दैनिक मजदुरी गर्नेलाई राहत प्याकेज उपलब्ध गराउने सुदूरपश्चिम सरकारकाे निर्णय

कोरोना अपडेट

शेरबहादुर ऐर शनिबार, चैत १५, २०७६ १४:०५

काठमाडाैं- सुदूरपश्चिम प्रदेश सरकारले कोरोना भाइरसको जोखिम नियन्त्रण, रोकथाम तथा व्यवस्थापन कोष स्थापना गर्ने निर्णय गरेको छ। शनिबार बसेको प्रदेशको मन्त्रिपरिषद्‍को बैठकले काेषमा प्रदेश सरकारले ४० करोड रकम जम्मा गर्ने निर्णय गरेको आन्तरिक मामिला तथा कानुनमन्त्री प्रकाशबहादुर शाहले पत्रकार सम्मेलनमा जानकारी दिए।

मन्त्री शाहले सो कोषमा सर्वसाधारण तथा संघसंस्थालाई राहत जम्मा गर्न अपिल गर्ने बताए। सेती प्रादेशिक अस्पताललाई कोरोना रोगको उपचारका लागि डेडिकेटेड अस्पतालका रुपमा तोक्ने निर्णय गरेको छ। यस्तै प्रदेशका विभिन्न गतिविधिको समन्वय तथा व्यवस्थापन गर्न पनि जिम्मेवारी तोकिएको छ।

प्रदेशको शान्ति सुरक्षा तथा सोसँग सम्बन्धित विषयमा आन्तरिक मामिला तथा कानुनमन्त्री, प्रदेशको स्वास्थ्यसँग सम्बन्धित क्रियाकलाप सामाजिक विकासमन्त्री, खाद्यान्न तथा इन्धन आपूर्ति उद्योग, वन वातावरण तथा पर्यटनमन्त्री, आर्थिक स्रोत तथा व्यवस्थापनको जिम्मेवारी आर्थिक मामिला तथा योजनामन्त्री, क्वारेन्टाइन राखिएका स्थानमा विजुली, पानी, शौचालयको व्यवस्थापन भौतिक पूर्वाधारमन्त्रीले गर्ने निर्णय भएको छ।

कोरोना भाइरसको नियन्त्रण तथा व्यवस्थापनका लागि प्रदेश तथा स्थानीय तहसँग समन्वय सहकार्य र सहयोग गर्न नीजि अस्पतालहरुलाई अपिल गर्ने निर्णय भएकाे छ।

यसैगरी, दैनिक मजदुरीमा निर्भर वर्गलाई राहत प्याकेज उपलब्ध गराउने पनि निर्णय भएको छ। राहतका लागि आर्थिक मामिला तथा योजना मन्त्रालयले संघीय सरकार तथा स्थानीय तहलाई समन्वय गर्ने गरी कार्य अघि बढाउने मन्त्री शाहले बताए।

कोरोना भाइरस (कोभिड–१९) सम्बन्धी क्वारेन्टाइन सञ्चालन तथा व्यवस्थापन मापदण्ड २०७६ लाई कार्यान्वयन गर्न आन्तरिक मामिला तथा कानुन मन्त्रालय र सामाजिक विकास मन्त्रालयबीच समन्वय गर्ने निर्णय भएको छ। सेती प्रादेशिक अस्पतालमा कोरोनाकाे परीक्षण गर्ने गरी प्रयोगशालाको व्यवस्थापन गर्ने र डोटी तथा बैतडीमा पनि ल्याब स्थापनाको कार्यलाई अघि बढाउने निर्णय भएकाे छ।