काठमाडौं– ‘तीज हाम्रा लागि सृजनशील अवसर पनि हो’, आफ्नो पछिल्लो तीज–गीत रेकर्ड गराइसकेपछि केही दिन पहिला संगीतकर्मी कस्तुप पन्तले भन्दैथिए, ‘परम्परा र गीतसंगीतको साइनो अत्यन्तै महत्वपूर्ण छ। हामीले बेलाबेला यही साइनोको सृजनात्मक सेतुका रुपमा भूमिका निर्वाह गरिदिनुपर्छ।’
लोकगीत रचनासँगै गायन र आधुनिक संगीतमा समेत समानान्तर रुपमा डटिरहेका पन्तले रेकर्ड गराएको त्यही पछिल्लो तीज गीत सार्वजनिक भएको छ। ‘डाली लरक्कै’ बोलको सो गीतको लय र शब्दमात्र होइन पुरुष गायनमा पनि स्वर उनै कस्तुपको छ। गायनमा उनलाई अर्की चर्चित लोक गायिका देवी घर्तीमगरले साथ दिएकी छिन्।
‘म एउटा थिममा मात्र तिज गीत बनाउन मन पराउँछु’, यसअघि पनि चारवटा चर्चित तीज गीत सृजना गरिसकेका उनले ‘डाली लरक्कै’बारे संक्षिप्त प्रतिक्रिया दिँदै भन्छन्, ‘यसमा पनि मैले सोसल मिडियाबाट हुने अफेक्सन (आकर्षण)लाई विषय बनाएको छु।’ हुन पनि, कस्तुप पन्त नामकै युट्युब च्यालनमा रिलिज भएको उनको गीतको भिडियो हेर्दा फेसबुके पिरती र यसको सतहीपना प्रष्ट हुन्छ। गीतको भाव अनुसार पात्रहरु फेसबुके प्रेमकै कारण केवल छाती चर्कने अवस्थामा अनुदित हुन्छन्।
कस्तुप भन्छन्, ‘तीज गीत पनि र एउटा सन्देश पनि प्रवाह होस् भनेर नै मैले यो गीत बनाएको हुँ।’ गीतको एउटा सन्दर्भमा भनिएको छ, ‘बैशालु मन, चुलबुले माया भेट्नलाई हुरुक्कै, पिरती मेरो फेसबुके पर्यो छैन मन फुरुक्कै।
लोकगीत र संगीतमा सस्तो लोकप्रियताभन्दा कलात्मकता पनि हुनुपर्ने जिकिर गर्ने कस्तुपले यो गीतमा पनि ठाउँ–ठाउँमा भाव र सन्दर्भ अभिव्यक्त गर्न अलंकारहरु राखेका छन्। गीतको लय उत्ताउलो छैन। तीजको ‘टिपिकल’ झल्को दिने ‘डाली लरक्कै’बाट तीज प्रेमिहरुबाट कस्तुपले कत्तिको माया पाउने हुन्, त्यो चाहिँ हेर्न बाँकी छ।
भिडियाे हेर्नुस्:
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
