नयाँ बजेटमा श्रम : प्रधानमन्त्री रोजगार कार्यक्रम पहिलो प्राथमिकतामा

अर्थ समाचार

निर्मला घिमिरे बिहीबार, वैशाख ११, २०७७ ०९:४०

काठमाडौं- आन्तरिक रोजगारी सिर्जना र उद्यमशीलतालाई प्राथमिकतामा राख्दै श्रम, रोजगार तथा सामाजिक सुरक्षा मन्त्रालयले आगामी आर्थिक वर्षको बजेट छलफल अघि बढाएको छ।

कोरोना भाइरसको संक्रमणसँगै विश्वव्यापी रुपमा रोजगारी कटौती हुने र नेपालीहरु पनि बेरोजगार हुने अवस्था आउन सक्ने भएकाले रोजगारी सिर्जना गर्ने र उद्यमशीलता प्रवर्द्धन गर्ने कार्यक्रम समावेश गरेर बजेटको छलफल अघि बढाइएको मन्त्रालयले जनाएको छ।

आन्तरिक रोजगारी प्रवर्द्धनका लागि नीतिगत र कार्यक्रमगत व्यवस्थाका लागि छलफल भइरहेको मन्त्रालयका सहसचिव एवं प्रवक्ता सुमन घिमिरेले जानकारी दिए। 'कोरोनाका कारण यसअघि सोचिएको भन्दा अवस्था फरक भएको छ,' उनले भने, 'हामीले फरक हिसाबले सोचिरहेका छौँ, हाम्रो प्राथमिकता रोजगारी सिर्जना र उद्यमशीलता प्रवर्द्धन नै हो।'

'हामीले बजेटमा आन्तरिक रोजगारीलाई बलियो बनाउने, विदेशबाट फर्केर आएकाहरुको सीप स्वदेशमै परिचालन गर्ने, उनीहरूमा उद्यमशीलता विकास गर्ने तथा श्रमिकहरुलाई सीप तथा तालिम प्राथमिकतामा राखेका छौँ, ' सहसचिव घिमिरेले नेपाल लाइभसँग भने।

त्यस्तै वैदेशिक रोजगारीको पाटोलाई सहज बनाउन गन्तव्य मुलुकसँग श्रम सम्झौता/ समझदारीलाई जोड दिने तयारी पनि मन्त्रालयले गरेको उनले जानकारी दिए। निजी क्षेत्रका श्रमिकलाई सामाजिक सुरक्षा कोषमा आबद्ध गराउन प्रवर्द्धनात्मक कार्यक्रम ल्याउने पनि मन्त्रालयले जनाएको छ।

प्रधानमन्त्री रोजगार कार्यक्रम प्राथमिकतामा

गत वर्षबाट सुरु भएको प्रधानमन्त्री रोजगार कार्यक्रमलाई प्राथमिकतामा राखेर बजेट तयार हुने मन्त्रालयले जनाएको छ। गत आर्थिक वर्षमा ३ अर्ब रुपैयाँ छुट्याइएको यो कार्यक्रमलाई यो वर्ष ५ अर्ब रुपैयाँ बजेट विनियोजन गरिएको छ। गत वर्षको पैसा खर्च भए पनि चालु वर्षमा भने खर्च हुन सकेको छैन। सरकारले यही कार्यक्रमका लागि विश्व बैंकसँग १३ अर्ब रुपैयाँ ऋण पनि लिएको छ।

५ वर्षभित्र आन्तरिक रोजगारीलाई प्रवर्द्धन गरी वैदेशिक रोजगारीलाई सुरक्षित, व्यवस्थित र मर्यादित बनाउन सरकारले लिएको नीतिलाई सफल बनाउन मन्त्रालयले बजेटमा पनि 'प्रधानमन्त्री रोजगार कार्यक्रम' लाई विषेश प्राथमिकताका साथ स्थान दिइएको उल्लेख गरेको छ।

मन्त्रालयका सहसचिव तथा प्रधानमन्त्री रोजगार कार्यक्रमका निर्देशक रामचन्द्र ढकाल भन्छन्, 'सरकारले आन्तरिक रोजगारी प्रवर्द्धनलाई प्राथमिकतामा राखेको छ। श्रम मन्त्रालयका लागि छुट्याइने कुल बजेटको आधा बजेट प्रधानमन्त्री रोजगार कार्यक्रमलाई छुट्याउने छलफल भइरहेको छ।'

स्थानीय तहमार्फत् यो वर्षको प्रधानमन्त्री रोजगार कार्यक्रम सुरु हुनै लागेको अवस्थामा विश्वमा फैलिएको कोरोना भाइरस संक्रमणका कारण रोकिएको छ। अवस्था कहिले सामान्य हुने हो र कार्यक्रम सुरु गर्ने भन्ने विषय अन्याेलमा छ।

कोरोनाका कारण वैदेशिक रोजगारीमा गएका लाखौं नेपाली युवाहरु रोजगारी गुमाएर फर्किने अवस्था छ। देश देशभित्रै पनि लाखौंको संख्यामा बेरोजगारी समस्या थपिने पक्का छ। जसले गर्दा पनि प्रधानमन्त्री रोजगार कार्यक्रमलाई विषेश प्राथमिकताका साथ राखिएको मन्त्रालयले जनाएको हो