फाइल तस्बिर
काठमाडौं– रुकुम पश्चिमको चौरजहारी नगरपालिका–८ सोतीमा ६ जनाको ज्यान जाने गरी भएको घटनामा संलग्न रहेको आरोप लागेकी मल्ल थरकी किशोरीका दाइ अहिले पुर्पक्षका लागि कारागार चलान भएका छन्। कारागार चलान हुनुभन्दा पहिले उनले रुकुम पश्चिम जिल्ला अदालतमा आफूमाथि लागेको आरोपमा बयान दिएका थिए।
यसअघि प्रहरीमा दिएको बयानमा घटना स्वीकार गरेको पाइएपनि अदालतमा उनले इन्कारी बयान दिएका छन्। उनले घटनाबारे आफूलाई जानकारी नभएको र कसैले पनि कुटपिट नगरेको बयान दिएका छन्।
यस्तो छ किशोरीका दाइले अदालतमा दिएको इन्कारी बयान
घटना भएको दिन जेठ १० गते मेरो घरभन्दा तल ढुंगेखानीमा काम गर्न गएको थिए। काम गरिरहेको बेला साँझ ५ बजेतिर नवराज बिकसहितका केटाहरु आएको देखेको हुँ। तीमध्यका एकजनालाई मात्रै मैले चिनेको थिए। नवराजलाई पनि देखेको थिए।
ती केटाहरु मेरो घरतिर जाँदै गरेको देखि म मेरो बुवा ५-६ मिनेटमै मेरो घरमा पुग्यो। म र बुबा घरमा पुग्दा त्यहाँ ममीमात्रै हुनुहुन्थ्यो। ती केटाहरु मेरो घरबाट २ किलोमिटर पर सुकेसालतिर हिँडेको देखेँ। ती केटाहरु आएको कुरा बुबाले वडाध्यक्षलाई फोनमार्फत जानकारी गराउनुभयो। फोनमा अरु के के भयो थाहा भएन।
मैले प्रतिवादी विनोद मल्ललाई जाजरकोटबाट केटाहरु आएका छन्। तँ कहाँ छस् भनेर सोधे। उसले अंकलको घरमा छु भनेको थियो। त्यसपछि केही कुरा नगरी फोन राखेँ। म मेरो रा ३ प ८०६७ नम्बरको मोटरसाइकलमा चढी मध्यपहाडी मार्गतिर जाँदा हर्कबहादुर मल्ललाई भेटी जाजरकोटबाट केटहारु आएका छन् हेर्न जाँउ भनि बाइकको पछाडी राखेर लिएर गए। अलि पर ५ केटाहरुलाई देखि बाइक बाटोमै राखी केटाहरु भएको ठाउँमा पुगे।
केटाहरुलाई प्रहरीको जिम्मा लगाउन नियन्त्रणमा लिइयो। अन्य केटाहरु कता थिए मैले देखिन। तत्कालै प्रहरी पनि घटनास्थल पुगेकाले हामीले नियन्त्रणमा लिएका केटाहरु प्रहरीको जिम्मा लगायौं। प्रहरीले लकडाउनको बेला भिडभाड नगर्नु भनेपछि म घरतिर फर्किए। मृतक भनिएका व्यक्तिलाई मैले कुटपिट गरेको छैन। घाइते भएका १२ जनालाई पनि कुटपिट गरेको छैन। जातिय विभेद पनि गरेको छैन। ६ जनाको कसरी मृत्यु भयो मलाई थाहा भएन।
तर, यसअघि भने उनले प्रहरीसमक्ष मारेरै भेरीमा फालेको बयान दिएका थिए। ‘नवराज बिक समेतलाई ढुङ्गा लाठी समेतले प्रहार गर्दै लखेट्दै भेरी नदीको सानो पानी भएको भंगालोबाट पारि बीच बगरमा पुर्याइ नवराज बिक समेतलाई लाठी, ढुङ्गा समेतले टाउँको समेतको शरीरमा मर्नेसम्मको चोट पर्ने गरी प्रहार गरी कर्तव्य गरी मारी भेरी नदीमा बगाइलियौं। अन्य ५ जना केटाहरुलाई कुटपिट गरी घाइते बनाई नियन्त्रणमा लिएका हौं,’ प्रहरीको बयानमा उनले भनेका थिए।
प्रहरी र अदालतमा दिएको बयान फरक परेपछि किन यस्तो भयो भन्दै न्यायाधीशले उनलाई प्रश्न गरेका थिए। न्यायाधीशको प्रश्नको जवाफ दिँदै उनले अदालतमा भनेका थिए, ‘बयान कागज मलाई नसुनाई सही गर्न लगाएको हो। मैले पनि डरले अनुसन्धान अधिकारीसमक्ष जे देखियो त्यही काजगमा सहीछाप गरेको हुँ।’ आफूलाई फसाउने हिसाबले झुटो जाहेरी दिएको उनको दाबी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
