काठमाडौं- जर्मनमा बुन्डेस लिगा गएको शनिबार सुरु भयो। जसले रोकिएको विश्व खेलकुद गतिविधिमा नयाँ आश सञ्चार गरेको छ। कोरोना महामारिकै बीच सुरु भएको खेलमा स्वास्थ्य सुरक्षाका केही उपाय पनि अनिवार्य अलम्बन गर्न भनिएको छ, जसमा खेलाडीबीच शारीरिक दुरी बनाउने कुरा कठीन देखिएको छ।
बुन्डेस लिगा इन्टरनेसनलका प्रमुख कार्यकारी रोबर्ट केलिनले खेलाडीहरुले कानूनका रुपमा भन्दा पनि आफैले सोचेर व्यक्तिगत रुपमा ती नियमहरुको पालना गर्नुपर्ने बताएका छन्। विशेगा गरी गोलपछिको खुसी साट्ने क्रममा केही खेलाडीहरु अंगालो नै मार्ने गरिरहेका छन्।
‘यसको एउटै उद्देश्य भनेको आवश्यक रुपमा नियमको पालना होस् भन्ने हो। जब खेलाडीले गोल गर्छन् त्यो खुसीमा केही नजिक भएर उत्सव मनाएको देखियो, त्यसलाई नराम्रो भन्न पनि सकिँदैन, तर क्लबले खेलाडीहरुसँग के गर्ने र के नगर्ने भन्ने विषयमा राम्ररी कुराकानी गरिरहेको छ’ उनले भने।
माहामारिमा फर्किएको फुटबल पहिलेको जस्तो लाग्दैन। टेलिभिजनको पर्दामा खेल हेरेका दर्शकलाई पनि एकातिर फुटबल फर्किएको खुशी छ भने अर्कोतिर निरशलाग्दो खेलशैलीले निराशा। मैदानमा खेलाडीलाई देखाउँदा पनि पृष्ठभूमिमा आइरहने ‘मधुरो कोलाहल’ को अर्थ यो समय थाहा भइरहेको छ।
खेलाडीहरु खेलका लागि मैदानसम्म आउँदा पनि शारीरिक दुरी बनाउनका लागि धेरैवटा बसको प्रयोग गरिएको छ। उनीहरु सबैले मास्क लगाएका थिए। खेलमा सहभागी हुनेहरु सबै होटलमा एक हप्ता अनिवार्य क्वारेन्टाइनमा बसेका थिए। र उनीहरुको कोरोना भाइरस परीक्षण नियमित रुपमा भइरहेको थियो।
खेलाडीबाहेक पनि अफिसियल र पत्रकार सबैको परीक्षण गरेर मात्र रंगशाला प्रवेश दिइएको थियो। दर्शकहरुलाई भने नआउन भनिएको थियो। जसका लागि खेल हुने स्थानहरुमा मानिस जम्मा नहुन् भन्नका लागि प्रहरी निगरानी बढाइएको थियो।
खेल भइरहेको समय मैदानमा २ सय १३ जना मात्र उपस्थित हुन अनुमति थियो। जसमा ९८ जनामा खेलाडी, प्रशिक्षक टिम र बल ब्वाइहरु थिए भने बाँकी १ सय १५ जनामा सुरक्षाकर्मी, स्वास्थ्यसम्बद्ध व्यक्ति र सञ्चार माध्यमका मानिस थिए। त्यसबाहेक सुरक्षागार्ड र भिडियो असिस्टेन्ट रेफ्री अपरेटर सहित अरु १ सय ९ जना रंगशालाको बाहिर तैनाथ थिए।
खेल सुरु हुनुअघि र मध्यान्तरमा पनि फुटबल सफा गर्ने काम गरिएको थियो। अतिरिक्त खेलाडीहरु दुरी बनाएर बसेका थिए र सबैले मास्क लगाएका थिए। खेलाडीहरुलाई निर्देशन दिन सजिलो होस् भनेर मुख्य प्रशिक्षकलाई भने मास्क बिना उपस्थित हुनसक्ने अनुमति थियो। खेलाडी परिवर्तनको समय परिवर्तन भएर मैदान पस्ने खेलाडीले मास्क खोल्ने र बाहिर निस्कने खेलाडीलाई मास्क दिइने गरिएको थियो।
गोल गरेपछिको ‘सेलिब्रेसन’मा पनि केही खेलाडीले शारीरिक दुरी बनाएर नै खुसी साटिरहेका देखिन्थे भने केहीले कुइनानेरको भागले एकअर्काको काँधमा हात राखेर खुसी साटिरहेका थिए। जसले गोलको उत्साहलाई मर्न दिइरहेको थिएन। केही खेलाडीले सामान्य अवस्थामा जस्तै गोलपछि एकअर्कालाई अंगालोसमेत मारेका थिए।
फिफाले ९० मिनेटको समयमा नै पाँच खेलाडी परिवर्तन गर्न पाउने नयाँ नियम बनाएकाले त्यसैअनुसार गरिएको थियो।
अर्को रोचक पक्ष के देखियो भने खेलाडीहरु दर्शक नभएको स्टेडियमतिर फर्किएर अभिवादन गरिरहेका देखिन्थे। जसमा बोरुसिया डर्टमुन्डका खेलाडीहरुले रंगशालाको दक्षिण क्षेत्रतर्फ फर्किएर दर्शकलाई अभिवादन गरेका थिए। वुल्फ्सवर्गका खेलाडीहरुले हात मिलाउनको सट्टामा खुट्टा जुधाएर भेट गरिरहेका थिए।
खेल गर्ने समय रंगशाला बाहिर नै पनि धेरै दर्शक उपस्थित भइदिएर अप्ठ्यारो पर्ने हो कि भन्ने अनुमान पनि गलत देखिएको छ। बुन्डेस लिगाका खेल भएका रंगशाला बाहिरका दृश्य पनि शान्त थियो। दर्शकहरु जम्मा भएका थिएनन्।
फुटबलले जीवन दिने भए पनि अहिले हतारमा लिग सुरु गर्नु व्यापार मात्र हेरिनु भएको भन्दै अग्सवर्गका केही समर्थकले रंगशालामा व्यानर राखेर विरोध पनि गरेका थिए। त्यसबाहेक पनि अनौठो परिस्थितिमा भइरहेको खेलले प्रशिक्षकहरु नै खुसी थिएनन्।
प्याडेरबर्नसँगको गोलरहित बराबरीपछि डसेलड्रफका प्रशिक्षक रोस्लरले भनेका थिए– ‘आजको दिन अलि अनौठो भयो, म अलि भावुक मान्छे छु, खेलाडीहरुलाई अँगालो हालेर हौसला दिन राम्रो लाग्छ जुन मैले आज गर्न पाइनँ।’
डर्टमुन्डका प्रशिक्षक लुसियनले भनेका छन्– ‘मैदानमा कुनै हल्ला थिएन, गोलमा तपाइँ एक्लै कराएको जस्तो सुनिन्छ, उत्कृष्ट पास दिएर उत्कृष्ट गोल गरिएको छ तर पनि केही नभएको जस्तो भइरहेको छ।’
अब आउने हप्ता हुने खेलहरुमा अहिलेको हप्ताबाट पनि केही सुधार हुने अपेक्षा गरिएको छ। त्यसका लागि क्लब र खेलाडीहरु नियमित कुराकानीमा छन्। जर्मनबाट नै युरोपका अरु लिगले पनि सिको गर्ने देखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778409050-1778409499.jpeg)
-1764146706.png)
