काठमाडौं– विश्वमा महामारीका रुपमा फैलिएको कोरोना भाइरसका वैदेशिक रोजगारीमा जाने श्रमिकहरुलाई अभिमुखीकरण तालिम प्रदान गर्दै आएको वैदेशिक रोजगार अभिमुखीकरण व्यवसाय ४ महिनादेखि ठप्प छ।
व्यवसाय ठप्प भएकै अवस्थामा असार मसान्तसम्म नगद धरौटीबापत ५ लाख बुझाएको भरपाईसहित नविकरण गर्न वैदेशिक रोजगार विभागले ती अभिमुखीकरण तालिम प्रदायक संस्थाहरुलाई उर्दी जारी गरिसकेको छ।
यसअघि तालिम प्रदायक संस्थाले राखेको १ लाख नगद धरौटीमा थप ४ लाख गरी असार मसान्तभित्रसम्म जम्मा ५ लाख धरौटी नराखे इजाजत स्वतः खारेज हुने व्यवस्था छ।
तर व्यवसायीहरुले तत्काल आफूहरु सो धरौटी रकम राख्न नसक्ने अवस्थामा रहेको बताएका छन्। वैदेशिक रोजगार अभिमुखीकरण व्यवसायी महासंघका अध्यक्ष रामराजा गौतमले यो जटिल अवस्थामा सरकारले धरौटी नराखी इजाजत नवीकरण हुने व्यवस्था गरिदिन आग्रह गरे।
‘४ महिनादेखि व्यवसाय ठप्प छ। हामी थप ४ लाख धरौटी राख्न सक्ने अवस्थामा छैनौं। सरकारले यो आर्थिक वर्षमा पहिलेकै धरौटीमा नवीकरण गरिदिए आगामी आर्थिक वर्षमा हामी थप धरौटी राख्ने थियौं’ महासंघका अध्यक्ष गौतम भन्छन्।
महासंघले श्रम, रोजगार तथा सामाजिक सुरक्षा मन्त्रालयमा पटकपटक आफूहरु तत्काल धरौटी राख्न सक्ने अवस्थामा नरहेको बताए पनि सरकारले आफूहरुको कुरा नसुनेको र जसरी पनि धरौटी राख्नै पनि बाध्यकारी अवस्था सिर्जना गरेको उनको भनाइ छ।
अध्यक्ष गौतम भन्छन्, ‘अहिले राज्यले जबरजस्ती भन्दा पनि व्यवसायीहरुलाई प्रोत्साहन गर्नुपर्ने अवस्था छ तर धरौटी राख नभए खारेज हुन्छ भनेर सरकारले यसरी हामीलाई अप्ठ्यारोमाथि अप्ठ्यारो थपिदिएको छ।’
कोरोनाका कारण वैदेशिक रोजगारी ठप्प भए पनि वैदेशिक रोजगारीको दीर्घकालीन महत्व र आवश्यकता रहेका कारण सरकारले व्यवसायीहरुको संरक्षणमा पनि सोच्नुपर्ने उनी बताउँछन्।
वैदेशिक रोजगारीमा जाने श्रमिकहरुलाई अभिमुखीकरण तालिम प्रदान गर्न हाल देशैभरी १५० वटा संस्थाहरु छन्। उपत्यकामा ९९ वटा र बाँकी ५१ वटा संस्था उपत्यका बाहिर रहेको महासंघका अध्यक्ष गौतमले बताए।
श्रम, रोजगार तथा सामाजिक सुरक्षा मन्त्रालयले भने अभिमुखीकरण तालिम प्रदायक संस्थाहरुको धरौटीको विषय गृहकार्यमै रहेको बताएको छ।
‘यो विषयमा व्यवसायीहरुले कुरा राख्नु भएको छ। के गर्ने भन्ने कुरा गृहकार्यमै छ’ मन्त्रालयका सहसचिव एवं प्रवक्ता सुमन घिमिरेले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
