फाइल तस्बिर
काठमाडौं- रुकुम पश्चिमको चौरजहारी नगरपालिका-८ सोतीमा ६ जनाको ज्यान जाने गरी भएको घटनामा संलग्न रहेको आरोप लागेकी किशोरीकी आमा प्रकाशी मल्लले अदालतसमक्ष इन्कारी बयान दिएकी छिन्। १ लाख धरौटीमा रिहा गर्न अदालतले आदेश दिए पनि उक्त रकम बुझाउन नसकेर थुनामा रहेकी प्रकाशीले अदालतसमक्ष घटनाबारे आफूलाई कुनै जानकारी नै नभएको बयान दिएकी हुन्।
यसअघि उनले प्रहरी समक्ष आफूले छोरीका प्रेमी नवराज विकलाई डुम भनेको र बेइज्जत हुने डरले षड्यन्त्र गरेर मारेको बयान दिइकी थिइन्। तर, अहिले अदालतसमक्ष उनले उक्त बयान फेरेकी छन्।
यस्तो छ अदालतसमक्ष प्रकाशी मल्लले दिएको बयान
जेठ १० गते दिउँसो साढे ४ बजेतिर घरमा गोरु बाख्रा बाँधी म बाटोमा बसेकी थिएँ। सोही अवस्थामा मेरो घरको बाटो हुँदै सुरुमा तीन जना मान्छेहरु हिँड्दै आएको देखेँ। केही समयपछि ८/९ जना मान्छेहरु हिँड्दै आए।
उनीहरु मेरो घर नजिकको बाटोमा आएपछि मैले तिमीहरुको घर कहाँ हो बाबु, तिमीहरुको गाउँमा लकडाउन छैन? देशमा रोगको महामारी छ भन्दा उनीहरुले हाम्रो घर जाजरकोट जिल्ला हो भने। उनीहरु बाटोमा हिँडिरहेका थिए। सोही क्रममा एकजना मान्छेले हामी घुम्न आएका हौं आन्टी भन्यो। मैले उनीहरु कसैलाई पनि चिनेको थिइनँ।
ती मेरो घरको बाटो हुँदै हिँड्ने केटाहरु जम्मा १४/१५ जना जति थिए। पछि ती व्यक्तिहरु मेरो घरको बाटो अघि बढेर कता गए। अगाडि हिँड्दै जाने क्रममा पहिले मेरो घरदेखि तेर्साे बाटो हुँदै अघि बढे।अलिपरबाट तलतिर झरेको देखेको हुँ। म मेरै घरमा काम गर्दै बसें। मैले मृतक नवराज बिकलाई डुम भनि तथानाम गालीगलौज गरी जातीय भेदभाव गरेकी छैन। निज नवराज विकको र मेरी छोरीको अन्तरजातीय प्रेम सम्बन्धबाट टाढा राख्न मैले नवराजलाई कर्तव्य गरी ज्यान मार्नेसम्मको कार्य गर्न षड्यन्त्रसमेत गरेको होइन।
यसअघि प्रहरी समक्षको बयानमा भने उनले घटना आफ्नो संलग्नता स्वीकार गरेकी थिइन्। प्रहरी समक्षको बयानमा प्रकाशीले भनेकी थिइन्, ‘नबराज बिकलाई मैले जातीय विभेद हुने शब्द डुम भनि गाली गरेँ। त्यसपछि उनीहरु फर्केर गए। नबराज बिकसमेतका केटाहरुलाई मार्ने पूर्वयोजनाअनुसार मेरो श्रीमान् वीरबहादुर र वडाध्यक्ष डम्बरबहादुर मल्ललाई बोलाई पिछा गर्दै जाने क्रममा जिउला भन्ने स्थानमा फेला पार्याैं। त्यसपछि ढुङ्गा हँसियासमेतले प्रहार गरी भेरी नदीको किनारमा पुर्याई कर्तव्य गरी मारी भेरी नदीमा बगाएको हो।’
तर, प्रकाशीले अदालतसमक्ष यो बयान त्यसबेला प्रहरीले के-कसरी लेखे भन्नेबारेमा आफूलाई थाहा नभएको बताएकी छन्।
नवराजसहित ६ जनाको मृत्यु कसको कारणबाट, कसरी भएको हो भन्ने आफूलाई कुनै जानकारी नभएको बयान अदालतसमक्ष प्रकाशीले दिएकी छन्।
जाजरकोटको भेरी नगरपालिका-४ रानागाउँका २१ वर्षीय युवक नवराज बिक र छिमेकी जिल्ला पश्चिम रुकुमको चौरजहारी नगरपालिका-८ सोतीकी १७ वर्षीया मल्ल थरकी एक किशोरीबीच प्रेमकै कारण उब्जिएको विवादमा ६ जनाको ज्यान गएको थियो। उक्त घटनामा नवराजसहित टिकाराम सुनार, गणेश बुढा, लोकेन्द्र सुनार तथा सञ्जु बिक, गोविन्द शाही मारिएका थिए। यस घटनामा संलग्न रहेको आरोपमा २३ जनालाई पुर्पक्षका लागि थुनामा पठाउने आदेश अदालत दिएको थियो।
त्यस्तै अदालतले किशोरीका आमालाई भने १ लाख धरौटीमा रिहा गर्न आदेश दिएको थियो भने तीन जना साधारण तारेखमा रिहा भएका थिए। दुई नाबालकलाई सुधार गृह पठाइएको छ ५ जना भने अझै फरार छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
