पानीमै पिच नगर्ने कि [फोटो फिचर]

समाज

पानीमै पिच नगर्ने कि [फोटो फिचर]

ऋग्वेद शर्मा/शिव बोहरा आइतबार, वैशाख २८, २०७७, १४:१०

काठमाडौं- आइतबार बिहान साढे ११ बजेतिर सिफल-मित्रपार्क क्षेत्रमा धमाधम पिच (ओभरले) गर्ने काम भइरहेको थियो। त्यति नै बेला सिमसिम पानी समेत परिरहेको थियो। सिमसिम पानीकै बीच पिचको काम जारी थियो।

काठमाडौं उपत्यकामा पछिल्लो समय सडक स्तरोन्नती गर्ने कार्य तीब्र रुपमा भइरहेको छ। भौतिक पूर्वाधार तथा यातायात मन्त्रालयको जिम्मेवारी बसन्तकुमार नेम्वाङले सम्हालेसँगै सडक स्तरोन्नतीको कामले तीब्रता पाएको हो। त्यसमा अहिले लकडाउनको समयको उपयोग पनि भइरहेको छ।

भौतिक पूर्वाधा मन्त्रालय, सडक विभाग र सडक डिभिजन कार्यालय काठमाडौंले सडक स्तरोन्नती गर्ने काम गर्दै आएको छ। कोरोना भाइरसका कारण चैत ११ देखि देश लकडाउनमा रहेकाले केही सयमदेखि रोकिएको काम पुनः सुरु भएको हो। भौतिक मन्त्रालयले कोरोना भाइरस रोकथाम समितिबाट स्वीकृत गराइ विकास निर्माणको काम पुनः सुरु गर्न निर्देशन दिएको थियो।

त्यही अनुरुप काठमाडौं उपत्यका तथा देशका विभिनन स्थानमा कामदार, निर्माण सामाग्रीको उपलब्धतालगायतका आधारमा काम थालिएको हो। आयोजना तथा निर्माण कम्पनीहरुले विश्व स्वास्थ्य संगठन र सरकारले तोकेको स्वास्थ्य मापदण्ड पुरा गरि काम गरिरहेका छन्। त्यस्तै निर्माण सामाग्रीको व्यवस्थापनका लागि स्थानीय सरकारसँग समन्वय गरेर ल्याउनु पर्नेछ।

सिफल–मित्रपार्क क्षेत्रमा पिच भइरहँदा पानी गरिरहेको थियो। ठेकेदार कम्पनीले पानीले ल्याएको हिलो पखाल्ने प्रयास पनि गरिरहेको देखिन्छ। तर पानीमा पिच गर्दा ‘हतारको काम लतार’ हुने डर पनि छँदैछ।