काठमाडौं-केही समयअघि चोरी तथा ज्यानमार्ने उद्योगअन्तर्गत अदालतको आदेशमा पुर्पक्षका लागि थुनामा राख्न सिरहा कारागारमा ४ जना नयाँ थुनुवा ल्याइयो। उनीहरुको पिसीआर परीक्षण गरिएको थियो। तर रिपोर्ट भने आइसकेको थिएन।
कारागारमा उनीहरुलाई छुट्टै क्वारेन्टाइनमा राखियो। थुनामा राखिएको २ दिनपछि उनीहरुको पिसीआर रिपोर्ट पोजिटिभ देखियो। त्यसको केही दिनपछि अन्य केही कैदीबन्दीमा पनि ज्वरो देखिन थाल्यो। उनीहरुको पिसीआर परीक्षण गराउँदा कोरोना देखियो।
शुक्रबारसम्म कारागारमा रहेका २ आश्रित बालबालिकासहित ५ सय ९९ कैदीबन्दीमध्ये ५ सय ७ जनामा कोरोना संक्रमण पुष्टि भइसकेको छ।
कारागारमा कोरोना महामारी भयावह रुपमा फैलनुको कारण पुर्पक्षका लागि अदालतले पठाएका नयाँ थुनुवाहरु नै हुनसक्ने आशंका गरिएको छ।
निमित्त जेलर बबिता महतोका अनुसार अदालतले पुर्पक्षका लागि थुनामा पठाएका नयाँ थुनुवालाई कारागारभित्रै तयार गरिएको क्वारेन्टाइनमा छुट्टै राखिएको थियो।
तर सरसफाइ गर्ने, खाना दिने, गेटमा ताल्चा लगाउने व्यक्तिहरुको एउटै समुहले कारागारको सबैतिर काम गर्ने क्रममा कोरोना संक्रमण फैलिएको हुन सक्ने आशंका गरिएको महतोले नेपाल लाईभलाई जानकारी दिइन्।
‘छुट्टै राखेर व्यवस्थित गर्न खोजिएको थियो, तर त्यहाँ खाना दिने, सरसफाइ गर्ने मानिसहरुको एउटै टिमले सबैतिर काम गर्छन्। राति खुल्ला छाड्न भएन ताल्चा लगाउनु पर्यो, यही क्रममा कोरोना सरेको हुनसक्छ’, महतोले भनिन्।
कारागारमा कोरोना संक्रमण भएका तथा नभएकाहरुलाई छुट्टाछुट्टै राखिए पनि ठाउँ साँघुरो हुँदा भौतिक दुरी कायम गर्न भने महतोको भनाइ छ। ‘कारागारको भीड आजको भोलि व्यवस्थापन गर्न सकिने अवस्था छैन, पुर्पक्षका लागि थुनामा रहेकालाई अन्यत्र पठाउने अवस्था नरहे पनि जेल चलान भइसकेका केहीलाई नजिकैका अन्य ठूला कारागारमा सिफ्ट गर्न सके केही सहज हुन्थ्यो कि भन्ने छ,’ उनले भनिन्।
यसका अलावा कारागारसँगै जोडिएको जिल्ला प्रशासन कार्यालयको पुरानो भवनमा मजबुत आइसोलेसन बनाएर संक्रमितहरुको व्यवस्थापन गर्ने गरी प्रशासनसँग समन्वय गरेर काम अगाडि बढाइएको जिल्ला कारागारले जनाएको छ।
के भन्छ प्रशासन?
जिल्ला प्रशासन कार्यालय सिरहा तथा प्रमुख जिल्ला अधिकारी प्रदीपराज कँणेल आफैं हरेक दिन संक्रमितको सम्पर्कमा रहेको कार्यालयले जनाएको छ।
संक्रमितहरुका लागि आवश्यक स्वास्थ्य सामग्री तथा स्वास्थ्य टोलीसमेत खटाइएको प्रशासकीय अधिकृत चेतन अधिकारीले बताए।
उनकाअनुसार कारागारसँगै जोडिएको जिल्ला प्रशासन कार्यालयको पुरानो भवनमा ग्रिलसहितको आइसोलेसन बनाएर लक्षण देखिएका संक्रमित राख्ने तयारी भइरहेको छ।
‘कैदीबन्दीलाई जथाभावी राख्ने कुरा आउँदैन। जसले गर्दा त्यो भवनमा ग्रिलहरु राखेर मजबुत तरिकाले आइसोलेसन बनाउने तयारी गरेका छौँ। अबको केही दिनमा नै हामीले २ वटा आइसीयु वार्ड पनि राख्छौँ’, उनले नेपाल लाईभसँग भने।
आइतबारसम्म कारागारमा रहेका सबै संक्रमितहरुको अवस्था सामान्य रहेको कार्यालयले जनाएको छ।
शनिबारसम्म कारागारमा रहेका २ बालबालिकासहित ५ सय ९९ कैदीबन्दी मध्ये ९ जनाले संविधान दिवसको अवसरमा माफी पाएका छन् । हाल कारागारमा आमासँग आएका २ आश्रित बालबालिका र ५ सय ८८ कैदीबन्दी छन्।
जसमध्ये कोरोना संक्रमण पुष्टि भएका ५०७ कैदीबन्दी मध्ये ७ जना निको भइसकेको निमित्त जेलर महतोले बताइन् । उनकाअनुसार संक्रमितमध्ये केहीमा सुरुको अवस्थामा ज्वरो देखिए पनि अहिले ज्वरो निको भइसकेको छ। केहीमा भने सामान्य रुघाखोकी देखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
