काठमाडौं– नेपाल ट्रष्टका नाममा रहेको चितवनस्थित दियालो बंगलाको ६ बिघा जग्गा लिएर यती ग्रुपले सरकारलाई भाडा नतिरी रिसोर्ट सञ्चालन गर्दै तथ्य खुलेको छ। यति ग्रुपको लगानी रहेको कसरा जंगल रिसोर्टले २०७४ भदौदेखि भाडा नै नतिरेको तथ्य खुलेको हो।
नेपाल ट्रष्टको कार्यालयले यती ग्रुपको कसरा रिसोर्टसँग वार्षिक साढे २७ लाख भाडा बुझाउने गरी २०७३ भदौमा पाँच वर्षका लागि लिजमा दिने सम्झौता गरेको थियो। रिसोर्टले दियालो बंगला परिसर पूर्वतर्फको ६ बिगाह ११ धुर जग्गा प्रयोग गर्ने गरी सम्झौता भएको थियो। सम्झौता भएको पहिलो वर्षको भाडा तिरे पनि दोस्रो वर्षबाट यती ग्रुपको कसरा जंगल रिसोर्टले अहिलेसम्म भाडा तिरेको छैन।
नेपाल ट्रष्ट कार्यालयका प्रवक्ता बाबुराज श्रेष्ठले रिसोर्ट सञ्चालनका लागि जग्गा लिएपनि कम्पनीले जग्गा लिज बापतको भाडा रकम नतिरेको बताए।कम्पनीलाई ट्रष्टको कार्यालयले भाडा भुक्तानी गर्ने बारम्बार पत्रचार गरेपनि रकम असुली हुन नसुकेको उनको भनाई छ। कम्पनीले सम्झौताअनुसार बक्यौता भाडा तिरेर जग्गा प्रयोग गर्नुपर्ने नत्र सम्झौता रद्द गर्ने भने पनि कम्पनीले केही कुनै जवाफ नदिएको प्रवक्ता श्रेष्ठको भनाइ छ।
‘महालेखाको वार्षिक प्रतिवेदनामा समेत जग्गा भाडा असुल्न निर्देशन भइसकेको छ,’ उनले भने, ‘कार्यालयले पनि अब जसरी भए रकम असुली गर्नुपर्छ। बाँकी बक्यौता नतिरेसम्म दुईपक्षीय सम्झौता रद्द गर्न सक्ने अवस्था पनि छैन।’
रिसोर्टले भने स्थानीयको अवरोधका कारण संरचना निर्माण गर्दै व्यवसाय गर्न नपाएका कारण भाडा तिर्ने नसकेको बताउँदै आएको छ। तर, नेपाल ट्रष्टको कार्यालयको अनुगमन रिपोर्टमा भने स्थानीयको कुनै अवरोध नरहेको ठहर गरिसकेको छ।
शतप्रतिशत जरिवानासहित भाडा असुली गर्नू : महालेखा
महालेखा परीक्षकको कार्यालयले सार्वजनिक गरेको ५७औं वार्षिक प्रतिवेदनमा रिसोर्ट सञ्चालक कम्पनीसँग शतप्रतिशत जरिवानासहित भाडा असुली गर्न निर्देशन दिइएको छ।
‘चितवन भरतपुर महानगरपालिका वडा नं. १ स्थित दियालो बंगला परिसरको पूर्वतर्फको ६ बिगाहा ११ धुर जग्गा वार्षिक २७ लाख ५० हजार रुपैयाँ भाडा बुझाउने गरी २०७३ भाद्रदेखि पाँच वर्षको लागि एक रिसोर्टसँग सम्झौता भएको छ। उक्त दुवै सम्झौतामा बुझाउनुपर्ने भाडाको किस्ता तोकिएको समयमा नबुझाएमा शतप्रतिशत जरिवानासमेत असुल उपर गर्नु पर्छ। रिसोर्ट सञ्चालन गर्नेले २०७४ भदौदेखि जग्गा भाडाबापतको रकम तिरको छैन,’ प्रतिवेदनमा भनिएको छ।
यती ग्रुपले नेपाल ट्रष्टकै स्वामित्वमा रहेको गोर्कण फरेस्टको २ हजार ७ सय रोपनीभन्दा बढी र कालीमाटी र दबारमार्गका जग्गामा समेत शक्तिको आडमा रजाइँ गर्दै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
