काेराेना महामारीलाई वेवास्ता नगर्न विश्व स्वास्थ्य संगठनको आग्रह

कोरोना अपडेट

नेपाल लाइभ शनिबार, असार २०, २०७७ १३:३८

जेनेभा- विश्व स्वास्थ्य संगठनले विश्वमा कोरोना भाइरस सङ्क्रमितको सङ्ख्या बढ्ने क्रममा नै रहेको बताउँदै प्रभावित सबै मुलुकहरुलाई कोरोना भाइरसको सङ्क्रमण फैलिने क्रमलाई नियन्त्रणमा लिन यथोचित उपायहरुको अवलम्वनका लागि आग्रह गरेको छ।

विश्वका सबै देशका नागरिकले कोभिड– १९ सङ्क्रमण दरमा कमी नआएको यथार्थलाई मध्यनजर गर्दै सचेत बन्नुपर्ने आजको आवश्यकता रहेको संगठनका आपतकालीन सेवा निर्देशक मिखायल र्‍यानले सञ्चारकर्मीसँगको भेटमा बताए। स्थानीय समयअनुसार शुक्रबार राति उनले भने, 'अहिलेसम्म विश्वभर एक करोड ११ लाखभन्दा बढी व्यक्तिमा कोभिड– १९ सङ्क्रमण पुष्टि भएको र पाँच लाख २९ हजारभन्दा बढीको मृत्यु भएको छ। सबैभन्दा बढी सङ्क्रमित अमेरिकी क्षेत्रमा रहेको र त्यसमा पनि संयुक्त राज्य अमेरिकामा कोभिड– १९ सङ्क्रमण र यसका कारण मृत्यु हुनेको सङ्ख्या विश्वका अन्य कुनै एक मुलुकभन्दा बढी रहेको छ।'

विश्वमा कैयौँ राष्ट्रहरुले तथ्याङ्कले के भनिरहेको छ भन्ने कुरामा वेवास्ता गरिरहेको बताउँदै उनले भने, 'महामारीलाई नियन्त्रणमा लिन कहिल्यै पनि धेरै ढिलो गर्नु हुँदैन।'

उनले स्वास्थ्य सङ्कटलाई वेवास्ता गर्न नहुने बताए। उनले भने, 'अर्थतन्त्रलाई चुस्त दुरूस्त राख्नुपर्ने बाध्यता कुनै पनि राष्ट्रहरुलाई छ। यो सबैले बुझ्न सक्ने कुरा हो तर स्वास्थ्य सङ्कटलाई पनि वेवास्ता गर्नु हुँदैन। यो समस्या जादुमयी तरिकाले हट्नेछैन।'
(रासस-सिन्ह्वा)

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।