काठमाडौं–प्रतिनिधि सभा सदस्य डा सूर्यनारायण यादव गत साउनको पहिलो साता जनकपुर गए। सप्तरी र जनकपुरमा केही समय बिताउने उद्देश्य थियो। साउन अन्तिम सातातिर गम्भीर अवस्थामा रहेकी बालिकालाई जाँचिदिन भन्दै जानकी टिचिङ अस्पतालबाट फोन आयो। पेशाले डाक्टर थिए, पेशागत धर्म निर्वाह गर्नैपर्यो। त्यसैले बिरामी जाँच्न अस्पताल पुगे। तर, तिनै बालिकाको उपचारमा खटिँदा उनी कोरोना संक्रमित भए।
‘बालिकाको अवस्था गम्भीर थियो। डायरिया हुने, उच्च ज्वरो हुने गरेको थियो। परिवारले पहिले भारतमा गएर उपचार पनि गरेको रहेछन,’ यादवले भने, ‘घाँटीबाट स्लाइन दिँदासमेत उनलाई कम हुने छाँट नदेखेपछि कोरोनाको शंका लागेर धरान पठाएँ, उनलाई कोरोना भएको पुष्टि भयो त्यसपछि मैले चेक गराउँदा मलाई पनि देखियो।’
त्यतिबेला डा यादवसँगै काममा खटिएका अन्य पाँच जनालाई पनि कोरोना संक्रमण देखिएको थियो।
सप्तरी १ बाट निर्वाचित यादवलाई कोरोनाको गम्भीर लक्षण त देखिएन तर हातगोडा गल्ने, जोर्नी दुख्ने भने भयो। उनलाई निको हुन पनि समय लाग्यो। ‘मलाई त कोरोना निको हुन २२ दिन लाग्यो,’ यादवले भने, ‘सुगर भएका कारण पनि मलाई अलि समस्या हुन्छ कि जस्तो लागेको थियो तर सञ्चो भयो।’
‘नियमित ज्वरो र श्वासप्रश्वास नापाैं’
कोरोना लागेपछि सांसद यादव ‘होम आइसोलेसनमा’ बसे। दिनको तीन पटक ज्वरो र श्वासप्रश्वास नाप्ने गरे भने नियमित खानेकुरामा अलि बढी ध्यान दिए। ‘होम आइसोलेसनमा बसेपछि श्वासप्रश्वास र ज्वरो आफैंले नाप्नुपर्छ, धेरै नै गाह्रो भए अस्पताल गइहाल्नुपर्छ,’ यादवले भने, ‘परिवारका अन्य सदस्यलाई नसरोस् भनेर पनि विशेष ध्यान दिनु पर्छ।’ उनले होम आइसोलेसनमा बसेकालाई उच्च सतर्कता अपनाउन पनि सुझाव दिए।
‘उच्च आत्मबल राखाैं’
जुनसुकै रोग लागे पनि रोग जित्न उच्च मनोबल चाहिने यादबको भनाइ छ। ‘जुनसुकै रोगबाट मुक्त हुन पनि बिरामीको उच्च मनोबल हुन जरुरी छ,’ यादबले भने,‘कोरोना महामारी भएका कारण धेरैको मनोबल घट्न सक्छ तर यो रोग जित्न मनोबल नै उच्च हुन अतिआबश्यक छ।’
उनी उच्च आत्मबलका लागि बिहान र साँझ नियमित रुपमा गरिने योग र प्राणायमले सहयोग गर्ने बताउँछन्। ‘योगले हाम्रो उच्च आत्मबल बढाउँछ’ यादबले भने, ‘संक्रमित अथवा अन्यले पनि योग गरे अन्य रोगसँग जुध्न पनि सहज हुन्छ।’
‘तातो खानेकुरा खाऔँ’
कोरोना सङ्क्रमितलाई चिसोबाट बचाउनुपर्ने उनको भनाइ छ। ‘तातो खानेकुरा खाने, बाफ लिने नियमित गर्नुपर्छ,’ सांसद यादब भन्छन्, ‘सङ्क्रमितलाई चिसो हुन दिन हुन्न।’
आफूले नियमित दाल,भात, रोटीसँगै भिटामीन डी, भिटामिन सी, भिटामिन बी, खाने र तातोका लागि अन्य खानेकुरासमेत खाएको उनले बताए।
‘हेलचेक्रयाँइ नगरौं’
कोरोना संक्रमण पुष्टि भएको २२ दिनपछि निको भएका यादवले कोरोना केही हैन भनेर हल्ला चलाउनेप्रति उनले रोष प्रकट गरे। ‘कहिलेकाही सामाजिक सञ्जालमा कोरोना केही हैन, नो मास्क आदि लेखेको देख्छु,’यादबले भने, कोरोनालाई हेलचक्रयाँइ नगरौँ। यो रोग निको हुन निकै गाह्रो पनि पर्छ।’
त्यसको सट्टा आत्मविश्वास बढाउने, साबधानी कसरी अपनाउने भन्नेबारे युवाहरुले सामाजिक सञ्जालमा अभियान चलाए सबैलाई राम्रो हुने उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1792292945.webp)
-1786602170.png)
