कोरोना अपडेट

दिल्लीको धार्मिक सभाबाट फर्किएका ६ जनालाई प्रहरीले पठायो क्वारेन्टाइन

दिनेश शर्मा बुधबार, चैत १९, २०७६ १५:५४

राजविराज– भारतको दिल्लीस्थित निजामुद्दीन मस्जिदमा आयोजित धार्मिक सभामा सहभागी भएर फर्किएका ६ जनालाई सप्तरीमा प्रहरीले नियन्त्रणमा लिएर क्वारेन्टाइनमा पठाएको छ।

कोरोना भाइरसका कारण ६ जनाको मृत्यु र ४० भन्दा बढीमा संक्रमण भेटिएपछि धार्मिक सभाका सहभागीको खोजी गर्ने क्रममा उनीहरुलाई नियन्त्रणमा लिएर क्वारेन्टाइन पठाइएको प्रहरीले जानकारी दिएको छ। दिल्लीको कार्यक्रममा सहभागी भई फर्किएर घरमै बसेको सूचनाका आधारमा उनीहरूलाई नियन्त्रणमा लिएर पठाउनु परेको सप्तरीका डिएसपी तिलक भारतीले बताए।

उनीहरु राजविराजकै स्थायी बासिन्दा भएको प्रहरीले जनाएको छ। कार्यक्रममा सहभागी भएकामध्ये केही व्यक्ति अझै लुकेर बसेको हुन सक्ने आशंकामा खोजी कार्य भइरहेको भारतीको भनाई छ। ‘यति नै संख्या हो भन्ने एकिन छैन, तर खोजी भइरहेको छ,’ उनले भने, ‘फेला परे जति सबैलाई क्वारेन्टाइनमा पठाउँछौं।’

दिल्लीको धार्मिक सभामा सप्तरीसहित विभिन्न स्थानका १९ नेपाली समेत सहभागी भएको चर्चा सुरु भएपछि स्थानीय प्रशासनले खोजी सुरु गरेको हो।

स्थानीयवासीका अनुसार दिल्लीको उक्त धार्मिक सभामा सहभागी भएका कतिपय व्यक्ति अझै बाँकी छन्। लुकेर बस्नेमा जनप्रतिनिधिदेखि सर्वसाधारणसमेत रहेको बताइएको छ।

छिन्नमस्ता गाउँपालिकासहित अन्य स्थानीय तहमा पनि उनीहरुको खोजी गर्नुपर्ने स्थानीयको माग छ। सोही कार्यक्रम अन्तर्गत नेपालसहित भारतको विभिन्न स्थानमा भ्रमण गरेर फर्केका ९ जनालाई तीन दिन अघिदेखि नै बोदेबरसाईन–५, जाँजरस्थित क्वारेन्टाइनमा राखिएको छ। ९ मध्ये सुनसरीको भोक्राहाका १, सिरहाको रमौलाका १ र अन्य सप्तरीका छन्। एक जना राजविराज र अन्य वोदेवरसाईनकै वासिन्दा रहेको बोदेबरसाइन नगरपालिका ५ का वडाध्यक्ष मो. मजिबुर रहमानले बताए।

उनीहरूको प्राथमिक स्वास्थ्य जाँचका क्रममा कुनै समस्या नदेखिएको र तापक्रमसमेत सामान्य रहेको उनको भनाइ छ। उनीहरू दिल्लीको कार्यक्रममा नभई नेपाल तथा भारतका सीमा आसपासका क्षेत्रको भ्रमण गरेर फर्केको मजिबुरको दाबी छ।

‘चार महिनाअघि गएकाहरू दिल्लीको कार्यक्रममा सहभागी भएका थिए,’ उनले भने, ‘क्वारेन्टाईनमा राखिएकाहरू ४० दिने कार्यक्रम ९जमात० मा सहभागी भएका हुन्, उनीहरु दिल्ली गएनन्।’

उक्त भेलामा नेपालबाहेक मलेसियाका २०, अफगानिस्तानका एक, म्यानमारका ३३, किर्गिस्तानका २८, इन्डोनेसियाका ७२, थाइल्याण्डका ७, श्रीलंकाका ३४, बंगलादेशका १९ र अन्य देशका तीन सयभन्दा बढी सहभागी रहेको भारतीय सञ्चारमाध्यमहरुले जनाएका छन्।