लकडाउनको समयमा भरपर्दो रोजगारी र आम्दानीको स्रोत नहुनेहरूको पीडा अर्कै छ। कतिका आफन्त परदेशमा छन्। यो माहामारीमा परदेशमा रहेका आफ्ना आफन्तहरूलाई के कसो हुने हो भनेर घरदेशमा हुनेहरूलाई चिन्ता भिन्नै छ। परदेशमा बस्नेहरू पनि घरदेशमा रहेका आफन्तहरूलाई सम्झेर तनावमा छन्। एकातिर कोरोना भाईरसको पीर अर्कोतिर घरदेशकाहरूको पीर।
यही बेलामा एउटा गीत सामाजिक सञ्जाल बढी सुनिन थालेको छ। लेडिज भर्सनमा रहेको 'माथि माथि हिमाली भेगमा, हिउँ पर्यो फुरुरु, परदेशी माया सम्झेर, मन रुन्छ धुरुरु'। टिकटक, विशेष लिप्सिङ गरेर रमाईलो गर्न युवा पुस्ता आकर्षित छ। तर यो गीतमा भने लिप्सिङ गर्नेहरू धरधरी आँसु चुहाएर हेर्नेलाई समेत रुवाईदिन्छन्। हज्जारौँ पटक टिकटकमा सेयर भएको यो गीतले विशेष नेपालको यथार्थलाई छर्लङ्ग पारेको छ।
देशमा भरपर्दो रोजगारी नभएपछि रोजगारी खोज्दै विदेश जाने लाखौँ युवाहरू छन्। साना लालाबालासमेत छोडेर हिँडेका कति हुन्छन् भने कति त बिहेको पर्सिपल्टै हिँड्नेहरू पनि हुन्छन्।
उनीहरूलाई कति चिन्ता हुन्छ होला, घरदेशमा बस्नेहरू पनि कति तनाबमा हुन्छन् होला परदेशिएका आफ्नाहरूलाई सम्झेर।
करिब ३ वर्ष अघि ठ्याक्कै यही पीडा भोगेका हुन् यो गीतका गीतकार तथा संगीतकार डिआर अटुले। ५ वर्ष कोरियामा काम गरेर नेपाल फर्केपछि उनले बिहे गरे। बिहे गरेको केही दिनमै उनी फेरि फर्किए कोरिया। अघिल्लो पटक कोरिया जाँदै गर्दा भन्दा आफ्नी प्रियसीलाई छोडेर हिँड्नु पर्दाको दोस्रो यात्रा उनलाई कठिन लाग्यो। उनलाई छोड्न उनकी प्रियसी विमानस्थलसम्म आएकी थिईन्। 'आँखाभरि आँसु पारेर बसेकी उनले न नजाउ भन्न सकिन्, न उनी म जान्नँ नै भन्न सकेँ,' अटु विगत सम्झन्छन्।
मन निचोरियो, भक्कानो फुट्यो भित्र कतै। आँसु बरररर झर्यो। आँसुले त केही नदेखिँदो रहेछ। अँध्यारो भयो चारैतिर। गलाको पहेँलो खादाले पुछे, आँसु, जसलाई भर्खर उनै प्रियसीले सफलयात्राको कामना गरेर गलामा बेरिदिएकी थिईन्। यसो हेरे, उनी त झन्, मुर्छा हुँलाझै गरेर रोइरहेकी थिइन्। उनीजस्तै सयौँ रोइरहेका थिए आसपासमा, जसका पनि आफ्ना आफन्त लाग्दै थिए परदेश।
'प्लेनमा पनि मन भारी भयो। कोरिया ओर्लेको अनेकौँ दिनसम्म पनि त्यही दृश्यले सताइरह्यो। मन बुझेन अनि झिके डायरी र लेखेँ यो गीत,' उनले भने।
उनी आफैँ व्यस्त संगीताकार। नेपालका चलेका गायकहरूमध्ये अधिकांश गायकहरूसँग काम गरीसकेका छन् उनले। उनले संगीत गरेका दर्जनौँ हिट गीत छन्। तर उनले नवप्रवेशी गायिका बबिना किराँतीलाई चान्स दिए। बबिनाले जादु गरिन् कि गीत हिट बन्यो। उनी पनि यही गीतले हिट भइन्।
झन्डै दुई वर्ष अघि रेकर्ड गरिएको यो गीत एक वर्षसम्म अपेक्षित लोकप्रिय हुन सकेन। गीतका अंशहरू टिकटकबाट सेयर हुन थालेपछि भने हेर्ने दर्शकले युट्युबमा पनि खोजे। टिकटकमा मात्र हज्जारौँले यो गीतको लिप्सिङ अभिनय गरेका छन्। 'रुँदै गरेका अभिनयले मेरो पनि आँसु झर्छ। अनि दु:ख र खुसी सँगै लाग्छ। दु:ख लाग्छ उनीहरूका आँसुले, खुसी लाग्छ आफ्नो गीतलाई माया गरेकाले' डिआर अटु भन्छन्।
विन्ध्यवासिनी म्यूजिक नामक यूट्युब च्यानलमा राखिएको यो गीतलाई १७ लाख बढीले हेरिसकेका छन्। गीतको सुन्दर छायाङ्कन गरिएको छ। जसलाई युवराज वाईबाले निर्देशन गरेका छन्। यो गीतमा अनिश र स्वयम् बबिनाले अभिनय गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
-1788425345.png)
