काठमाडौं- कोरोना भाइरस (कोभिड-१९) का कारण विश्व खेलकुद ठप्प छ। खेलाडी र प्रशिक्षकमा समेत कोरोना संक्रमण देखिएका छन्। ठूला प्रतियोगिताको मिति सारिएका छन्। यसले फुटबल जगतमा संकटका केही अवस्थाहरु देखिन्छन्।
फुटबल क्लबहरु अब के हुन्छ भन्ने प्रश्नको खोजिमा लागेका छन्। रोकिएका खेलहरु कहिले सुरु हुने भन्ने यकिन छैन। युरोपमा बढिरहेको कोरोना संक्रमणले खेल जगतमा संकट थप्दै लगेको छ।
महत्वपूर्ण लिग फुटबलहरु स्थगित छन्। अन्य गतिविधि ठप्प छन्। जसले गर्दा केही क्लबले खेलाडीको तलब घटाउने घोषणा गरिसकेका छन् भने आउँदो सिजन हुने ट्रान्सफरमा पनि असर पर्ने देखिएको छ।
कोरोना संक्रमणकै कारण युरोकप फुटबल सरेको छ, च्याम्पियन्स लिग, युरोपा लिगसँगै क्लब विश्वकप जस्ता ठूला प्रतियोगिताहरु सरेका छन्। खेल गतिविधि बन्द हुँदा क्लबको आयको माध्यम पनि कमजोर भएको छ। फुटबल जगतमा कल्पना गरिएभन्दा खराब स्थिति देखिएका छन्।
विश्व फुटबलको प्रशासकीय निकाय फिफाले क्लबहरुलाई समेत सहज हुनेगरी केही नियम ल्याउने तयारी पनि गरिरहेको छ।
.jpg)
टिमहरु वेडर बर्मेन, बोरुसिया मोन्चेग्लाबाच, लायोन र हर्टस् जस्ता क्लबले त केही खेलाडीलाई बिदा गर्ने र केही खेलाडीको तलब कम गर्ने गरी काम अगाडि बढाइसकेका छन्। विशेष त क्लबको आम्दानी पूरा बन्द भएको भन्दै ती क्लबले यस्तो कदम चाल्नुपरेको बताएका छन्।
फिफा अध्यक्ष जियानी इन्फान्टिनोले क्लबहरुलाई सहज वातावरण बनाइदिन काम गरिने बताएका छन्।
अहिले विशेष गरी युरोपियन लिग फुटबलमा केही संकटहरु देखिन्छन्,
लिग कसरी सकिन्छ?
रोकिएका लिगहरु कसरी सकाउने भन्ने विषयमा छलफलहरु देखिएका छन्। पहिलो त कोरोना भाइरसको संकट टरेपछि रोकिएको खेल सुरु गर्ने विषयमा छलफल केन्द्रित देखिन्छ। अर्को त अवस्था केही साम्य भएपछि बन्द रंगशालामा खेल गर्ने भन्ने विषयमा पनि कुराकानी भइरहेका छन्।
अब लिग यत्तिकै सकिने हो कि भन्नेमा पनि केही क्लबहरु लागिपरेका देखिन्छन्। तर यहि अवस्थामा लिग सकाउँदा विजेता बन्न सक्ने क्लबलाई भन्दा रेलिगेसनमा रहने क्लबलाई ठूलो संकट पर्ने हुँदा युइएफए त्यस्तो गर्ने अवस्थामा छैन। तर कोरोनाको यो संकट कति लम्बिन्छ भन्ने कुराले नै अगाडि के हुन्छ भन्ने कुराको निक्योल गर्नेछ।
विनाशको डर
क्लबहरुको कमाइको बाटो बन्द भएका छन्। खेल बन्द छन्, जसले क्लबहरुले टेलिभिजनमार्फत गर्ने विज्ञापन कमाइ पनि ठप्प छ। कमाइ र खर्चको अनुपात मिलाउने समस्यामा क्लबहरु देखिन्छन्।
यस्तो परिस्थिति साम्य भएपछि पनि क्लबहरु कसरी पुरानो अवस्थामा फर्कन्छन् भन्ने यकिन छैन। युरोपियन फुटबलको प्रशासकीय निकाय युइएफएको आर्थिक कारोबारसम्बन्धी नियमका कारण पनि नयाँ सिजनमा खेलाडी किन्न समस्या हुने देखिन्छ।
खेलाडीको भरमा
धेरै क्लबहरु आफ्ना खेलाडीले पाइरहेको तलब कम गर्न सम्झौता गरुन् भन्नेमा छन्। केही क्लबहरुले खेलाडीलाई रकम कम गर्ने विषयमा पनि कुराकानी गरिरहेका छन्।
प्रायले १० देखि २० प्रतिशत तलब कम गराउने गरी खेलाडीसँग सम्झौता गर्दै छन्। केही खेलाडीहरु आर्थिक सहयोग गर्न पनि तयार देखिन्छन्। विश्वमै ठूलो कमाइ गर्नेमध्येको स्पेनिस क्लब बार्सिलोनाले समेत खेलाडीको तलब कम गर्ने विषयमा कुराकानी गरेको छ।
नर्वेको राष्ट्रिय टिमका प्रशिक्षक लार्स लाजरब्याकले आफूले पाउँदै आएको तलबमा २० प्रतिशत कम गरिदिन क्बलसँग मञ्जुरी गरेका छन्। उनको निर्णयपछि नै सहायक प्रशिक्षक पर जोर हानसेन र महिला टिमका प्रशिक्षक मार्टिन सोजरेन पनि तलब कम गर्न राजी भएका छन्।
यस्तोमा स्वीट्जरल्याण्डको क्लब सिओनमा तलब कम गर्न नमान्ने खेलाडीहरुलाई क्लबले निश्कासन गर्ने बताएको छ। त्यसले बाँकी रहेका क्लबहरुमा पनि डर बढेको देखिन्छ।
.JPG)
जुन ३० मा सकिने सम्झौता
जुनसम्ममा सम्झौता सकिने खेलाडीहरु र लोनमा रहेका खेलाडीहरु पनि यसले समस्यामा परेका छन्।
धेरैले अहिले नै खेलहरु रोकिएकाले बाँकी रहेको समयसम्म सम्झौता सकाउन नहुने बताइरहेका छन् भने क्लबहरु नै आर्थिक संकटमा रहेकाले पनि सबै खेलाडीलाई अघि बढाउने मनस्थितिमा देखिँदैनन्।
ठूला ट्रान्सफरमा डर
कुनै पनि क्लबले नयाँ ट्रान्सफरको ग्यारेन्टी गर्न सक्ने अवस्था छैन। आय के हुने, लगानी कहाँबाट ल्याउने भन्ने हरेक क्लबलाई समस्या छ। यस्तो भयावह अवस्था अझै केही हप्ता बढ्ने हो भने त्यसबाट बाहिर निस्कन क्लबहरुलाई लामो समय लाग्नेछ।
अहिले सिजनका बाँकी खेल सकाउनेमा मात्रै धेरैको ध्यान गइरहे पनि त्यसपछि के हुने भन्नेमा बहस राम्ररी सुरु भएकै छैनन्।
अहिलेको अवस्थामा हेर्दा एक सय मिलियन युरोभन्दा बढी रकम पर्ने नौं खेलाडीहरु देखिएका छन्। जसमा नेमार, केलियन एमबाप्पे, फिलिप कोउटिन्हो, योआओ फेलिक्स, उसमान डेम्बेले, एन्टोनी ग्रिजम्यान, क्रिष्टियानो रोनाल्डो, पोउल पोग्बा र इडन हाजार्ड रहेका छन्।
खेलाडी किनबेचमा कम समय
यही अवस्था बढ्दै गएमा अर्को सिजनका लागि हुनुपर्ने खेलाडी किनबेचमा पनि धेरै समय क्लबहरुलाई मिल्ने छैन। नयाँ टिमको जोड मिलाउन संकट पर्दा त्यसको असर आउने सिजनमा पनि देखिनेछ।
समय कम हुने वित्तिकै धेरै खेलाडी किनबेचको सम्भावना पनि रहँदैन। किनभने २०२१ मा युरो कप गर्ने नयाँ तालिकाअनुसार २०२०-२१ को फुटबल सिजन पनि त्यसअघि नै सकाउनुपर्ने चुनौती रहन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
