साउन ७ मा लकडाउन खुकुल्याइएपछि ललितपुरको एक सरकारी कार्यालयमा देखिएको भिड।
ललितपुर– केही दिनदेखि ललितपुर महानगरपालिकामा कोरोना संक्रमणले भयावह रुप लिन थालेको छ। महानगरका २९ वडामध्ये ३ वटा वडा बाहेक बाँकी २६ वडा वडामा कोरोना फैलिसकेको पाइएको छ।
‘ललितपुर महानगरपालिकामा कोरोनाले भयावह रुप लिन थालेको छ। वडा नम्बर १२, १६ र २९ मा कोरोना देखिएको छैन। बाँकी सबै वडामा फैलिसकेको छ’ मेयर चिरिबाबु महर्जनले भने।
१ को ज्यान गयो २ सयमा कोरोना पुष्टि
बुधबारसम्म ललितपुर महानगरपालिकामा कोरोनाका कारण १ जनाको ज्यान गएको छ भने २ सयमा कोरोना पुष्टि भएको छ। कोरोना पुष्टि भएकाहरु अधिकांश प्रभावित क्षेत्रबाट आएकाहरु छन्।
त्यहीँका केही स्थानीय वासिहरुमा समेत कोरोना फैलिसकेको महानगरपालिकाले जनाएको छ।
‘अहिले त यहाँको स्थानीयमा पनि कोरोना देखिन थालेको छ। तर प्रभावित जिल्लाबाट आएकाहरु ठूलो संख्यामा कोरोना देखिएको छ’ मेयर महर्जनले नेपाल लाइभसँग भने।
वडा नम्बर ३, १४ र २४ मा कोरोना भयावह
महानगरपालिकाका अनुसार सबैभन्दा बढी कोरोना देखिएका वडा ३, १४ र २५ छन्। वडा नम्बर ३ स्थित सानेपा, धोविघाटलगायत स्थानमा कोरोना अत्यधिक देखिएको मेयर चिरीबाबु महर्जनले बताए।
पुलचोकमा पनि एकादुई व्यक्तिमा कोरोना देखिएको उनले जानकारी दिए। नख्खुटोलमा पनि कोरोनाले भयावह रुप लिएको मेयर महर्जनको भनाइ छ।
संक्रमितले भरियो अस्पताल
देशैभरिका कोरोना संक्रमितहरुको उपचार गर्दै आएको पाटन अस्पतालको बेड भरिभराउ भएको छ। ललितपुरको बिरामीहरू मुख्यतया पाटन अस्पतालमा नै राखिएको छ। अस्पतालको बेड भरिन थालेपछि पछिल्लो समय केही बिरामीहरूलाई होम आइसोलेसनमा राखिएको छ।
महानगरका अनुसार होम आइसोलेसनमा ५० संक्रमित छन्। बाँकी अस्पतालको आइसोलेसनमा रहेको महानगरपलिकाले जनाएको छ।
‘पाटन अस्पतालले अहिलेसम्म चाहीँ त्यहाँ आएको बिरामीहरुलाई बेड छैन भनेर फर्काएको छैन। बरु अन्य रोगका बिरामीहरु लिन छाडेर पनि कोरोना संक्रमितको विशेष रुपमा उपचार गरिरहेको छ’ मेयर चिरीबाबु महर्जन भन्छन्, ‘पाटन चाहीँ कोरोनाको हब अस्पताल भएका कारण सबैतिरबाट संक्रमितहरु आउने हुँदा बेड भरीभराउ भएका छन्।’
अहिले पाटन अस्पतालले अन्य बिरामीहरुको बेडलाई पनि कोरोना संक्रमितहरुका लागि आइसोलेसनमा परीणत गरेर उपचार गरिरहेको उनको भनाइ छ। तर अब भने अस्पतालको बेड क्षमता जति छ त्यो सबै भरिसकेका कारण महानगरले त्यसको विकल्प सोचेको मेयर महर्जनले बताए।
लकडाउन खुकुलो बनाउँदा फैलियो कोरोना
सरकारले जोखिमपूर्ण अवस्थामा लकडाउन खुकुलो बनाउने निर्णय गरेसँगै कोरोना समुदायमा भयावह रुपमा फैलिएको मेयर महर्जन बताउँछन्।
‘हामी काठमाडौं उपत्यकाको १८ वटै नगरपलिकाहरुले बाहिरको मान्छे पनि भित्र नल्याऊँ र भित्रको मान्छे पनि बाहिर नपठाऊँ। उपत्यकाभित्र आर्थिक गतिविधीहरु चाहीँ निरन्तरता दिइराखौँ भनेर कुरा गरिराखेका थियौं’ मेयर महर्जनले भने, ‘सोहीअनुसार राम्रोसँग कन्ट्रोल पनि भइरहेको थियो। बिचमा सरकारले लकडाउन खुकुलो बनाउँदा कोरोना फैलियो।’
वैशाख २६ गतेदेखि सरकारले लकडाउन केही खुकुलो बनाउँदै ४४ किसिमका उद्योगहरु सञ्चालन गर्न दिने घोषणा गरेसँगै बाहिर जिल्लाबाट कन्ट्रोल गर्नै नसक्ने मान्छेहरु भित्रिएकाले संक्रमण फैलनुको मुख्य कारण नै सोही रहेको मेयर महर्जन बताउँछन्।
क्वारेन्टाइनलाई आइसोलेसनमा ‘कन्भर्ट’ गर्ने तयारी
संक्रमितहरुको चाप बढेसँगै अस्पतालको बेड भरिएको छ। अस्पतालको बेड भरिएपछि महानगरले क्वारेन्टाइनलाई आइसोलेसन बनाउने तयारी गरेको छ।
‘हामीसँग प्रशस्त मात्रामा क्वारेन्टाइन छन्। ती क्वारेन्टाइन बेडलाई आइसोलेसन बनाउने तयारी गरेका छौं’ मेयर महर्जनले भने, ‘यसका लागि केही समय लाग्छ तर हामीले वडाका विभिन्न ३ स्थानका क्वारेन्टाइनलाई कम्तिमा २ सय बेड क्षमताको क्वारेन्टाइन बनाउने तयारी गरेका छौं।’
नेपाल युथ फाउण्डेशनको वडा नम्बर २७ मा त्यहाँ दुईवटा भवन, वडा नम्बर ४ बागडोलमा रहेको क्वारेन्टाइन तथा सातदोबाटोमा रहेको एउटा क्वारेन्टाइन गरेर कम्तिमा २ सय बेड क्षमताको आइसोलेसन बनाउने तयारी गरिएको महानगरले जनाएको छ।
कन्ट्याक्ट ट्रेसिङ प्रभावकारी बनाउन ५ समूह
महानगरले कोरोना रोकथाम तथा नियन्त्रणका लागि सचेतना जगाउने काम गरिरहेको छ। टोलटोलमा माइकिङ गरिरहेको जनाएको छ।
‘कन्ट्याक्ट ट्रेसिङलाई प्रभावकारी बनाउन हामीले ५ वटा समूह बनाएर खटाएका छौं। त्यो समूहले सबै वडामा काम गरिरहेको छ’ मेयर महर्जन भन्छन्।
महानगरको स्वास्थ्य टोली हरेक दिन संक्रमितहरुको सम्पर्कमा रहेको मेयर महर्जनले बताए। मेयर चिरिबाबु महर्जन् भन्छन्, ‘अहिले संक्रमितहरु यत्रतत्र सर्वत्र नै छन्। जसले गर्दा अत्यावश्यक काम बाहेक घरबाहिर ननिस्कन हामीले महानगरबासीहरुलाई सचेत गराइरहेका छौं।’ सरकारले पनि बिहीबारदेखि लागू हुनेगरी निषेधाज्ञा जारी गरेकाले केहीहदसम्म संक्रमण कम हुने अपेक्षा उनको छ।
तस्बिर : खोज खबर
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752324214.png)
-1752322624.jpg)
-1752043710.jpg)
-1752245592.jpg)
-1749826086.png)
