राजनीति

‘अपहरित’ सांसद बालुवाटारमा

नारायण अधिकारी बुधबार, वैशाख १०, २०७७ २२:३६

काठमाडौं- समाजवादी पार्टीका तर्फबाट राज्य पक्षले नै अपहरण गरेको आरोप लगाइएका पूर्व राज्यमन्त्री तथा सांसद डा सुरेन्द्रकुमार यादव केहीबेर अघि प्रधानमन्त्री निवास बालुवाटार प्रवेश गरेका छन्।

यादवलाई नेपाल प्रहरीका एक पूर्व उच्च अधिकारी र नेकपाका अध्यक्ष तथा प्रधानमन्त्री केपी शर्मा ओली निकटका एक सांसद र अर्का एक जना भएर गाडीमा हालेर जनकपुरबाट काठमाडौं ल्याएका हुन्।

बलजफ्ती गाडीमा हालेर ल्याएका यादवलाई केही बेरअघि प्रधानमन्त्री निवास बालुवाटारमा प्रवेश गराइएको स्रोतले नेपाल लाइभलाई जानकारी दियो।

स्रोतले भन्यो, ‘यादवलाई भर्खरै बालुवाटार प्रवेश गराएर प्रहरीका एक पूर्वउच्च अधिकारी बाहिरिइसकेका छन्।’

जनकपुरबाट साँझ ५ बजे यादवलाई गाडीमा हालेर उनीहरु काठमाडौंतर्फ प्रस्थान गरेका थिए। त्यसपछि उनीहरुले महोत्तरीको बर्दिबासस्थित गौतम होटलमा केही समय आराम गरेको स्रोतले नेपाल लाइभलाई जानकारी दियो।

बर्दिबासबाट हिँडेका उनीहरु साढे १० बजे राति बालुवाटार पुगेका थिए।

समाजवादी पार्टीका केन्द्रीय सदस्य समेत रहेका यादवलाई प्रधानमन्त्री केपी शर्मा ओलीको ठाडो आदेशमा बुधबार साँझ ५ बजे निवासबाट अपहरण शैलीमा प्रहरीले उठाएको समाजवादीका प्रचार उपप्रमुख विश्वदीप पाण्डेले सामाजिक सञ्जाल ट्विटरमा लेखेका थिए ।

काठमाडौवाट गएको प्रहरीको टोलीले जनकपुरबाट अपहरण गरेको र पार्टी फुटाउने प्रयोजनका लागि यस्तो गरिएको दाबी पाण्डेको छ।

दुई दिनअघि मात्र सरकारले राजनीतिक दलसम्बन्धी अध्यादेश जारी गरेको थियो। संसदीय समिति वा केन्द्रीय समितिमध्ये एकमा ४० प्रतिशत पुर्‍याएर दल विभाजन गर्न सकिने व्यवस्था संशोधन गरिएको थियो। उक्त अध्यादेश जारी भएपछि मधेश केन्द्रितसहित नेकपाभित्रै नै पार्टी विभाजन हुने हल्ला चलेको थियो।

यादव महोत्तरीबाट निर्वाचित प्रतिनिधिसभा सदस्य हुन्। यादव ओली सरकारकै पालामा स्वास्थ्य राज्यमन्त्री बनेका थिए।