काठमाडौं- कोरोना भाइरस (कोभिड १९) का कारण विश्व फुटबल ठप्प छ। रोकिएका लिगहरु कहिले कसरी सुरु हुन्छन् भन्ने ठेगान छैन। केही खेलाडी र प्रशिक्षकमा पनि संक्रमण देखिएको छ। यसैले खेलाडीहरु ‘सेल्फ क्वारेन्टाइन’ मा छन्।
महत्वपूर्ण लिग फुटबलहरु स्थगित छन्। अन्य गतिविधि ठप्प छन्। जसले गर्दा केही क्लबले खेलाडीको तलब घटाउने घोषणा गरिसकेका छन् भने आउँदो सिजन हुने ट्रान्सफरमा पनि असर पर्ने देखिएको छ।
कोरोना संक्रमणकै कारण युरोकप फुटबल सरेको छ, च्याम्पियन्स लिग, युरोपा लिगसँगै क्लब विश्वकप जस्ता ठूला प्रतियोगिताहरु सरेका छन्। खेल गतिविधि बन्द हुँदा क्लबको आयको माध्यम पनि कमजोर भएको छ। फुटबल जगतमा कल्पना गरिएभन्दा खराब स्थिति देखिएका छन्। विश्व फुटबलको सर्वोच्च निकाय फिफाले क्लबहरुलाई समेत सहज हुनेगरी केही नियम ल्याउने तयारी पनि गरिरहेको छ।
रोकिएका लिगहरु कसरी सकाउने भन्ने विषयमा छलफलहरु देखिएका छन्। पहिलो त कोरोना भाइरसको संकट टरेपछि रोकिएको खेल सुरु गर्ने विषयमा छलफल केन्द्रित देखिन्छ। अर्को त अवस्था केही साम्य भएपछि बन्द रंगशालामा खेल गर्ने भन्ने विषयमा पनि कुराकानी भइरहेका छन्। च्याम्पियन्स लिग र युरोपा लिग जस्ता प्रतियोगिताको नकआउट चरण दुई लेगमा नगरी एक खेलमा नै निर्णय गर्ने गरी युरोपियन फुटबलको प्रशासकीय निकाय युइएफएले तयारी गरिरहेको छ।
च्याम्पियन्स लिग र युरोपा लिगबाहेक पनि युरोपभर लिग फुटबलले आफ्नो विजेता टिम पाएको छैन। युरोकप फुटबल २०२१ मा गर्नेगरी मिति सरेकाले आउँदो सिजन पनि त्यसअघि नै सकाउनुपर्नेछ। प्रिमियर लिग, ला लिगा, सिरि ए, लिग वान, बुण्डेसलिगा जस्ता लिगका क्लबहरु आर्थिक संकटमा पनि परिरहेका छन्।
प्रिमियर लिग
इंग्लिस प्रिमियर लिगमा यो सिजन लिभरपुल उपाधितर्फ अरु क्लबभन्दा दुई पाइला अघि बढिसकेको थियो। लिभरपुलले इतिहासमा सबैभन्दा छिटो उपाधि जितेर कीर्तिमान बनाउने आश गरिरहेका समर्थकहरु कोरोनाको त्रास बढ्दा निराश छन्।
हुन पनि ३० वर्षपछि लिग उपाधि जित्न लागेको लिभरपुल जति निराश यो समय अरु क्लब सायदै होला। प्रिमियर लिगमा लिभरपुल २९ खेलमा ८२ अंकसहित शीर्ष स्थानमा छ। दोस्रोमा रहेको म्यानचेस्टर सिटीको २८ खेलमा ५७ अंक छ। अप्रिल ३० सम्मका लागि खेल स्थगित भनिए पनि त्यसपछि पनि सुरु गर्न कठीन छ।
ला लिगा
स्पेनिस ला लिगामा बार्सिलोना र रियल मड्रिडबीच यो सिजन उपाधि भिडन्त रोचक हुने देखिएको थियो। तर कोरोनाका कारण खेल स्थगित भएसँगै त्यो रोमाञ्चकता पनि सकिएको छ।
२७ खेल सकिँदा ५८ अंकसहित बार्सिलोना शीर्ष स्थानमा थियो। दोस्रोमा रहेको रियल मड्रिडको ५६ अंक छ। अहिले स्थगित रहेको खेल कहिले हुने भन्ने यकिन छैन।
सिरी ए
युरोपमा कोराना भाइरसको सबैभन्दा ज्यादा त्रासदी इटालीमा नै देखिन्छ। जहाँ इटालियन सिरी ए मा पनि यो सिजन उपाधि होड प्रतिस्पर्धात्मक देखिन्छ। शीर्षमा रहेको युभेन्टस र दोस्रोमा रहेको लाजियोबीच एक अंकको मात्र फरक छ।
युभेन्टसको २६ खेलमा ६३ अंक छ भने लाजियोको २६ खेलमा नै ६२ अंक रहेको छ। एक खेल कम खेलेको इन्टर मिलान पनि २५ खेलमा ५४ अंकसहित नजिक नै देखिन्छ। सिरी ए अप्रिल ३ सम्म स्थगित भनिए पनि त्यसपछि पनि स्थगित हुने निश्चित छ।
बुन्डेस लिगा
जर्मन बुन्डेस लिगामा बायर्न म्युनिख लगातार आठौँ उपाधिका लागि बढिरहेको छ। शीर्षमा रहेको बायर्न म्युनिखको २५ खेलमा ५५ अंक छ। दोस्रोमा रहेको बोरुसिया डर्टमुन्डको २५ खेलमा ५१ अंक छ।
२८औँ चरणको खेलमा बोरुसिया डर्टमुन्ड र बायर्न म्युनिखबीच भेट हुँदा उपाधिमाथिको दाबेदारी अझ प्रस्ट हुनेछ। खेलहरु अप्रिल २ सम्म स्थगित गरिने सूचना आए पनि कोरोना संक्रमणको अवस्था बढ्दो रुपमा रहेकाले त्यो कठिन देखिन्छ।
लिग वान
फ्रेन्च लिग वानमा पेरिस सेन्ट जर्मेन (पिएसजी) लाई अरु क्लबले उछिन्ने छाँटकाँट देखिँदैन। पिएसजीको २७ खेलमा ६८ अंक भइसकेको छ। दोस्रोमा रहेको मार्सेलीको २८ खेलमा ५६ अंक रहेको छ। स्टार खेलाडीले भरिएको पिएसजीलाई उपाधि जित्न भने कहिलेसम्म पर्खनुपर्ने हो यकिन छैन।
युरोपमा धेरै हेरिने यी लिगबाहेक अरु लिगहरुको अवस्था उस्तै छ। नेदरल्याण्ड्स र पोर्चुगलमा हुने लिगमा पनि उपाधि भिडन्त रोचक बनिरहे पनि कोरोना भाइरस नै बाधक बनिरहेको छ। नेदरल्याण्ड्समा आयाक्स र अल्कामरको प्रतिस्पर्धा देखिन्छ भने पोर्चुगलमा पोर्टो र बेनफिकाबीच प्रतिस्पर्धा देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
