काठमाडौं- काठमाडौं उपत्यकाका अधिकांश स्थानमा कोरोना भाइरसका संक्रमित भेटिइसकेका छन्। त्यसमध्ये पनि कतिपय स्थानमा त कोरोना संक्रमणले भयावह रूप लिन थालेको छ। काठमाडौं महानगरपालिका वडा नम्बर ३२ मा कोरोना संक्रमित थुप्रै व्यक्तिहरू भेटिएका छन्। उक्त वडामा मंगलबारसम्म ८० जनामा कोरोना पुष्टि भएको वडा कार्यालयले जनाएको छ। बुधबारको पूर्ण विवरण प्राप्त हुन बाँकी रहेको समेत वडा कार्यालयले उल्लेख गरेको छ।
कोटेश्वरस्थित असर्फी गल्लीमा सबैभन्दा बढी संक्रमण फैलिएको वडा कार्यालयकी क्लिनिक इन्चार्ज मैयाँ सैँजुले नेपाल लाइभलाई बताइन्। ‘पछिल्लो समय कोरोनाले भयावह रुप लिन थालेको छ। कोटेश्वरको असर्फी गल्लीमा सबैभन्दा बढी कोरोना देखिएको छ,’ क्लिनिक इन्चार्ज सैँजुले भनिन्, ‘असर्फी गल्लीमा मंगलबारसम्म ३९ जनामा कोरोना पोजेटिभ देखिएको छ।’
वडामा कोटेश्वरसहित पेप्सीकोला, तिनकुने, महादेवथानलगायतका क्षेत्र पर्ने र ती स्थानमा संक्रमण फैलिइसकेको वडा कार्यालयले जनाएको छ।
बाहिरी जिल्लाबाट आएका संयमित नहुँदा फैलियो
केही समय अगाडि बाहिरी जिल्लाबाट आएकाहरूमा कोरोना देखिएकोमा कन्ट्याक्ट ट्रेसिङ गर्दा उनीहरूमार्फत् समुदायमा कोरोना फैलिसकेको पाइएको छ।
सुरुमा वीरगञ्ज, बारालगायतका स्थानबाट आएकाहरुमा कोरोना देखिएकोमा विस्तारै समुदायमा कोरोना पुगेको वडाले जनाएको छ। असर्फी गल्लीमा सुरुमा वीरगञ्जबाट आएकी १ जना युवतीमा कोरोना देखिएको थियो। त्यसपछि कन्ट्याक्ट ट्रेसिङ गर्दा उनको सम्पर्कमा आएका ४ जनामा कोरोना भेटिएको थियो। थप कन्ट्याक्ट ट्रेसिङबाट २३ जनामा कोरोना भेटिएको थियो। त्यसपछि विस्तारै कोरोना संक्रमण फैलिँदै गएको वडा कार्यालयले जनाएको छ।
‘सोमबाट एक जना पुरुषमा कोरोना पोजेटिभ देखिएपछि हामीले त्यो परिवारका सबै सदस्यको पिसिआर परीक्षण गराएका थियौँ,’ क्लिनिक इन्चार्ज सैँजुले भनिन्, ‘उक्त परिवारमा सबै सदस्यलाई कोरोना भेटिएको छ। मंगलबार परिवारका ७ जना सदस्यमा कोरोना पोजिटिभ भएको रिपोर्ट आएको थियो।’
स्वास्थ्यकर्मी, बैंकका कर्मचारी, अन्य रोगका बिरामीमा जोखिममा
वडामा स्टाफ नर्स, डाक्टरहरु, अन्य कर्मचारी, मिर्गौला लगायत अन्य अवस्थाका बिरामीहरु तथा समुदायस्तरमा नै कोरोना फैलिसकेको वडाले जनाएको छ।
‘सुरुमा बाहिरबाट आएकोमा कोरोना देखिएपनि पछिल्लो समय समुदायस्तरमा कोरोना फैलिसकेको छ। स्टाफ नर्स र डाक्टरहरु गरी ६ जना स्वास्थ्यकर्मीमा कोरोना देखिएको छ,’ क्लिनिक इन्चार्ज सैँजुले भनिन्, ‘त्यस्तै अस्पताल गइरहनुपर्ने अन्य दीर्घरोगी तथा बैंकलगायत विभिन्न कार्यालयमा कार्यरत कर्मचारीहरुमा पनि कोरोना देखिएको छ।’
दीर्घ रोगीहरू अस्पताल जाँदा आउँदा उनीहरुमा कोरोना संक्रमण भएको पाइएको सैँजुले बताइन्।
दीर्घरोगी बाहेक अन्य संक्रमितको अवस्था सामान्य
संक्रमित भेटिएका केही दीर्घ रोगीहरुको अवस्था गम्भीर रहे पनि अधिकांश संक्रमितहरुको सामान्य अवस्था रहेको छ। जटिल अवस्थामा रहेकाहरुलाई अस्पतालमा राखिएको र सामान्य अवस्था रहेका अधिकांश संक्रमित होम आइसोलेसनमा रहेको वडाले जनाएको छ।
३५ जना होम आइसोलेसनमा, अस्पतालमा ३८ जना
मंगलबारसम्म सक्रिय संक्रमित रहेका ८० संक्रमितमध्ये ३५ जना होम आइसोलेसनमा छन् भने ३८ जना विभिन्न अस्पतालमा छन्। ७ जना निको भएर घर फर्किसकेको कार्यालयले जनाएको छ।
वडा नम्बर ३२ का संक्रमितहरू टेकु, कीर्तिपुर, केएमसी, पाटन, टिचिङ, ह्याम्सलगायत उपत्यकाका निजि तथा सरकारी अस्पतालमा राखिएको छ। सामान्य अवस्था भएका बिरामीहरु मात्रै होम आइसोलेसनमा राखिएको र उनीहरुलाई बेलाबेलामा फोनसम्पर्क गरेर परामर्श दिइरहेको वडा कार्यालयले जनाएको छ।
कोरोना महामारीले भयावह रुप लिँदै गएपछि केन्द्र सरकारले नै एक हप्ताका लागि निषेधाज्ञा जारी गरेको र कोरोना न्यूनीकरणका लागि थप के के गर्न सकिन्छ भन्ने सन्दर्भमा छलफल भइरहेको वडाध्यक्ष नवराज पराजुलीले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
