ऐन महर र रञ्जित तामाङ
काठमाडौं-सत्तारुढ दल नेपाल कम्युनिस्ट पार्टीको भातृ संगठन अनेरास्ववियुमा विवाद चर्किएको छ। संयोजक ऐन महर र सहसंयोजक रञ्जित तामाङपक्षीय विवादको लप्कोले संगठनलाई भित्रभित्रै सल्काइरहेको छ।
गुटको भेला र विज्ञप्ति निकाल्नेबाट सुरु भएको संगठनको विवाद अहिले उत्कर्षमा पुगेको छ। संगठन एक भए पनि अध्यक्ष केपी शर्मा ओली पक्षका विद्यार्थी नेताले अर्का अध्यक्ष पुष्पकमल दाहाल ‘प्रचण्ड’ र वरिष्ठ नेता माधवकुमार नेपालपक्षीय विद्यार्थी नेतालाई थाहै नदिई भेला गर्न थालेपछि विवाद सतहमा देखा परेको हो।
संयोजक महरले विद्यार्थी संगठनलाई सबैको सहमति र समझदारीमा अघि बढाउनु पर्नेमा आफूखुसी गुटको भेला गर्दै संगठनलाई विभाजित गर्न थालेको भन्दै अन्य पदाधिकारीहरुले विरोध जनाएपछि तामाङले विज्ञप्ति निकालेर महरको आलोचना गरेका थिए।
पार्टी एकतापछि एक भएको भनिए पनि संगठन दुई खेमामा विभाजित नै थियो, जुन यस पटक स्पष्ट सतहमा देखिने गरी छताछुल्ल भयो। विवादकै कारण विद्यार्थी संगठनको एकताले अझै पूर्णता पाएको छैन। अहिलेसम्म केन्द्रमा संयोजक, सहसंयोजक र केन्द्रीय कमिटीमात्रै टुंगो लागेको छ।
विद्यार्थी संगठनको ९ सदस्यीय सचिवालय, प्रदेश कमिटी, जिल्ला कमिटी र विश्वविद्यालय तहका इकाईको एकताले पूर्णता पाएका छैनन्। विद्यार्थी संगठनका नेता शीर्ष नेताका गुटको छहारीमा बसेर एकले अर्कोलाई आलोचना गर्न थालेका छन्।
संगठनमा विवाद भए पनि गत असार ८ गतेसम्म संयोजक महर र सहसंयोजक तामाङले संयुक्त रुपमा विज्ञप्ति निकालेका थिए । विवादकै बीच महरले आफ्ना पक्षका नेतालाई बोलाएर बागबजारको एक होटलमा भेला गरेपछि संगठनमा विवाद चर्किएको तामाङपक्षीय नेताको आरोप छ।
आफ्नाविरुद्ध योजना बनाउन होटलका कोठामा ‘षड्यन्त्र’ गर्न थालेपछि विवादको श्रृंखला सुरु भएको भएको तामाङपक्षीय नेताको दाबी छ । तर, महरपक्षीय नेता आरसी लामिछानेले गुटको भेला नभई विद्यार्थी नेतालाई राखेर एकताका विषयमा छलफल गरिएको स्पष्ट पारे।
विवादकै बीच महरले गुटका भेलाहरु गर्न थालेको भन्दै तामाङले त्यसको काउन्टरमा साउन ९ गते एकल विज्ञप्ति जारी गरे। त्यहीँबाट संयोजक र सहयोसंयोजकले संगठनमा परामर्श नै नगरी एकलौटी ढंगले विज्ञप्ति जारी गर्न थालेका थिए। अहिलेसम्म महरले गत साउन २५, २७ र भदौ ४ मा गरी तीन विज्ञप्ति एकलौटी रुपमा जारी गरेका छन् भने तामाङले महरलाई काउन्टर दिन साउन ९, २० र भदौ १२ मा गरी तीन पटक एकलौटी विज्ञप्ति जारी गरे।
तर, विवादले झनै उग्र रुप त्यति बेला लियो, जब तामाङले गत शुक्रबार शिक्षामन्त्री गिरिराजमणि पोखरेललाई २१ बुँदे ज्ञापनपत्र बुझाए। त्यसपछि संगठनका ओलीपक्षीय नेताहरुले सामाजिक सञ्जालमा तामाङको खरो आलोचना गरे। तामाङले ज्ञापनपत्र बुझाएको विषयलाई लिएर महर स्वयंले कुनै प्रतिक्रिया जनाएका छैनन्।
तर, महरको फेसबुकवालमा भने तामाङको आलोचनामा लेखिएका स्टाटसहरु देख्न सकिन्छ। यसलाई समेत तामाङपक्षीय विद्यार्थी नेताहरुले भने महरको षडयन्त्रका रुपमा बुझेका छन्। महरपक्षीय नेताहरुले तामाङलाई कारबाही गर्नु पर्ने प्रतिक्रिया दिएका छन्।
तर, तामाङले भने आफूले संगठनको पक्षमा काम गर्दैगर्दा, विद्यार्थीको अधिकारको पक्षमा शिक्षामन्त्रीसँग माग राख्दा कारबाही गर्ने धम्की दिइन्छ भने आफू त्यसलाई प्रतिकार गर्न तयार रहेको बताए । उनले भने, ‘यो सवाल ममाथि कारबाही गर्ने अथवा नगर्ने भन्ने विषयसँग मात्रै जोडिएकै छैन, हामी विद्यार्थी नेताहरु र संगठनले लिने पहलकदमीसँग पनि जोडिएको छ ।’
उनले अनेरास्ववियू सत्ताको ताबेदारी गर्ने संगठन नभएको भन्दै विद्यार्थीको हकहितका लागि लड्न आफू तयार रहेको बताए । उनले थपे, ‘मैले वर्तमानको मात्रै कुरा गरेको होइन । तपाईंले इतिहासतिर फर्केर हेर्नु भयो भने यो सधै विद्रोही संगठनका रुपमा बागी आवाज बोल्ने संगठनका रुपमा दर्ज छ । त्यसैले अहिले पनि रुझेको बिरालो जस्तो बनेर बाँच्न सक्दैन ।’ तामाङले संयोजक बेलैमा सच्चिनुपर्ने समेत स्पष्ट पारे।
यस विषयमा महरसँग जानकारी लिनका लागि नेपाल लाईभले पटक–पटक फोन गर्दा उनको फोन उठेन । तर, उनी निकटमानिने अनेरास्ववियूका नेता आरसी लामिछानेले सहसंयोजकले उत्तेजित ढंगले एक्लौटी विज्ञप्ति निकालेपछि विवाद उत्कर्षमा पुगेको बताए। उनले भने, ‘पार्टी शीर्ष नेतृत्वको बाछिटा विद्यार्थी संगठनमा पनि परेको सत्य हो। यसको समाधान सहमति गर्दै दुवै पक्ष अघि बढ्नुको विकल्प छैन।’
अनेरास्ववियूका अर्का नेता जीपी मैनालीले भने यो विवाद कुनै सैद्धान्तिक र वैचारिक नभएको भन्दै यसले आम विद्यार्थीलाई खासै प्रभावित नपार्ने जिकिर गरे। ‘समाजमा अनेकौँ ज्वलन्त मुद्धा जिउँदा हुँदाहुँदै विद्यार्थी नेताहरु ती मुद्धामा बोल्न छाडेर विज्ञप्ति कसले निकाल्यो भनेर तुजुक देखाउनु आफैँमा हाँस्यास्पद हो।,’ उनले भने, ‘यो समय विवादमा रुमल्लिएर अघि बढ्नेभन्दा पनि मिलेर संघर्षमा जानुको विकल्प छैन ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1792052881.png)
-1786602170.png)
