कोरोना अपडेट

'हटस्पट' दक्षिणकाली : कालीमाटी आवतजावत गर्नेबाट कोरोना फैलिएको अनुमान

निर्मला घिमिरे सोमबार, भदौ १५, २०७७ २१:५५

काठमाडौं- पछिल्लो दुई सातादेखि कोरोना फैलिन थालेको दक्षिणकाली नगरपलिकामा आइतबारसम्म १६ जनामा कोरोना देखिएको छ। कोरोना संक्रमितहरु अधिकांश व्यापारी, सुरक्षाकर्मी, स्वास्थ्यकर्मी तथा विभिन्न कार्यालयमा कार्यरत कर्मचारीहरु रहेको नगरपालिकाले जनाएको छ।

उपत्यकामा व्यापक रूपमा कोरोना फैलिएको र तरकारी तथा फलफूलका लागि कालीमाटी तरकारी बजारमा आवतजावत गर्दा नगरपालिकामा कोरोना फैलिएको दक्षिणकाली नगरपालिकाका मेयर मोहन बस्नेत बताउँछन्।

‘सबैतिर कोरोना फैलिसकेको अवस्थामा पनि हाम्रो दक्षिणकाली नगरपालिकामा कोरोना फैलिसकेको थिएन। कोरोना अत्यधिक फैलिएको काठमाडौं उपत्यका नजिक भएका कारणले पनि दुई सातायता भने दक्षिणकाली नगरपालिकामा कोरोना प्रवेश गरेको छ। विशेष गरी कालीमाटीमा लिन तथा लैजान आवतजावत गर्दा कोरोना दक्षिणकालीमा आइपुगेको अनुमान गरिएको छ,’ मेयर बस्नेतले नेपाल लाइभसँग भने।

दक्षिणकालीमा उत्पादन भएका फलफूल तथा तरकारी बेच्न आउने ठाउँ कालीमाटी भएको र आवश्यक तरकारी लिन पनि कालीमाटी जानुपर्ने भएकाले कालीमाटीबाट नै दक्षिणकालीमा कोरोना छिरेको उनको भनाइ छ।

संक्रमितको अवस्था सामान्य
नगरपालिकामा आइतबारसम्म २ जना कोरोना संक्रमणमुक्त भएर घर फर्किसकेका छन्। अन्य सबै संक्रमितहरुको अवस्था पनि सामान्य रहेको बताइएको छ।

‘सबै संक्रमितको अवस्था सामान्य छ। उहाँहरु हट्टाकट्टा र फूर्तिलो नै हुनुहुन्छ। त्यस्तो जटिल समस्या देखिएको छैन,’ मेयर बस्नेतले भने।

सकेसम्म नगरपालिकामा कोरोना संक्रमण नै हुन नदिने गरी आफूहरु खटेको तर खट्दा खट्दै पनि नगरपालिकामा संक्रमण सुरु भएपछि रोकथाम तथा नियन्त्रणमा सक्दो पहल गरिरहेको मेयर बस्नेत बताउँछन्। ‘हाम्रो नगरपालिका, वडाहरु, यहाँका जानकार व्यक्तिहरु, राजनीतिक दल सबैको साथ सहयोगले सकेसम्म संक्रमण नै हुन नदिने प्रकृयामा हामी आगाडि बढेका थियौँ। तर संक्रमण सुरु भएको छ। अब कोरोना संक्रमण रोकथाम तथा नियन्त्रणको सक्दो पहल गर्नुपर्ने भएकाले हामी सोहीअनुसार काम गरिरहेका छौँ,’ उनले भने।

सजगता अपनाउनका लागि जनचेतनामूलक कार्यक्रमहरुलाई निरन्तरता दिएको नगरपालिकाले जनाएको छ। त्यस्तै कुनै स्थानमा कोरोना देखियो भने त्यो ठाउँ सिल गरेर कन्ट्याक्ट ट्रेसिङ तथा पिसीआर परीक्षणको दायरालाई विस्तार गरिएको उल्लेख गरिएको छ।

नगरपालिकामा २० बेडको आइसोलेसन
नगरपालिकाले कोरोना संक्रमितलाई राख्नका लागि प्राथमिक स्वास्थ्यकेन्द्र चाल्नाखेलमा २० बेडको आइसोलेसन तयार गरेको छ।

आइसोलेसनमा हाल ३ जना संक्रमित रहेको नगरपालिकाले जनाएको छ। बाँकी संक्रमित विभिन्न कार्यालयका कर्मचारी, तथा सुरक्षाकर्मीहरु पनि रहेकाले उनीहरु कार्यालयको आइसोलेसन तथा सरकारले तोकेको अन्य आइसोलेसनमा रहेको उल्लेख गरिएको छ।

‘आइसोलेसनमा बस्दा पनि घरमै बसेजस्तो हुने वातावरण हामीले मिलाएका छौँ,’ मेयर बस्नेत भन्छन्, ‘२० बेडको आइसोलेसनले पनि अपुग हुने अवस्था आयो भने हामी थप व्यवस्थापन गर्छौं।’

नगरपालिकाले पनि कोरोना रोकथाम तथा नियन्त्रण र सचेतना अभिवृद्धिमा सक्दो पहल गरिरहेको मेयर बस्नेतले बताए।

कोरोना रोकथाममा वित्तीय स्रोतको अभाव देखाएर पन्छिनेभन्दा पनि भएको स्रोतले पुर्‍याएर नगरवासीहरुलाई सुरक्षित बनाउने आफ्नो दायित्व भएको उनको भनाइ छ।

‘पैसालाई पर राखेर पनि आफ्नो कर्तव्य निर्वाह गर्नुपर्ने बेला हो यो। धेरै पैसा खर्च गरेर मात्रै कोरोना रोकथाम तथा नियन्त्रण हुने होइन,' उनी भन्छन्, ‘नगरवासीहरुले पनि सोहीअनुसार सजगता अपनाएर अघि बढ्न सके जोखिम कम हुन्छ।’