प्रतीकात्मक तस्बिर
धनगढी- धनगढी उपमहानगरपालिका वडा नम्बर २ का स्थानीय गणेशबहादुर बोहराको ६ सय ७३ युनिट विद्युत् चलेको भनी बिल थमाइयो। नेपाल विद्युत् प्राधिकरण धनगढी वितरण शाखाले थमाइएको बिलमा ११ हजार एक सय ९८ रुपैयाँ उल्लेख छ। सामान्यतया नेपाल विद्युत् प्राधिकरणले पाँच एम्पियरको चार सयभन्दा माथिको प्रति युनिट १३ रुपैयाँ र न्यूनतम रकम दुई सय रुपैयाँ तोकिएको छ। तर, उनलाई थमाइएको बिल अनुसार प्रति युनिट १६ रुपैयाँ परेको छ। न्यूनतम ८४ देखि एक सय ३२ युनिट विद्युत् प्रयोग हुँदै आएकोमा दुई महिनाको ६ सय ७३ युनिट आएपछि उनी छक्क परे।
धनगढीका केशव राज उपाध्यायले विद्युत् प्राधिकरणले तीन महिनाको १६ हजार रुपैयाँको बिल थमाएको बताए। उनले भने, ‘विद्युत् कार्यालयले १६ हजार रुपैयाँको बिल दियो। कार्यालयबाट पुनः चेक गराउँदा त्यसको आधा आठ हजार रुपैयाँमात्र आयो।’ उनले बिलकै आधारमा भुक्तानी गर्दा दोब्बर तिर्नुपर्ने बाध्यता हुने बताए। उनले भने, ‘बिलमा भर नगरी खोज नगर्नेले त सबै रकम तिरे होलान्।’
लम्की चुहा नगरपालिकाका रमेश कुश्मीले पाँच सय रुपैयाँ तिर्नुपर्नेमा एक हजार रुपैयाँ तिरेको गुनासो गरे। धनगढी वडा नम्बर ५ का गगन अयडीले भने, ‘तीन महिनाको मात्र तीन हजार पाँच सय रुपैयाँ बिल आएको छ। तर, मेरो मासिक शुल्क बढीमा दुई सय ५० रुपैयाँ आउने गरेको थियो।
माथिका यी केही प्रतिनिधि उदाहरणमात्र हुन्। अहिले विद्युत् प्राधिकरणले घरमै नपुगी मिटर नै अध्ययन नगरी मनलाग्दी शुल्कको बिल पठाइरहेको गुनासो बढी रहेको छ। सरकारले चैत ११ गतेदेखि लकडाउन जारी गरेको थियो। ‘लकडाउनका कारण मानिस सबै घरभित्रै बसे। आम्दानीको स्रोत त थिएन झन यसैमा मनलाग्दी बिल पठाएर आर्थिक भार गरायो प्राधिकरणले,’ अयडीले भने।
धनगढीका उपभोक्ताले अस्वभाविक शुल्क लिन नहुने भन्दै प्राधिकरणलाई शुल्क फिर्ता गर्न माग गरेका छन्। धनगढीका श्याम पडालले भने, ‘यो विद्युत् आतंक देशभरी नै हो कि क्याहो जेठ महिनामा लक डाउनले पसल बन्द थिए। तर, पनि वर्ष भरिको तिर्नुपर्ने बिलभन्दा चौबर पैसा लियो।’
नेपाल विद्युत् प्राधिकरण धनगढी वितरण केन्द्रका प्रमुख सुरेन्द्र चौधरीले समेत लकडाउनमा घर–घरमा गएर रिडिङ नगरिएकाले यस्तो समस्या भएको बताए। उनले भने, ‘लकडाउनमा घर–घरमा गएर मिटर रिडिङ गर्ने अवस्था थिएन। कर्मचारी पनि बिदामा थिए। केन्द्रीय कार्यालयको निर्देशनअनुसार अनुमानको आधारमा शुल्क लिएका हौ। बढी लिइएको शुल्क अर्काे महिनामा मिलान गर्ने छौं। ग्राहकले मिटरको नम्बर ल्याए हुन्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770884168.png)
-1764146706.png)
-1770562345.jpg)
