काठमाडौं-सरकारले साउन ७ गते लकडाउन अन्त्य गरेसँगै बारा र पर्सामा सञ्चालित उद्योगहरु पनि धमाधम खुल्न थाले। भारतबाट समेत मजदूर र कर्मचारी आउन थाले। यसपछि बारामा पनि दिनहुँ कोरोना संक्रमण बढ्दै जान थाल्यो। कोरोनाले भयावह रुप लिनसक्नेतर्फ सचेत रहँदै बारा प्रशासनले साउन १८ बाट निषेधाज्ञा जारी गरेको छ।
दिनैपिच्छे संक्रमित बढ्दै गएपछि जिल्लाभरका प्रमुख सहरमा अर्काे सूचना जारी नहुन्जेलसम्म निषेधाज्ञा जारी गरिएको बारा जिल्लाका प्रमुख जिल्ला अधिकारी रुद्रप्रसाद पण्डीतले जानकारी दिए। ‘पछिल्लो समय ७० जनाको स्बाब परीक्षण गर्दा दिनकै ३÷४ जनालाई कोरोना संक्रमण देखियो,’ प्रजिअ पण्डीतले भने, ‘जिल्लाको स्थिति नै भयावह हुने छाँटकाँट देखिएपछि निषेधाज्ञा जारी गरेका हौँ ।’
भारतबाट समेत मजदूर र कर्मचारी लुकीछिपि आउन थालेकाले बारामा कोरोना फैलिएको प्रजिअ पण्डीतको भनाइ छ। ‘वीरगञ्जमा मजदूर–कर्मचारी जानु, कलैयामा काम गर्ने ८० प्रतिशतभन्दा बढी कर्मचारी वीरगञ्जमा बस्नु, केही भारतबाट पनि लुकिछिपी आउनु र दुई जिल्लाबीच कर्मचारी आउजाउ हुनु नै पछिल्लो समय जिल्लामा संक्रमितको संख्या बढ्नुको कारण हो,’ प्रजिअ पण्डीतले भने। बारा–पर्सामा कडा लकडाउन नगरे स्थिति भयावह हुनसक्ने पनि उनले बताए।
बारा प्रशासनका अनुसार जिल्लाभर १ हजार ५ सय ३० क्षमताका ५५ वटा क्वारेन्टाइन छन्। तिनमा ३ हजार २ सय ९८ जना रहेकोमा ४ महिला र ३४ पुरुष गरि ३८ जनामात्र बाँकी छन् भने ३ हजार २ सय ६० जना घर गइसकेका छन्।
अहिलेसम्म स्बाब संकलन ५ हजार ६५ जनाको गरिएकोमा स्वाब परीक्षण ४ हजार ८ सय ३१ जनाको गरिएको छ । जिल्लाभर कोरोना संक्रमितको संख्या १ सय ९८ जना रहेकोमा निको भएकाको संख्या१ सय ७९ रहेको छ भने १४ जनाको उपचार भइरहेको छ।
अवस्था सामान्य भएकालाई शैक्षिक तालिम केन्द्रमा राखेर उपचार गरिएको भए पनि गम्भीर अवस्थाका ५ जनालाई गण्डक अस्पताल बारामा रिफर गरिएको छ। केहीलाई वीरगञ्जस्थित नारायणी अस्पतालमा रिफर गरिएको छ।
बारा जिल्लाभर अहिलेसम्म कोरोनाका कारण ज्यान गुमाउनेको संख्या ३ जना छन्।
वीरगञ्ज आउजाउ धेरै भएकालाई देखियो कोरोना
‘सरकारले लकडाउन खोलेपछि कलैयाका उद्योगधन्दा खुल्न थाले, मजदूर–कर्मचारीको आउजाउ भयो,’ कलैया उपमहानगरपालिकाका मेयर राजकिशोर राय यादवले भने, ‘साबधानी अपनाउनु पर्ने भए पनि नागरिक सचेत भएनन् उद्योगधन्दा पनि छिटै खुले, सामान्य स्तरमा जनजीवन फर्कन थालेपछि कोरोना संक्रमित बढेका छन् ।’
मेयर यादवले स्थिति नियन्त्रणबाहिर नगए पनि संघीय सरकारले लकडाउन गर्नुपर्ने बताए। ‘सीमानाका जिल्लाहरुमा धेरै संक्रमित देखिएका छन्। पर्सा जिल्ल सँग बारा जिल्लाको धेरै आउजाउ हुन्छ,’ उनले भने, ‘बारा र पर्सामा लकडाउन गरिदिए स्थिति नियन्त्रणबाहिर जान पाउँदैनथ्यो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
