एजेन्सी- भारत-चीन जारी विवादका बीच अमेरिकी विदेशमन्त्री माइक पोम्पियोको एक वक्तव्य सार्वजनिक भएकाे छ। बिहीबार आफ्नो वक्तव्यमा पोम्पियोले भारत‚ मलेसिया‚ इन्डोनेसिया र फिलिपिन्सलाई चीनबाट हुनसक्ने खतरालाई मध्यनजर गर्दै यूरोपबाट आफ्ना सेना फर्काउने विषयमा समीक्षा गरेका हुन्।
२०२० ब्रसेल्स फोरममा एक प्रश्नको जवाफ दिँदै पोम्पियोले भने‚ ‘हामी पिपल्स लिबरेसन आर्मीसँग सामना गर्नका लागि तयार रहनका लागि सेनालाई आग्रह गर्नेछौं। यो हाम्रा लागि एउटा चुनौती हो। र यसका लागि हाम्रा संशाधन सही स्थानमा प्रयोग गर्नका लागि हामी कटिबद्ध छौं।’
अन्तर्राष्ट्रिय मामिलाका जानकार मुक्तदर खानका अनुसार यो इशारा यूरोपियन गठबन्धनका लागि गरिएको हो। अमेरिकाले दोस्रो विश्वयुद्धपछि जर्मनी र जापानलाई नियन्त्रणमा लिएको थियो। अहिले पनि ती दुई देशमा अमेरिकाको सैन्य समूह उपस्थित नै छ।
खान भन्छन्‚ ‘जर्मनीमा करिब ४० हजार सेना छन् भने ५ हजार अर्धसैनिक बल छ। अर्थात् करिब ६५ हजारदेखि ७० हजारको संख्यामा उनीहरू उपस्थित छन्‚ जसलाई अमेरिका हटाउन चाहिरहेको छ। यसअघि ट्रम्पले ती सेनाहरूलाई पोल्याण्डतर्फ पठाउने संकेत पनि गरेका थिए।’
अन्तर्राष्ट्रिय मामिलाका जानकार हर्ष पन्त भन्छन्‚ ‘यूरोपमा रहेका सैन्य समूहलाई सन्तुलनमा ल्याउनका लागि पूर्व अमेरिकी राष्ट्रपति बाराक ओबामाको समयदेखि नै यो विषयमाथि छलफल चलिरहेको थियो। तर उनले ती सेना भने अन्य देशमा सार्न पाएनन्। ट्रम्प पनि केही समयअघिदेखि यही गर्न चाहिरहेका थिए।’
वक्तव्यको अर्थ के?
पन्त भन्छन्‚ ‘यो एक किसिमले भन्दा यूरोपलाई अमेरिकाको चेतावनी हो। यसबाट अमेरिका चीनलाई पनि चेतावनी दिन चाहन्छ भन्ने अनुमान लगाउन सकिन्छ। यो विषय पहिलेदेखि नै चलिरहेको थियो तर यो वक्तव्यबाट यसको उचित फाइदा ट्रम्पलाई हुने देखिएको छ।’
तर यही विषयमा खान भने कोरोना महामारीबाट ध्यान विचलित गराएर अर्कोतर्फ मोड्नका लागि ट्रम्पले पछिल्लो समय निरन्तर चीनको विरोध गरिरहेको देखाउनका लागि यो सबै गरिरहेको बताउँछन्।
खान भन्छन्‚ ‘यी सैन्य समूहलाई न समुद्रमा लड्ने तालिम नै दिइएको छ न त हिमाली क्षेत्रमा लड्न नै । यो वक्तव्यलाई गम्भीर रूपमा लिनुपर्ने अवस्था छैन।’
खानका अनुसार अमेरिका सैन्य बजेट कम गर्न चाहिरहेको छ। त्यसैले उनीहरू आफ्ना सेनालाई अन्य स्थानमा सार्न चाहिरहेका छन्।
खानका अनुसार मध्य एशियामा अमेरिकाले इरानलाई घेर्नका लागि काजकिस्तान र उज्वेकिस्तानलगायतका केही स्थानमा बेस बनाएको थियो। त्यही बाटो भएर अमेरिका चीनको सीमासम्म आउन सक्ने अन्तर्राष्ट्रिय मामिलाका जानकारहरू बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
