वीरगञ्जका मेयर भन्छन्- परीक्षण साह्रै कम छ, प्रदेश र संघले सघाएन

कोरोना अपडेट

काठमाडौं- चैत ३० गते वीरगञ्ज महानगरपालिका छपकैयाको एक मस्जिदमा बसेका तीन जनामा कोरोना संक्रमण देखियो। भारतबाट धर्मप्रचारका लागि आएर बसिरहेका २४ जना भारतीय मुस्लिम धर्मप्रचारकमध्ये तीन जनामा कोरोना भाइरसको संक्रमण फेला परेको थियो। हाल छपकैयामा मात्र ४० जना कोरोना संक्रमित रहेका छन्। यो अवधिमा ३ कोरोना जितेर डिस्चार्ज भएका छन् भने अझै ३७ जना नारायणी अस्पतालको आइसोलेसनमा उपचाररत छन्।

नेपालमा लकडाउन शुरु भएकै दिन उनीहरू उक्त क्षेत्रमा आएर बसेका थिए। तीन जनाबाट शुरु भएको कोरोना संक्रमण अहिले पर्सा जिल्लाभर फैलिएको छ। ३ जनाबाट शुरु भएको कोरोना संक्रमण अहिले पर्सा जिल्लामा मात्र ९४ जनामा देखिएको छ।

आइतबार मात्रै पनि पर्सामा ३ जना थपिएका छन्। यसमध्ये दुई जना वीरगञ्ज महानगरपालिकाका बासिन्दा हुन्। सबैभन्दा धेरै संक्रमित रहेको दोस्रो जिल्लाको रुपमा पर्सा भएको छ। प्रदेश २ का सबैभन्दा धेरै संक्रमित भएको जिल्लाको रुपमा पर्सा छ। प्रदेश २ मा अहिले १७९ जना संक्रमित छन्। पर्सामा पत्रकार, स्वास्थ्यकर्मी,सुरक्षाकर्मीदेखि कैदीबन्दीसम्ममा कोरोना संक्रमण देखिइसकेको छ।

अहिलेसम्म वीरगञ्ज महानगरमा मात्र ८५ जना संक्रमित भेटिएका छन्। यीमध्ये दुई जना भारतीय नागरिक हुन्। त्यसमध्ये ७ जना शनिबार नारायणी उपक्षेत्रीय अस्पतालबाट डिस्जार्ज भए। सबैभन्दा धेरै संक्रमित वडा नम्बर ३ छपकैयाका छन्। महानगरको अहिले ४ वटा क्वारेनटाइन चालु अवस्थामा रहेको मेयर विजयकुमार सरावगीले बताए। महानगरले सञ्चालन गरेको क्वारेनटाइनमा २ सय जना रहेको उनले बताए।

‘हामीले धेरै मानिसलाई थुनेर राख्नेभन्दा परीक्षण गर्ने र रिर्पोट नेगेटेभ आए घर पठाउने तथा पोजेटिभ आए अस्पताल पठाउने विधि अवलम्बन गरेका छौँ,’ मेयर सराबगीले भने, ‘विभिन्न जिल्ला र गाउँपालिका मानिसहरुलाई समन्वय गरेर गाडी चढाएर पठाउने गरेका छौँ।’

परीक्षण हुनै सकेन
भारतबाट दैनिक मानिस भित्रने क्रम जारी रहेकाले कोरोना भाइरसको संक्रमित अझै वृद्धि हुने मेयर सराबगीको अनुमान छ। नेपाल भारतको खुल्ला सीमानाका कारण कतिपय मानिसहरु सिधै घरमा जाने र बस्ने गरेका कारण पनि परीक्षण हुन नसकेको उनले स्वीकार गरे। ‘महानगरले भारतबाट आउनेहरुलाई क्वारेनटाइन त राखेको छ तर परीक्षण किटको अभावले धेरैको परीक्षण हुन सकेको छैन,’ उनले भने, ‘परीक्षणका लिइएको नमुनाको पनि ढिलो रिर्पोट आउँदा संक्रमित र अन्यलाई सँगै राख्नुपर्ने बाध्यता रहेको छ।’

परीक्षणमा धेरै समस्या भएको उनले बताए। ‘५ हजार परीक्षण किट मगायो भने ५ सय आउँछ। भित्रै गाउँगाउँमा पुग्न सकेका छैन,’ उनले भने, ‘२ हजार मानिसको मात्र परीक्षण भएको छ, गाउँ गाउँमा मास टेस्टिङ हुनुपर्नेमा त्यो हुन सकेको छैन।’

केन्द्र र प्रदेशको बेवास्ता
भारतबाट नेपाल आउनेको संख्यामा कमी नआएको उनले बताए। व्यवस्थित तरिकाले नेपाल आउने व्यवस्था गर्न केन्द्र र प्रदेश सरकार उदासीन रहेको उनको आरोप छ। ‘यहाँ समस्यै समस्या छ। न परीक्षण किट पर्याप्त छ, त समयमै परीक्षण भएको छ,’ उनले भने, ‘यस्तो समयमा पनि प्रदेश र केन्द्रले स्रोत पनि पठाउँदैन।’

के छ महानगरको तयारी?
महानगरले सक्दो तयारी गरेको उनले दाबी मेयर सरावगीको छ। महानगरले पहिलो संक्रमित फेला परेपछि नै क्वारेनटाइनको तयारी गरेको र कोरोना अस्पताल बनाउने अभियान पनि शुरु गरेको उनको भनाइ छ।

‘हामीले धेरै क्वारनटाइन बनाएर मानिसलाई थुनेर राख्नेभन्दा थोरै बनाउने तर गुणस्तर काम गर्न थाल्यौँ,’ उनले भने, ‘अहिले भारतबाट आएकाहरुको परीक्षण गर्ने र कोरोना देखिए अस्पताल पठाउने नत्र घरमा पठाउने गरेका छौँ।’

गाउँका मानिसहरूलाई सवारी साधनको व्यवस्था गरेर सोही क्षेत्रको क्वारनेटाइनमा बस्ने गरी पठाउने काम पनि गरिहेको उनले बताए। अहिले कोरोनाको संक्रमण हेरेर मानिसहरुलाई आइसोलेनमा राख्ने काम पनि भइरहेको उनले बताए। औषधी खानुपर्ने वृद्धवृद्धा र बालबालिकालाई अस्पतालमा भर्ना गर्ने नत्र अरुलाई सुरक्षित रुपमा क्वारेनटाइनमा राखिरहेको उनको भनाइ छ। अहिले डाक्टर र स्वार्थकर्मीलाई समेत प्रदेश र केन्द्रले नहेरेका कारण आफूहरूले नै व्यवस्था गर्नुपरेको उनको गुनासो छ।

अहिलेसम्म बिरामी नारायणी उपक्षेत्रीय अस्पतालमा राखेको तर अब आफ्नै कोरोना अस्पतालमा राख्ने अवस्थामा पुगेको उनले बताए। ‘अहिले वीरगञ्जमा कोभिड अस्पताल शुरु गरेका छौँ,’ उनले भने, ‘जसमा ७० शय्या छ, अहिले २५ जना बिरामी त्यहाँ छन्।’

नारायाणी अस्पतालमा कोरोना उपचार नगर्ने सरकारको निर्णयपछि त्यसको वैकल्पिक व्यवस्था महानगरले गरेको उनले बताए। त्यस्तै सिद्धार्थ माध्यमिक विद्यालयमा २ सय शय्याको आइसोलेसन पनि निर्माण गरिएको उनले बताए। आवश्यक भएमा त्यसलाई पनि उपयोगमा ल्याइने छ।

‘अस्पतालमा औषधि खाने र बच्चालाई अनिवार्य राख्ने र अरुलाई सामान्य आएसोलेसन बेडमा राखेर उपचार गर्ने महानगरको योजना छ,’ उनले भने ‘ होम क्वारेनटाइन भनेपनि त्यो सम्भव नदेखिएकाले अझ ठूलो विपद् आए होटल प्रयोग गर्ने तयारीमा छौँ।’ क्वारेनटाइनका लागि होटल व्यवसायीसँग पनि महानगरले कुराकानी गरेको उनले बताए।