काठमाडौं–चक्रपथ विस्तारअन्तर्गत दोस्रो खण्ड कलंकी–धोवीखोला विस्तारको काम ढिलाइ भएको छ। कोरोना भाइरसको संक्रमणका कारण चिनियाँ पक्षले चासो नदिएपछि निर्माण अघि बढ्न सकेको छैन।
गत चैतमै साइट क्लियर करिब सकिएको भए पनि काम सुरु हुन सकेको छैन।
चक्रपथको दोस्रो चरण (कलंकीदेखि चाबहिलसम्म) विस्तारका लागि निर्माणस्थलमा रहेका संरचना हटाउने काम करिब सकिएको विस्तार आयोजनाले जनाएको छ। सडक विस्तार गरिने क्षेत्रमा रहेका केही घर हटाउनेबाहेक यहाँका अरू संरचना हटाउने काम सकिएको छ। आयोजनाले गर्नुपर्ने साइट क्लियरको काम २ सय ४४ मिटर मात्र बाँकी रहेको चक्रपथ विस्तार आयोजना प्रमुख अमृतमणि रिमालले बताए।
‘साइट खाली हुन बाँकी २ सय ४४ मिटरमात्र हो। अन्यत्र विस्तारका लागि योग्य भइसकेको छ,’ उनले भने, ‘सडक विस्तारको काम चीन सरकारले गर्ने हो। पछिल्लो समय चिनियाँ पक्षको सक्रियता कम भएकाले निर्माणको काम अघि बढ्न नसकेको हो।’ यसमा कोरोना भाइरसको संक्रमण बढ्नु कारक रहेको हुनसक्छ।
सडक निर्माणस्थलमा रहेका खानेपानीको पाइप, ढल, विद्युतको पोललगायतका संरचना हटाइसकिएको छ। त्यस्तै सो सडकमा रहेका २ हजार एक सय रुख काटिएको छ। सडकको मुख्य भागबाट दुवैतर्फ ३१–३१ मिटरभित्र पर्ने केही घर हटाउन बाँकी रहेको आयोजनाको भनाइ छ। आयोजनाले महाराजगञ्ज क्षेत्रमा २० घर हटाउनुपर्ने भएकाले त्यसको प्रक्रिया अघि बढाइसकेको छ। केही स्थानीयवासीले विरोध गरे पनि मुआब्जा दिइने भएकाले समस्या नहुने आयोजना प्रमुख रिमालको भनाइ छ।
उनका अनुसार सो घर भत्काउन आयोजनाले नै मूल्यांकन गरेर मुआब्जा दिने प्रक्रिया अघि बढाएको छ। कोरोना भाइरस न्यूनीकरण भएपछि नै थप काम अघि बढ्नेछ। स्वयम्भूमा रहेको एउटा स्तूपा सडकको अधिकार क्षेत्रमा रहेकाले उक्त स्तूपासमेत स्थानान्तरण गरिने उनको भनाइ छ। काठमाडौं महानगरपालिकाले सो स्तूपा सार्ने जिम्मा लिइसकेको छ।
दोस्रो खण्ड कलंकी–धोवीखोला ११ दशमलव ६ किलोमिटर सडकको विस्तारका लागि निर्माणस्थल काम गर्न योग्य भइसकेको छ। चिनियाँले यसअघि नै सडक निर्माणको पूर्वअध्ययन गरिसकेको छ।
चक्रपथको पहिलो खण्ड कोटेश्वदेखि कलंकीसम्म विस्तार चीन सरकारले नै गरेको हो। २०७१ मा सुरु भएको सडक निर्माण २०७२ मा आएको भूकम्प र त्यसपछिको नाकाबन्दीले गर्दा केही समय निर्माण रोकिएको थियो। विभिन्न अवरोधका कारण सडक निर्धारित अवधिभन्दा केही ढिलो सम्पन्न भएको थियो। चीन सरकारले २०७५ मा करिब १० किलोमिटरको कोटेश्वर–कलंकी खण्ड सरकारलाई हस्तारन्तरण गरेको थियो।
चक्रपथ पहिलो खण्डमा देखिएको समस्या दोस्रो खण्डमा नदोहोरियोस् भनेर चीन सरकारले निर्माण सुरु गर्नु पहिले नै निर्माणस्थल खाली हुनुपर्ने सर्त राखेको थियो। महाराजगञ्जको २ सय ४४ मिटरमा साइट क्लियर नभएकाले पनि चीन सरकारले काम नथालेको हुनसक्ने जनाइएको छ।
कोटेश्वर–कलंकी खण्डमा सडक विभागले निर्माण गर्नुपर्ने सर्भिस ट्र्याक हालसम्म पनि बन्न सकेको छैन। चीन सरकारले ८ लेनको मुख्य सडक निर्माण गर्ने र सडकको दुवैतिर सर्भिस ट्र्याक निर्माण भने नेपाल सरकारले गर्नुपर्ने छ। कलंकी धोवीखोला खण्डमा पनि त्यस्तो ट्र्याक सरकारले बनाउने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751372795.jpg)
-1751267101.jpg)
-1751273553.jpg)
-1749826086.png)
