कोरोना समुदायस्तरमा फैलियो, परीक्षणको दायरा बढाउँदै छौं : भरतपुर उपमेयर [जनप्रतिनिधिसँग नेपाल लाइभ]

समाचार

पार्वती शाह ठकुरी शनिबार, साउन ३१, २०७७ १४:५६

भरतपुर महानगरपालिका देशका सबै क्षेत्रबाट आवतजावत गर्ने ठाउँ हो। ट्रान्जिट भएका कारण यहाँ संक्रमणको जोखिम उच्च छ। जिल्लाका अन्य भागको तुलनामा महानगर क्षेत्रमा संक्रमण दिनहुँ बढेको देखिन्छ। २-३ दिन यता झनै धेरै देखिएको छ। शुक्रबार प्रमुख जिल्ला अधिकारी नारायणप्रसाद भट्टराई, जिल्ला प्रहरी कार्यालय चितवनका प्रमुख नान्तीराज गुरुङ, उद्योगी व्यवसायीसँग भएको छलफलले एक साता निषेधाज्ञा जारी गर्ने निर्णय गरेका छौँ। समुदायस्तरमा कोरोना फैलिएका कारण निषेधाज्ञा गर्नुको विकल्प रहेन।

दूध तथा तरकारी किनमेल र एकदमै आपत्कालीन काममा बाहेक दुई सातासम्म कोही पनि घरबाट निस्कन पाउँदैन। यतिन्जेल हामीले संक्रमण देखिएका क्षेत्रमा सिल गरेर पिसिआर परीक्षण गर्ने तथा भीड धेरै हुने क्षेत्रको पिसिआर परीक्षण गर्ने तयारी पनि गरेका छा‌ैं।

हाम्रो आम्दानीको स्रोत त कर नै हो। तर महामारीले गर्दा पोहोरको जति कर उठेको छैन। तर रकमान्तर गरेर भए पनि कोरोना नियन्त्रणका लागि बजेट छुट्टयाउने हाम्रो तयारी छ। महानगरको विपद् व्यवस्थापन कोष छ, त्यसअन्तर्गत रहेको कोरोना कोषले काम गरिरहेको छ। प्रदेश सरकारले कोरोना महामारीको सुरुमा नै भरतपुरमा कोरोना अस्पताल बनाउने बेलामा सहयोग गरेको हो। त्यस यता भने सहयोग आएको छैन। केन्द्र सरकारबाट पनि यति नै सहयोग भनेर पनि आएको छैन।

एक स्थानमा कोरोना संक्रमित भेटिए त्यो स्थान पुरै सिल गरेर उसको सम्पर्कमा आएकाहरुको कन्ट्याक्ट ट्रेसिङ गर्ने योजना बनाएका छौँ। शुक्रबार रातिबाट निषेधाज्ञा भएका कारण पनि कन्ट्याक्ट ट्रेसिङमा हामीलाई सहज हुन्छ भन्ने लागेको छ।

समुदाय स्तरमा फैलिसकेका कारण अस्पतालले नपुगे वडा–वडामा रहेका विद्यालय तथा पार्टी प्यालेसमा संक्रमित राख्ने योजना बनाएका छौँ। गम्भीर अवस्थाका बिरामीलाई कोरोना विशेष अस्पताल र जिल्ला अस्पतालमा राखेर उपचार गर्छाैं। अहिलेसम्म भरतपुर महानगरपालिकामा ९३ जना कोरोना संक्रमित देखिनुभएको छ । पहिलो प्राथामिकता भनेको संक्रमित भएकाहरुको ‘कन्ट्याक्ट ट्रेसिङ’ गर्नु हो ।