काठमाडौं- नयाँ फुटबल सिजनमा महँगा ट्रान्सफर कठीन देखिए पनि फुटबल जगतमा खेलाडी किनबेचलाई लिएर केही चर्चा, केही हल्ला र अनुमानहरु हुन थालेका छन्।
गएको सिजनमा नै क्लब छाड्न चाहेका केही खेलाडी र ठूला क्लबले संकटकै समयमा पनि खोजिरहेका नयाँ खेलाडीले ट्रान्सफर समय केही रोचक हुने देखिएको छ।
कोरोना भाइरस (कोभिड १९) का कारण अहिले क्लबहरु आर्थिक संकटमा छन्। खेलाडीको तलब कम गर्नेदेखि केही क्लबले कर्मचारी कटौती गर्ने निर्णयहरु पनि गरिरहेका छन्। यस्तोमा केही क्लब भने नयाँ सिजनको ट्रान्सफरलाई लिएर पनि तयारीमा लागेका छन्।
हुन पनि युरोपियन फुटबल बजारलाई हेर्ने हो भने त संकटको यो समयमा पनि समाचारका अनलाइन पोर्टल हुन् वा पत्रिकाका स्पोर्टस् कोलम ‘ट्रान्सफर चर्चा’ सबैभन्दा बढी पढिने सामाग्री बनिरहेका छन्।
अहिले खेल ठप्प हुँदा टिकट बिक्री छैन। व्यापारिक प्रायोजनहरु आउन सकेका छैनन्। २०१९–२०२० कै सिजन बीचका अड्किएको छ। च्याम्पियन्स लिग र युरोपा लिग जस्ता प्रतियोगिता पनि कमजोर स्थितिमा देखिन्छ। तर पनि बोरुसिया डर्टमुन्डका विंगर जाडन सान्चोमाथि एक सय मिलियन पाउण्ड र टोटनह्यामका ह्यारी केनमाथि दुई सय मिलियन पाउण्डको मूल्य तोक्न बजार सक्रिय भइरहेको छ।
तर अहिलेको अप्ठ्यारो परिस्थितिले सबैभन्दा ठूलो धक्का दिने ठाउँ खेलाडी ट्रान्सफर पनि हो। यसले सबैभन्दा बढी असर त लिगका तल्ला क्लबहरुलाई गर्नेछ। फुटबल अब्जरभेटरीको ए्उटा अध्ययन अनुसार अहिलेको परिस्थितिमा युरोपका ठूला पाँच लिगमा खेलाडी किनबेचमा २० देखि ३० प्रतिशतले मूल्यमा कमि आउनेछ।
तर क्लबहरुमा देखिएको संकटको अवस्थामा पनि महँगा खेलाडीको किनबेच चर्चामा भने कमि आएको छैन।
फ्रेन्च क्लब पेरिस सेन्ट जर्मेन (पिएसजी) ले प्रिमियर लिग क्लब म्यानचेस्टर युनाइटेडबाट पोउल पोग्बालाई ल्याउने चर्चा चलिरहेको छ। जसका लागि पिएसजीले आफ्ना खेलाडी एन्जेल डि मारियालाई प्रयोग गर्ने संकेतहरु आइरहेका छन्।
पिएसजीकै नेमार भने गएको सिजनदेखि नै बाहिरिन खोजिरहे पनि महँगो रकमका कारण अप्ठ्यारोमा परिरहेका छन्। नेमारलाई ल्याउन स्पेनिस क्लब रियल मड्रिडका अध्यक्ष फ्लोरेन्टिनो पेरेज नै लागिपरेको पनि बताइन्छ। तर नेमार गएको सिजनदेखि नै बार्सिलोनामा आउने प्रयासमा लागिरहेका थिए।
आर्सनलका इमिरिक, बोरुसिया डर्टमुन्डका सान्चो, पिएसजीका थोमस, लिसेस्टर सिटीका जेम्स म्याडिसन, लिलेका स्ट्राइकर भिक्टोरी ओसिमहेन, एथ्लेटिको मड्रिडका थोमस पार्टी जस्ता खेलाडी नयाँ सिजनमा क्लब परिवर्तन हुने चर्चा चलिरहेको छ।
यस्तोमा म्यानचेस्टर युनाइटेडका कार्यकारी उपाध्यक्ष एड उडवार्ड भने खेलाडी किनबेचमा ठूला रकमको चर्चा गरेर अहिलेको परिस्थितिले फुटबलमा पारेको गहिरो असरलाई वेवास्था गर्न नहुने बताइरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791212224.jpg)
-1786602170.png)
-1791090469.jpeg)
