घोडाघोडी- विश्वभर महामारीका रूपमा फैलिरहेको कोरोना भाइरस समुदायस्तरमा फैलिन नदिन विभिन्न स्थानीय तहले पालिकामा रहेका विद्यालयलाई क्वारेन्टाइनका रूपमा विकास गरेर भारतलगायत विभिन्न ठाउँबाट आएकाहरूलाई व्यवस्थापन गरिरहेका छन्। कैलालीमा विभिन्न पालिकामा स्थापना गरिएका क्वारेन्टाइन मापदण्डअनुसार नहुँदा भने जोखिम बढेको छ।
सुदूरपश्चिममा कोरोना सङ्क्रमण देखिएकाहरू अधिकांश क्वारेन्टाइनमै बसेकाहरू रहेको सुदूरपश्चिम स्वास्थ्य निर्देशनालयका निर्देशक गुणराज अवस्थीले बताए। निर्देशक अवस्थीका अनुसार मापदण्ड विपरीतका क्वारेन्टाइन कोरोना सङ्क्रमणको केन्द्र बनेकाले व्यवस्थित बनाउनुपर्छ।
घोडाघोडी नगरपालिका–३ मा रहेको सरस्वती आधारभूत विद्यालयमा सञ्चालित क्वारेन्टाइनको अवस्था दयनीय छ। एउटै कोठामा १५ जनासम्म बसेका छन्। क्वारेन्टाइन स्थलमा शौचालय नहुँदा राति बाहिर गएर शौचालय गर्नुपर्ने बाध्यता छ। शुद्ध पिउने पानीको अभाव, विद्युत्, गर्मीजस्ता समस्या क्वारेन्टाइनमा रहेको छ। यो घोडाघोडी नगरपालिकाको क्वारेन्टाइनको उदाहरणमात्र हो। नगरपालिकाले पालिकाका सामुदायिक विद्यालय तथा सार्वजनिक भवनलाई प्रयोग गरेर ६५ क्वारेन्टाइन बनाएको छ।
नगरपालिकाले सञ्चालन गरेका एकदुई क्वारेन्टाइनबाहेक हरेकमा समस्या छ। क्वारेन्टाइनको मापदण्ड पूरा नभएका कारण क्वारेन्टाइनबाटै सङ्क्रमण फैलने जोखिम पनि छ। घोडाघोडीमै केही राम्रा व्यवस्थापन भएका क्वारेन्टाइन पनि छन्। नगरपालिका- १० मा रहेको कान्ति माविमा सञ्चालित क्वारेन्टाइनमा बसेकाहरू पारिवारिक वातावरणमा बस्न पाएको बताउँछन्।
क्वारेन्टाइनमा बसेर भर्खरै घर फर्किएका घोडाघोडी–१० का नीरज नेपाली भन्छन्, ‘बिहानै चिया खाजा, अनि खाना दिउँसो खाजा, फेरि साँझ खाना खाइन्थ्यो क्वारेन्टाइनमा, यस्तो राम्रो व्यवस्थापनमा बस्न पाइएला सोचेकै थिएनौं।'
स्वयंसेवकहरूको आत्मीय व्यवहारले क्वारेन्टाइन बसाइ झनै सजिलो भएको नेपालीको भनाइ छ। गौरीगंगा नगरपालिका–९ का तीन विद्यालयमा रहेका क्वारेन्टाइन जिल्लाका अरु ठाउँका भन्दा फरक छन्। त्यहाँका क्वारेन्टाइनको व्यवस्थापनमा युवाहरू स्वतस्फूर्त लागेका छन्।
हरेक क्वारेन्टाइनमा प्रत्येक दिन बिहान योग प्रशिक्षण गराइन्छ। मनोविमर्शकर्ताबाट क्वारेन्टाइनमै मनोपरामर्श दिइन्छ र प्रत्येक दिन बेलुकी शारीरिक व्यायाम गर्न प्रेरित गरिन्छ। वडामा सञ्चालित क्वारेन्टाइन व्यवस्थापनमा लागेका युवाको नेतृत्व गरेका मिलन ओली ‘विपदको बेला सबै एकजुट भएर अघि बढ्नुपर्ने हुँदा युवाहरू मिलेर व्यवस्थापन तथा खटनपटनमा लागेको बताउँछन्।
क्वारेन्टाइनमा बसेकाहरूका लागि मनोविमर्शकर्ताबाटै क्वारेन्टाइन स्थलमै मनोपरामर्शको व्यवस्थापन गर्ने आफूहरु मात्र भएको जिकीर गौरिगंगा–९ का वडाध्यक्ष हरिप्रसाद तिवारीले दाबी गरे।
भारतबाट आउने क्रम बढ्नु तथा देशभित्रै अन्य स्थानबाट जिल्ला भित्रिने क्रमको वृद्धिले क्वारेन्टाइनमा बस्नेको सङ्ख्या एक्कासि बढेपछि मापदण्ड कायम गर्न नसक्दा सामूहिक बसाइले जोखिम बढेको व्यवस्थापनमा लागेकाहरु नै बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751799443.png)
-1749826086.png)
