जान आतुर भएको आफूले पाएको सिटौलाको भनाइ छ।
उनी भन्छन्, ‘सप्तान्हमा कोरियाका पर्यटकीय स्थलहरु आन्तरिक पर्यटकले भरिभराउ छन्, यहाँका होटलहरू भरिभराउ छन्। त्यसकारण यहाँका नागरिक कोरोना प्रभाव नरहेका देशको भ्रमणमा जान आँतुर छन् भन्ने बुझ्न सकिन्छ।’
कोरोना महामारीका कारण नेपालमा पर्यटन व्यवसाय थला परिरहेका बेला कोरियामा भने आन्तरिक पर्यटकले यहाँका पर्यटकिय स्थलहरु भरिभराउ छन्।
नेपालका हिमाली क्षेत्रहरु, खासगरी हिमाल आरोहण र ट्रेकिङका क्षेत्र कोरोना प्रभावबाट मुक्त रहेकाले सरकारले हप्तामा २ वटासम्म नियमित उडानको प्रत्याभुति गरेमा कोरियाली पर्यटक नेपाल भ्रमणमा निस्कने पर्यटन क्षेत्रका सरोकारवाला बताउँछन्।
सरकारल भदौ १५ देखि नै कोरियाका लागि नियमित उडान सुचारु गरिएको बताएपनि पर्याप्त यात्रु नभएको भन्दै कोरियन एयरले चार्टर उडानमात्र गर्दै आएको छ।
कोरियाबाट नेपाल भ्रमणमा जाने कोरियाली पर्यटकको संख्या सन् २०१८ मा ३८ हजार १ सय ४२ रहेको र २०१९ मा ३६ हजारको हाराहारीमा रहेको सरकारी तथ्याङक छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1792292945.webp)
-1786602170.png)
