काठमाडौं- सरकारले बंगलादेश सरकारसँग सापटी मागेको ५० हजार मेट्रिक टन युरिया मलको ढुवानी मोडालिटीबारे अन्यौलता देखिएको छ। नेपाललाई मल दिन बंगलादेश सहमत भएपनि ढुवानी कसरी गर्ने भन्ने विषय अझै टुंगिन सकेको छैन।
कृषि तथा पशुपन्छी विकास मन्त्रालयका प्रवक्ता डा हरिबहादुर केसीका अनुसार उक्त मल ढुवानी गर्नका लागि कृषि सामग्री कम्पनीलाई जिम्मा दिने र टेण्डरलगायतका प्रकृया शुरु गर्नका लागि स्वीकृति दिने प्रस्ताव मन्त्रिपरिषदमा पठाउने तयारी मन्त्रालयले गरेको छ। ‘बंगलादेशले चटगाउँबाट मल दिने भनेको छ। बाँकी ढुवानीको प्रकृया यतैबाट गर्नुपर्ने भएको छ। अहिलेसम्मको कुरा कृषि सामग्री कम्पनीलाई जिम्मा दिने भन्ने छ’ प्रवक्ता केसीले भने।
‘मन्त्रालयले प्रस्ताव मन्त्रिपरिषदमा लगेर स्वीकृति पाएपछि कृषि सामग्री कम्पनीले ढुवानीका लागि टेण्डर विज्ञापन गर्न लागिएको हो।
प्रवक्ता केसीका अनुसार आइतबार बसेको मन्त्रिपरिषदमा भने उक्त प्रस्ताव लगिएको छैन। ‘आज मन्त्रालयले तयारी गर्दै थियो। आजको मन्त्रिपरिषद बैठकमा प्रस्ताव गएको छैन। आउँदो बैठकले निर्णय गर्छ होला’ उनले भने। टेण्डर प्रकृयामा जाँदा मल ढुवानीमा बढी समय लाग्ने कुरालाई मध्येनजर गर्दै छोटो अवधिको टेण्डरका लागि सूचना जारी गर्ने सकिने केसीको भनाइ छ। विरगंज, विराटनगर र भैरहवा नाकाबाट नेपाल आउनेगरी कृषि सामग्री कम्पनीलाई नै ढुवानीको जिम्मा दिने तयारी सरकारको छ।
सापटीमा मल ल्याउन सरकारले सहमति गरेको गरेको करिब २ हप्ता भइसक्दा पनि मल ढुवानीको विषय भने अझै टुंगिन सकेको छैन। यसअघि बंगलादेश सरकार आफैंले मल नेपाल पुर्याइदिने र नेपालले त्यसको भाडा भुक्तानी गर्ने, नेपाल आफैंले निजी क्षेत्रलाई जिम्मा लगाएर मल ल्याउने वा सरकारी स्वामित्वका कम्पनी कृषि सामग्री कम्पनी लिमिटेड र साल्ट ट्रेडिङलाई ल्याउन दिनेलगायतका मोडालिटीमा छलफल भएपनि अन्तिम टुंगो भने लाग्न सकेको थिएन। तर प्रवक्ता केसीले भने कृषि सामग्री कम्पनीलाई जिम्मा दिने प्रस्ताव तयार गरी मन्त्रिपरिषदमा पठाउन लागिएको नेपाल लाइभलाई जानकारी दिए।
समयमा मल नल्याउने दुई कम्पनी शैलुङ इन्टरप्राइजेज र होनिको मल्टिपलसँगको ठेक्का सम्झौता खारेजबारे जानकारी गराउन भदौ २१ गते कृषि तथा पशुपन्छी विकास मन्त्रालयमा आयोजित कार्यक्रममा मन्त्री घनश्याम भुसालले १५ दिनभित्र बंगलादेशबाट नेपालमा मल आइसक्ने बताएका थिए। भुसालले उक्त अभिव्यक्ति दिएको १ हप्ताभन्दा बढी समय बितिसकेपनि मल कसरी ल्याउने भन्ने विषय टुंगिइसकेको छैन।
भदौ २१ गते मन्त्री भुसालले सोही दिन बंगलादेशस्थित नेपाली दुतावास र त्यहाँको सरकारका प्रतिनिधिसँग छलफल भइरहेको बताएका थिए। ‘हामी यहाँ कुराकानी गरिरहेकै बेला बंगलादेशमा हाम्रो दुतावास र त्यहाँको सरकारका प्रतिनिधिहरुबीच मल ढुवानी कसरी गर्ने भनेर छलफल भइरहेको छ। त्यो आजै टुंगिन्छ।’ मन्त्री भुसालले संचारकर्मीहरुसँगको कुराकानीमा भनेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
