काठमाडौं- बजार मागअनुसार आपूर्ति हुन नसक्दा अहिले अधिकांश तरकारीको मूल्य दोब्बर भएको छ। मुख्यगरी आलु, गोलभेडा, प्याज, काउली, बोडी, परबर, सिमीलगायतका तरकारीमा मूल्य आकासिएको देखिएको हो।
कालीमाटी फलफूल तथा तरकारी बजार विकास समितिले सोमबारका लागि निर्धारण गरेको तरकारीको खुद्रा मुल्यलाई पछिल्लो एक महिना अवधिको बजार मुल्यसँग तुलना गर्दा अहिले दोब्बरले वृद्धि भएको देखिन्छ। सोमबारको मुल्यसूचीअनुसार कालीमाटी बजारमै गोलभेडा प्रतिकिलो ८० देखि ९५ रुपैयाँसम्म थोक मूल्यमा बिक्री भइरहेको छ। त्यस्तै आलु प्रतिकिलो ९५ रुपैयाँ, प्याज ११०, काउली ९५, बोडी १०५, सिमी ८५ र परबर ८५ रुपैयाँ प्रतिकिलो बिक्री वितरण भइरहेको छ। जबकि यिनै वस्तुको एक महिना अगाडिसम्मको बजार मूल्य तुलना गर्दा सबैजसोको मूल्य आधा बराबर मात्रै थियो।
कालिमाटी बजार विकास समितिका अनुसार भारतले प्याज निकासीमा बन्देज लगाइएपछि पनि केही मात्रामा प्याज आइरहेको छ।
सामान्य अवस्थामा ६० देखि ६५ टन प्याज दैनिक रुपमा कालिमाटीमा भित्रने गरेकोमा सोमबार २४ टनमात्र आएको छ। आइतबार र शनिबार त प्याजको आपूर्ति शून्य नै रहेको कालिमाटी फलफूल तथा तरकारी बजार विकास समितिका सूचना अधिकृत विनय श्रेष्ठ बताउँछन्। प्याजमा नेपालको बजार पूर्ण रुपमा भारतमा निर्भर छ। अहिले केही व्यापारीले चीनबाट प्याज ल्याउने तयारी गरेपनि त्यसले भारतीय प्याजको जस्तो बजार नपाउने उनको भनाइ छ।
श्रेष्ठका अनुसार अहिले धेरैजसो तरकारीको स्थानीय उत्पादन घट्नु र मागअनुसार आपूर्ति नहुनु नै मूल्य बढ्नुको कारण हो। ‘आलु र गोलभेडाको मूल्य निकै आकासिएको छ। यो अफ सिजन हो। उत्पादन पनि कम छ तर बजारमा सामान कम आएको छ। त्यसकारण मूल्य बढेको हो’ उनले भने‚ ‘अहिले उत्पादन कै तहमा मूल्य बढेको छ। उदाहरणका लागि पालुङबाट आउने आलु त्यहाँका किसानले नै ७०–७५ रुपैयाँमा बिक्री वितरण गरिरहेका छन्। त्यस्तै गोलभेडा पनि प्रतिकिलो १ सय रुपैयाँ उत्पादकले नै पाइरहेका छन्। ती वस्तु बजारमा आएर उपभोक्तासम्म पुग्दा मूल्य अझ बढी हुन जान्छ।’
काठमाडौं उपत्यकामा आउने आलु बढीजसो भारतबाटै आउने गर्छ। तर भारतीय आलुमा धेरै मूल्य बढेको छैन। भारतीय आलु बजारमा ५५ देखि ६० रुपैयाँ प्रतिकिलोमा बिक्री भइरहेको छ। जबकि स्थानीय रातो आलु ९५ र मुडेको आलु ८२ रुपैयाँ प्रतिकिलोमा बिक्री वितरण भइरहेको छ।
यसरी हेर्दा स्थानीय आलुमा मुल्य बढेको सजिलै बुझ्न सकिन्छ। उपत्यकाको बजारमा आउने आलुका ७० प्रतिशत हिस्सा भारतबाट आउने आलुले ओगटेको छ।
गोलभेडाको हकमा भने काठमाडौं उपत्यकाका लागि यहिको स्थानिय उत्पादनले बढी बजार ओगटेको छ। धादिङ, मकवानपुर, काभ्रे, नुवाकोटलगायत जिल्लाबाट गोलभेडा काठमाडौंमा आउने गर्छ। दैनिक ३५ टन माग रहेको बजारमा २० देखि २५ टन मात्रै आइरहेको सूचना अधिकृत श्रेष्ठ बताउँछन्। ‘यो दैनिक रुपमा भान्सामा प्रयोग हुने चिज हो। एक दुई दिनमात्र आगमन कम भयो भने त्यसको असर मुल्यमा पर्न जान्छ। अहिले गोलभेडा काठमाडौं उपत्यका बाहिरको बजारमा पनि गइरहेको छ। किसानले चितवन, पोखरा, धरानसम्म बजार पाएका छन्’ उनले भने।
समग्रमा कालिमाटीमा आउने तरकारी र फलफूलको आपूर्ति नै अहिले कम छ। दैनिक औसत ७ देखि ८ सय टनसम्म तरकारी तथा फलफूल कालीमाटीमा आउने गरेकोमा अहिले ४ देखि ५ सय टनमात्रै आइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772949758.png)
-1764146706.png)
