काठमाडौं- बुधबार बसेको स्थायी कमिटीमा बोल्ने पाँचमध्ये चार जना स्थायी कमिटी सदस्यले प्रधानमन्त्री केपी ओलीलाई राजीनामा दिएर मार्ग प्रशस्त गर्न माग गरेका छन्। तीन स्थायी कमिटी दुई आमन्त्रित स्थायी कमिटी गरी पाँच जनामध्ये योगेश भट्टराईले मात्रै प्रधानमन्त्रीको बचाउ गरेका थिए।
बैठकमा बोल्दै स्थायी कमिटी सदस्य मातृका यादवले प्रधानमन्त्री धेरै पटक विवादित भएको भन्दै तत्काल राजीनामा दिनुपर्ने बताए। ‘तपाईं (प्रधानमन्त्री) जत्तिको व्यक्ति धेरै विवादित भएको सुहाउँदैन। तपाईंले अध्यक्ष र प्रधानमन्त्री दुवै पदबाट राजीनामा दिनुस्’, यादवको भनाई उद्धृत गर्दै एक स्थायी कमिटी सदस्यले भने, ‘तपाईंले राजीनामा दिएर बस्दा पनि अपमान गर्दैनौं। पार्टीमा सम्मानै गरेर राख्छौं। तपाईं जत्तिको मान्छे विवादित हुँदा राम्रो भएन।’
प्रधानमन्त्री ओलीलाई ब्यग्य गर्दै बोलेका यादवले पार्टी अध्यक्ष र प्रधानमन्त्री दुवैबाट राजीनामा दिए पार्टी र मुलुकका लागि सबैभन्दा राम्रो हुने बताएका थिए।
अर्का स्थायी कमिटी सदस्य लिलामणि पोखरेलले प्रधानमन्त्री र पार्टी अध्यक्ष जस्तो व्यक्तिले बोल्नै नहुने अभिव्यक्ति दिएको भन्दै आलोचना गरेका थिए। ‘पार्टीमा यस्तो समस्या आउनु वैचारिक सैद्धान्तिक संकटको उपज हो। पार्टीको अध्यक्ष र प्रधानमन्त्री जस्तो पदमा बसेको व्यक्तिले यस्तो भन्न सुहाउँदैन। तपाईंलाई दुवै पदमा बस्न योग्य देखिएन। मार्ग प्रशस्त गर्नुस्’, पोखरेलले भने, ‘पार्टीको घोषणापत्र र संविधान समाजवाद उन्मुख उल्लेख छ। बजेट बनाउन नवउदावादको प्रबर्द्धकलाई दिएपछि यस्तै हुन्छ।’
यस्तै अर्का आमन्त्रित स्थायी कमिटी सदस्य पेशल खतिवडाले प्रधानमन्त्रीले यस्तो अभिव्यक्ति दिनु वैचारिक र सांस्कृतिक विचलनको संकेत भएको बताए। ‘कम्युनिष्ट प्रधानमन्त्री र अध्यक्ष जस्तो व्यक्तिले यस्तो आक्षेप लगाउनु गम्भीर त्रुटि हो’, खतिवडाले भने, ‘प्रधानमन्त्रीज्यूले यस्तो भन्नु पार्टी पद्धति र अनुशासन विपरित हो। त्यो कुनै हालतमा माफ गर्न सकिँदैन।’
केन्द्रीय कमिटीको निर्णय अनुसार एक व्यक्ति एक पदको अवधारणा पार्टीले कार्यन्वयन गरेर जानुपर्ने खतिवडाले बताए।
यस्तै अर्का आमन्त्रित स्थायी कमिटी सदस्य एनके प्रसाईंले पार्टीमा प्रधानमन्त्रीको अभिव्यक्ति गम्भीर भएको भन्दै नैतिक रुपमा सोच्ने अवस्था आएको बताएका थिए।
सबै स्थायी कमिटी सदस्यलाई ५/५ मिनेट मात्रै बोल्ने समय दिएको छ। अर्को स्थायी कमिटी बैठक बिहीबार बिहान ११ बजे बस्ने भएको छ।
योगेश भट्टराईले गरे प्रधानमन्त्रीको बचाउ
स्थायी कमिटी सदस्य योगेशकुमार भट्टराईले पार्टीमा विवाद बढ्दै जाँदा राम्रो संकेत नदेखिएको भन्दै पार्टीलाई विभाजनबाट जोगाउनुपर्ने बताए। कोरोना महामारीमा सरकारले साधन स्रोतले भ्यासम्म काम गरेर देखाएको भन्दै उनले प्रधानमन्त्रीको बचाउ गरेका थिए।
‘कोरोना महामारीले मुलुक आक्रान्त छ। यो बेला सबै एक जुट हुने बेला हो। विवाद बढाउँदै लैजाने होइन’, भट्टराईको भनाई उद्धृत गर्दै एक नेताले भने, ‘मैले के त्याग गर्नुपर्छ गर्न तयार छु। तपाईंले भन्नुस्, त्यही त्याग गर्न तयार छु। तर, पार्टी फुटबाट बचाउँनुपर्यो। यो बेला दुवै अध्यक्ष लगायत शीर्ष नेताज्यूले सोच्ने बेला आयो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
