काठमाडौं- बिहीबार काठमाडौं न्यूरोडस्थित बिशाल बजार अगाडिको एक ज्वेलरीमा कार्यरत ३ कर्मचारीमा कोरोना सक्रमण पुष्टि भयो। अत्यन्त व्यस्त र भिडभाड हुने क्षेत्रमा कोरोना भाइरस संक्रमण देखिएपछि अन्य व्यक्तिमा चाँडै फैलने र समुदायमा पुग्ने चिन्ता देखिएको भन्दै महानगरपालिकाले तदारुकता देखाउँदै न्यूरोडका केही क्षेत्र सिल गर्ने र पसलहरु बन्द गराउने निर्णय शुक्रबार गर्यो।
जुद्ध सालिकदेखि असन, इन्द्रचोक, मक्खन गल्ली पूर्ण रुपमा एक साताका लागि बन्द गरिएको छ। ज्वेलरीका कर्मचारीहरु उक्त क्षेत्रमा घुमेकाले न्युरोड जुद्ध सालिकदेखि उत्तरपट्टि पूर्ण रुपमा बन्द गरिएको महानगरका प्रवक्ता ईश्वरमान डंगोलले जानकारी दिए।
‘बिहीबार कोरोना पुष्टि भएसँगै असन, इन्द्रचोक, महाबौद्ध, न्युरोडमा कोरोना संक्रमितको संख्या बढेको देखियो,’ प्रवक्ता डंगोलले भने, ‘चारैतिरबाट कोरोनाले घेर्यो। वडा नम्बर २४ मा पनि देखिएपछि केही क्षेत्रलाई पूर्ण रुपमा बन्द गरिएको हो।’
ज्वेलरीमा कार्यरत कर्मचारीमा कोरोना भेटिएपछि ज्वेलरीमा आउने ग्राहक देखि चिया खाजा ल्याउने व्यत्ति सम्मलाई पिसिआर परीक्षण गरिने वडा नम्बर २४ का वडा सदस्य विनोद तुलाधारले जानकारी दिए। ‘चिया खाजा पुर्याउने एकै व्यक्ति धेरै ठाउँमा गएको हुन्छ,’ वडा सदस्य तुलाधारले भने, ‘अब चिया/खाजा पुर्याउनेदेखि पसलमा आएकासम्मलाई कन्ट्याक्ट ट्रेसिङ गर्ने भएका छौँ।’
विशाल बजारको शौचालय प्रयोग गर्नेलाई कोरोना
विशाल बजारमा वरिपरि धेरै नै पछिल्लो समय धेरै नै फुटपाथ पसलेहरु बस्न थालेका थिए। फुटपाथ पसले विशाल बजारका व्यापारीदेखि केही ज्वेलरीका कर्मचारीसमेत विशाल बजारमा रहेको शौचालय प्रयोग गर्छन्। वडा सदस्य तुलाधार शौचालय प्रयोग गर्नेलाई पनि कोरोना सक्रमण फैलिएको हुन सक्ने आँकलन गरिएको उनले बताए।
‘विशाल बजारमा रहेको शौचालय धेरैले प्रयोग गर्छन्। त्यहाँ न त सफा पानी छ। न त साबुनपानी नै,’ तुलाधारले भने, ‘त्यतैबाट कोरोना फैलिएको शंका हामीलाई लागेको छ।’
हटस्पट व्यस्त बजार
राजधानीको व्यस्त बजार न्युरोड, असन, इन्द्रचोक, महाबौद्ध हुन्। होलसेल पसलदेखि ठूलो संख्यामा निजी कार्यलय पनि यो क्षेत्रमा पर्छन्। महाबौद्धमा २४ जनालाई देखिएपछि केही दिन अघि नै सिल गरिसकेको छ। त्यस्तै न्युरोडतिरका बजारहरुमा पनि ७ जनालाई सङ्क्रमण देखिएपछि प्रमुख बजार कोरोनाको हटस्पट भएका छन्।
शुक्रबारदेखि यी पुरै क्षेत्रहरु बन्द भएका छन्। वडा सदस्य तुलाधारका अनुसार न्युरोड क्षेत्रका व्यापारीले 'हामी पसल बन्द गर्छाैं' वडाले सहयोग गरोस् भनेपछि पसलहरु बन्द भएको बताए।
तुलाधारका अनुसार यो क्षेत्रमा रहेको औषधि पसल खुल्नेछ। बिहान केही बेर दुध तरकारी पसलहरु खुल्नेछन् भने दिउँसो पूरै बन्द हुनेछ। फुटपाथ पसलहरु आजैबाट हटाइएको छ।
तुलाधारका अनुसार एक हप्तादेखि १५ दिन यो क्षेत्र पूर्ण रुपमा बन्द हुनेछ। यतिन्जेल वडाले चिया पसले, हरेक पसलको एकजना, सहकारी, बैंकको एकजना, दुध बेच्ने, होटलवालालाई परीक्षण गरिनेछ भने त्यसै अनुसार कन्ट्याक्ट ट्रेसिङ पनि गरिने पनि उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
