काठमाडौं- उपकरण आपूर्तिमा ढिलाइ हुँदा स्थायी लेखा नम्बर (प्यान) वितरणमा बायोमेट्रिक प्रणाली लागू गर्न आन्तरिक राजस्व विभाग असफल भएको छ।
बायोमेट्रिक कार्यान्वयनका लागि आवश्यक पर्ने उपकरण खरिदको प्रक्रियाअघि बढेको भएपनि काेराेनाका भाइरसका कारण संसारका धेरै देशमा लकडाउन हुँदा सामान ढुवानीमा ढिलाइ भएको हो। जसका कारण विभागले चालु आर्थिक वर्षभित्र बायोमेट्रिक प्रणाली कार्यान्वयनमा ल्याउने योजना अघि बढाउन सकेन।
आन्तरिक राजस्व विभाग स्रोतले दिएको जानकारीअनुसार अबको केही दिनमा ती सामान विभागले प्राप्त गर्नेछ। त्यसपछि मात्रै बायोमेट्रिक उपकरण जडान गरी प्यान वितरणमा यो प्रणाली कार्यान्वयनमा ल्याइनेछ। सरकारले चालु आर्थिक वर्षको बजेटबाट प्यानमा बायोमेट्रिक प्रणाली कार्यान्वयनमा लैजाने निर्णय गरेको थियो। अर्थ मन्त्रालयले गत कार्तिकमा बायोमेट्रिक दर्ता प्रणालीबाट स्थायी लेखा नम्बर लिन पेश गर्नुपर्ने दरखास्त फारमको ढाँचा स्वीकृत गरेर काम अघि बढाउन विभागलाई निर्देशन दिएको थियो।
विभागले त्यसपछि सामान आपूर्तिका लागि खरिद प्रक्रिया अघि बढायो। खरिद सम्झौता भएपनि कोरोना भाइरसका कारण उत्पन्न लकडाउनका कारण विदेशमा नै लामो समय सामान अड्किएकाले यस आर्थिक वर्षभित्र कार्यान्वयन गर्न नसकिएको विभाग स्रोतको भनाइ छ। सरकारले कर प्रशासनलाई पारदर्शी बनाउन चालु आर्थिक वर्षबाट पहिलोपटक बायोमेट्रिक प्रणाली सुरु गर्ने घोषणा गरेको थियो। चालु आर्थिक वर्षको बजेट र आर्थिक ऐनमार्फत प्यान लिइ कारोबार गर्ने करदाताको बायोमेट्रिक प्रणालीमा आबद्ध गरी लगत राख्ने व्यवस्था गरिएको हो।
'स्थायी लेखा नम्बर लिई कारोबार गर्ने व्यक्तिले तोकिएको अवधिभित्र विभागले तोकेबमोजिमको दर्ता सम्बन्धी विवरण बायोमेट्रिक प्रणालीमा अद्यावधिक गर्नुपर्नेछ,' आयकर ऐनको संशोधन गर्दै आर्थिक ऐनमा भनिएको छ। प्यान लिएर कारोबार गर्ने करदातामाथि कडाइका लागि यो व्यवस्था अघि सारिएको हो।
विभागले बायोमेट्रिक प्रणालीसँगै पुराना करदाताको सूचना अध्यावधिक लागि पनि नयाँ फारम बनाउने भएको छ। नयाँ फारममा करदाताको सूचना अद्यावधिक गरी उनीहरुको बायोमेट्रिक दर्ता पनि गरिनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789386153.jpg)
-1786602170.png)
-1791388337.png)
