हाम्रो नगरपालिकामा शुक्रबारसम्म कोरोना संक्रमितको संख्या ५० पुगेको छ। शनिबारको तथ्यांक आउन बाँकी छ। संक्रमितहरूमध्ये अधिकांश चाहिँ प्रभावित जिल्लाबाट आएकाहरू छन्।
प्रभावित जिल्लाबाट आएर कोठा भाडामा बस्ने भएकाले वडा नम्बर ११, १२, १३ र १४ मा कोरोना बढी संक्रमण देखिएको छ। यस्ता जनसम्पर्क बढी भएका वा प्रभावित जिल्लाबाट आएकाहरुका एकै परिवारका ४/५ जनासम्मलाई पनि कोरोना संक्रमण देखिएको छ।
संक्रमितको सम्पर्कमा आएका ४ जना नगरपालिकाका स्वास्थ्यकर्मीमा पनि कोरोना देखिएको छ। स्वास्थ्यकर्मीहरुमा कोरोना देखिएपछि हामीले उनीहरुको सम्पर्कमा आएकाका परिवारको पनि पिसिआर गरायौं। पिसिआर गराउँदा परिवारमा पनि कोरोना देखिएको छ।
हामीले थप १ सय ३० जनाको पिसिआर परीक्षण गराएका छौं। उनीहरुको रिपोर्ट आज (शनिबार) बेलुकासम्म आइपुग्ला। अहिलेसम्म नगरपालिकाले कन्ट्याक्ट ट्रेसिङमार्फत् पिसिआर गराउँदा संक्रमितको सम्पर्कमा आएका समुदायका अधिकांश व्यक्तिमा पिसिआर नेगेटिभ देखिएको छ। परिवारमा भने धेरैजसोलाई कोरोना पोजिटिभ देखिएको छ।
रिपोर्ट हेर्दा पनि अहिले जताततै समुदायभरि कोरोना फैलिसकेको भनिहाल्ने अवस्था छैन। तर अहिले नियन्त्रणमा नजुट्ने हो भने यसले भयावह रुप लिन सक्छ। जसले गर्दा हामीले चन्द्रागिरी नगरपालिका पुरै सिल गरेका छौं। भदौ १० गतेसम्म अत्यावश्यक बाहेकका सहकारी, उद्योगलगायत व्यवसाय बन्द गरिएको छ। परिस्थिति हेरेर यो समयलाई थप गर्नुपर्ने अवस्था पनि आउन सक्छ। सरकारले पनि उपत्यकामा निषेधाज्ञा जारी गरिसकेको छ।
नगरपालिकाले अत्यावश्यक खाद्यान्न, तरकारी, खानेपानी, ग्यासलगायतका पसलहरुका लागि पनि निश्चित समय तोकिदिएको छ। सरकारले यस्ता पसलहरु दिनभर खुल्ला गर्न दिने भनेपनि यसबाट थप जोखिम हुने देखिएपछि हामीले बिहान ५ बजेदेखि बिहान ८ बजेसम्ममात्रै यी पसलहरु खोल्न पाउने व्यवस्था गरेका छौं।
कोरोना रोकथाम तथा नियन्त्रणका लागि भौतिक दूरीसँगै पिसिआरको दायरा फराकिलो बनाएका छौं। फ्रन्टलाइनमा खट्ने पसलेहरू, सरसफाइ कर्मचारी, स्वास्थ्यकर्मी तथा जनप्रतिनिधिहरूलगायत संक्रमितको सम्पर्कमा आएका नगरबासीहरुको पिसिआर क्रमशः गराउने हाम्रो योजना छ। कोरोनासँग मिल्दोजुल्दो लक्षण देखिएकाहरुको पिसिआर गराउने क्रम जारी छ।
कोरोना संक्रमितहरुका लागि नगरपालिकामा दुईवटा अस्पताल छन्। एपिएफ हस्पिटल बलम्बुमा र मनमोहन हस्पिटल दहचोकमा छ। मनमोहन हस्पिटलमा साढे ३ सयदेखि ५ सयसम्म आइसोलेसन बेड क्षमता छ। एपिएफ अस्पतालमा साढे २ सय बेड छ। भनेपछि हामीसँग ७ सयभन्दा बढी बेड नगरपालिकामा आइसोलेसनका लागि छ।
नगरपालिकाभित्रका संक्रमितहरुलाई पहिलो प्राथमिकतामा राखिनुपर्ने गरी हामीले यी दुवै अस्पतालसँग सहमति गरेका छौं। सामान्य अवस्था भएका संक्रमितहरुका लागि त हामीले होम क्वारेन्टाइनभन्दा होम आइसोलेसनलाई नै प्राथमिकता दिएका छौं।
धेरैजसो संक्रमितहरू होम आइसोलेसनमा छन्। होम आइसोलेसनमा बस्न सम्भव नभएकाहरुका लागि नगरपालिकाले छुट्टै व्यवस्था गरेको छ। होटलको समेत व्यवस्था गरेको छ। त्यहाँ अहिले १६ जना बसिराखेका छन्।
नगरपालिकाले तोकेका अन्य क्वारेन्टाइन तथा नगरस्तरीय अस्पताल पनि छ। आपत् पर्यो भने त्यहाँ पनि राख्ने व्यवस्था गरिएको छ।
त्यसलाई पनि अब नगरपालिकाले आइसोलेसन सेन्टर बनाउने भन्ने कुरा पनि आएको छ। तर नगरपालिकामा अहिलेसम्म सबै संक्रमितको अवस्था सामान्य छ।
नगरपालिकामै ७ सय बेड क्षमताका दुईवटा अस्पताल भएकाले आत्तिहाल्नुपर्ने अवस्था पनि आएको छैन। तत्काल थप आइसोलेसनका लागि छुट्टै खर्च पनि गरिरहन आवश्यक देखिएको छैन।
भोलि बिरामीको चाप बढ्यो अस्पतालले थेग्न नसक्ने अवस्था आयो भने हामीले आपतकालीन अवस्थाका लागि व्यवस्था गर्ने योजना बनाएका छौं। सोच्दै नसोचेको महामारीका बाबजुद वित्तीय स्रोतको अभाव त स्वभाविक नै हो।
अहिले निश्चित योजना तथा कार्यक्रममा छुट्याएको बजेटको रकमलाई नै कोरोना रोकथाम तथा नियन्त्रणका लागि डाइभर्ट गर्नुपरेको अवस्था छ। नगरपालिकाको आफ्नो आन्तरिक स्रोतबाट साढे २ करोडभन्दा बढी रकम कोभिड नियन्त्रणका लागि खर्च भइसकेको छ। नेपाल सरकारबाट पनि केही बजेट प्राप्त भएको छ। हामीले क्षमताले भ्याएसम्म कोरोना नियन्त्रणका लागि काम गरिरहेका छौं।
(चन्द्रागिरि नगरपालिकाका मेयर गिरीसँग नेपाल लाइभकर्मी निर्मला घिमिरेले गरेको संवादमा आधारित)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
