सिओल- कोरियामा दोस्रो चरणको कोरोना फैलिने त्रास बढिरहेको छ। राजधानीको साराङ जेल नामक चर्चबाट गत हप्तादेखि सुरु भएको कोरोनाको लहरले महामारीको रुप लिने संकेत गरेको छ। चर्चमा कति सदस्यहरु आबद्ध छन् भन्ने यकीन तथ्याङ्क प्राप्त गर्न हालसम्म पनि सरकार असफल छ।
स्वास्थ्य अधिकारीहरुले पछिल्लो कोरोना भाइरस फैलिएको साराङ जेल चर्चका मण्डलीको सूची तयार पार्न शुक्रबारसम्म पनि असफल भएका छन्। चर्चले सरकारलाई उपलब्ध गराएको सूचीमा ९ सय जनामात्र चर्चका सदस्यहरु रहेको उल्लेख छ।
तर उक्त तथ्यांक गलत भएको भन्दै आधिकारीक तथ्यांक लिन सरकारका अधिकारीहरु चर्चको मुख्यालयमा पुगेका थिए। बिहीबार साँझ खोज तलासको सरकारी वारेण्ट बोकेर प्रहरीसँग चर्च पुगेका अधिकारीहरुलाई चर्चभित्र छिर्न दिइएन।
१० घण्टासम्मको प्रयासका बाबजुद पनि चर्चभित्र प्रवेश गर्न नसकेपछि सरकारी अधिकारीहरु रित्तो हात फर्किएका थिए। उक्त चर्चका पास्चर जुन ख्वाङ ह्यून,जसले शनिबार भएको वृहत सरकार विरोधी आन्दोलनको नेतृत्व गरेका थिए। मध्य सिओलमा भएको उक्त आन्दोलनमा कम्तिमा २० हजारको सहभागिता रहेको प्रहरीको अनुमान छ।
आन्दोलनमा चर्चका अगुवा र उनिहरुका राजनीतिक कार्यकर्ताहरु देशभरीका गाउँ गाउँबाट राजधानी सिओल पुगेका थिए। यो समूहमा उक्त चर्चका कतिले भाग लिएका थिए भन्ने यकीन छैन। तर सोही आन्दोनमा सहभागी भएका पास्चर जुनलाई भने कोरोना पोजेटिभ देखिएको छ।
सरकारी अधिकारीहरु चर्चको शाखा शङबोकको उत्तरी क्षेत्रमा पर्ने एक चर्चमा बिहीबार साँझ ५ बजेतिर पुगेर सदस्यहरुको तथ्यांक संकलन गर्ने प्रयास गरे पनि सुरुमा प्रवेश गर्न दिइएन। बिहान पनि उनिहरु चर्चमा प्रवेश गर्न असफल भएर फर्किएका थिए। बल प्रयोग गरेर साँझ ८ बजे चर्चमा प्रवेश गरेर बिहान ३ बजेसम्म खोजतलास गरिएको थियो।
चर्चमा खोजतलास भइरहेका बेला बाहिर ३० भन्दा बढी चर्च समर्थकहरु थिए। सोही समयमा केही युटुबरहरुले प्रहरीले चर्च भत्काउन लागेको भन्दै गलत भिडियो राखेर चर्च समर्थकहरुलाई आतङ्कीत बनाएका थिए।
चर्चका सदस्यहरु ९ सयमात्र भएको विवरण प्राप्त भए पनि त्यो सत्य नभएको सरकारी अधिकारीहरुको भनाइ छ। तर चर्चकी वकिलले भने चर्चले आधिकारीक विवरण पेश गर्दा पनि सरकाले बल प्रयोग गरेको आरोप लगाएकी छन्।
चर्चसँग परिचित एक व्यक्तिका अनुसार चर्चका सदस्यहरुको जम्मा संख्या २ देखि ३ हजारसम्म्म रहेको हुनसक्ने अनुमान छ। तर चर्चले पठाएको एउटा म्यासेज ४ हजार जनालाई पठाइएको पाइएको छ।
शुक्रबार बिहानसम्ममा चर्चको सम्पर्कमा आएका ७ सय ३२ जनामा कोरोना संक्रमण भएको पुष्टि भइसकेको छ। उक्त चर्चमा सरकारका प्रतिपक्षी दलहरुका महत्वपूर्ण बैठकहरु पनि भइरहने भएकाले कतिको आवतजावत थियो भन्ने यकीन नै छैन।
उक्त चर्चबाट कोरोना फैलिनुभन्दा पहिलेका केसमा हरेक कोरोना संक्रमितको लिङ्क सरकारसँग हुने गरेपनि अहिले भने कहाँ कहाँ कोरोना संक्रमितहरु पुगे भन्ने आँकडा छैन। त्यसैले पनि कोरियामा कोरोना संक्रमणको दोस्रो महामारी जटिल बन्ने देखिन्छ।
कोरियामा शुक्रबारमात्रै ३ सय २४ जनामा कोरोना पुष्टि भइसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
