नेकपा सांसद्हरूलाई पछिल्ला २ अध्यादेशबारे ब्रिफिङ गर्दै अध्यक्ष केपी शर्मा ओली। तस्बिर : प्रधानमन्त्रीको निजी सचिवालय
काठमाडौं- भर्खरमात्र दुई अध्यादेश जारी गरेर राजनीतिक तरंग सिर्जना गरेको प्रधानमन्त्री केपी शर्मा ओलीले नेपाल कम्युनिस्ट पार्टी (नेकपा)का सांसदहरूलाई बालुवाटार बोलाएर ब्रिफिङ गरेका छन्। सत्तारूढ दल नेकपाका अध्यक्षद्वय केपी शर्मा ओली र पुष्पकमल दाहाल ‘प्रचण्ड’ले आफ्ना सांसदहरूलाई विवादित अध्यादेश र पछिल्लो घटनाक्रमका बारेमा ब्रिफिङ गरेका हुन्।
बुधबार बिहान सुदूरपश्चिमका सांसदहरूलाई प्रधानमन्त्री निवास बालुवाटारमा बोलाएका थिए। बैठकमा पछिल्लो घटनाक्रमका बारेमा छलफल भएको सहभागी एक सांसदले बताए। बैठकमा प्रधानमन्त्री आपूर्तिमन्त्री लेखराज भट्ट र स्थायी कमिटी सदस्य भीम रावललगायतको उपस्थित थियो।
बैठकमा प्रधानमन्त्रीले ५ वटा विषयमा जोड दिएर सांसदहरुलाई ब्रिफिङ गरेका थिए। प्रधानमन्त्रीले लक डाउन लम्बिनेदेखि संसदको बजेट अधिवेशन ढिलो हुने र दुई अध्यादेश र पार्टी विभाजनको बारेमा सांसदहरुलाई आश्वस्त पार्ने प्रयास गरेका थिए।
दुई अध्यक्षले प्रदेश–प्रदेशका सांसदलाई फरकफरक समयमा बोलाएर विकसित पछिल्लो राजनीतिक घटनाक्रमबारे ब्रिफिङ गरिरहेका प्रधानमन्त्रीका प्रेस सल्लाहकार सूर्य थापाले जानकारी दिए।
थापाका अनुसार सुदूरपश्चिम प्रदेशका सांसदहरूसँगको छलफल सकिएको छ भने प्रदेश १ का सांसदहरूसँग छलफल चलिरहेको छ। यो दिनभर चल्ने उनले जानकारी दिए। ब्रिफिङका क्रममा प्रधानमन्त्री ओलीले अध्यादेश ल्याउनु नियमित प्रक्रिया भएको भन्दै आफ्नो कदमको बचाउ गरेका छन्।
‘नियमित रुपमा अध्यादेश ल्याएको र दल विभाजनमा ४० प्रतिशत हुँदा र नहुँदा केही फरक नपर्ने प्रधानमन्त्रीको भनाइ थियो,’ सांसद निरुदेवी पालले जानकारी दिइन्। बैठकमा सहभागी नेताका अनुसार प्रधानमन्त्रीले ब्रिफिङ गरिहँदा अर्का अध्यक्ष दाहाल भने मुसुक्क हास्ने तर केही बोलेनन्।
बैठकमा नेकपा संसदीय दलका उपनेता सुवास नेम्बाङ र प्रमुख सचेतक देव गुरूङ पनि सहभागी छन्।
नाका तत्काल खु्ल्दैन
ब्रिफिङका क्रममा प्रधानमन्त्री ओलीले तत्काल भारतसँगको नाका तत्काल खोल्न नहुने धारणा राखेका छन्। ‘भारतसँगको नाका अहिले नै खोल्ने अवस्था छैन। देशभित्र लकडाउन लम्बिन सक्छ,’ प्रधानमन्त्री ओलीको भनाइ उद्धृत गर्दै सांसद प्रेम आलाले भने। केही सांसदहरूले अध्यादेश मन्त्रिपरिषद्ले पास गरेको केही बेरमै राष्ट्रपतिले किन हस्ताक्षर गर्नुभयो? भनेर प्रश्न गरेका थिए।
जवाफमा प्रधानमन्त्री ओलीले सरकारले पठाएपछि तुरुन्त र ढिलाको कुरै नहुने बताए। संवैधानिक परिषद्सम्बन्धी अध्यादेशको बचाउ गर्दै प्रधानमन्त्री ओलीले प्रमुख प्रतिपक्षी दलका कारण गर्नुपर्ने धेरै नियुक्ति रोकिएकाले अहिलेको अवस्था आएकोले यस्तो अध्यादेश ल्याएको बताए।
‘प्रतिपक्षी दलले जेमा पनि भाग खोज्न थाल्यो। सरकारले गर्नुपर्ने धेरै काम रोकिका छन्,’ उनले सांसदलाई भने, ‘नियुक्ति हुन नदिने भएपछि अध्यादेश ल्याउनु परेको हो।’
रावलले मागे अलग्गै समय
सांसद भीम रावलले आफूले समय पाए केही सैद्धान्तिक र नीतिगत कुरा गर्न खोजेको बताएका थिए। तर प्रधानमन्त्री ओलीले उनलाई अहिले त्यस्तो कुरा गर्ने समय नभएको भनेर टारिदिए। उनले अलग्गै समय पाउन समेत माग गरे।
सांसदहरूले महाकालीपारि भारतीय भूमिमा रहेका नेपालीहरूलाई घर फर्काउनेबारे पनि कुरा राखेका थिए। प्रधानमन्त्री ओलीले सरकारले त्यसबारे पनि सोचिरहेको जवाफ दिएका थिए।
प्रधानमन्त्री ओलीले कोरोनाभाइरसविरूद्धको लडाइँमा सांसदहरूलाई पनि केही भूमिका दिने तयारी आफूले गरेको भन्दै तयार रहन सांसदहरुलाई आग्रह गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
