फोटो : जीवन आचार्यको फेसबुकबाट
काठमाडौं- विश्वव्यापी रुपमा फैलिएको कोरोना भाइरसको जोखिम नेपालमा पनि बढ्दै गएको विश्लेषण हुन थालेपछि नेकपा शीर्ष नेताहरु सार्वजनिक कार्यक्रम र भेटघाट बन्द गरेर 'सेल्फ क्वारेनटाइन' मा बस्न थालेका छन्।
दैनिक जसो भेटघाट कार्यक्रम तथा सभा समारोह बैठकमा सहभागी हुने नेकपाका शीर्ष नेता घरमै बसेर कोरोनाको अपटेड लिनुका साथै पुस्तक अध्ययन गरेर समय बिताउन थालेका छन्।
उनीहरुले अत्यावश्यक भेटघाट र बैठक बाहेक अन्य कार्यक्रम कटौती गरिरहेका छन्।
नेकपा अध्यक्ष एवम प्रधानमन्त्री केपी शर्मा ओली, अर्का अध्यक्ष पुष्पकमल दाहाल 'प्रचण्ड', झलनाथ खनाल, माधवकुमार नेपाल, वामदेव गौतम, नारायणकाजी श्रेष्ठ, विष्णु पौडेल लगायत नेताहरु सार्वजनिक कार्यक्रम बन्द गरिसकेका छन्। उनीहरुले आफ्नो निवासमा समेत अतिआवश्क काम बाहेक अरु नेता कार्यकर्तालाई नभेट्ने सूचना जारी गरेका छन्।
कोरोनाले दैनिकी फेरियो
प्रधानमन्त्री केपी ओली, अध्यक्ष प्रचण्ड, माधव नेपाल, झलनाथ खनाल, वामदेव गौतम, नारायणकाजी श्रेष्ठ, विष्णु पौडेललाई भेट्न बिहानै नेता कार्यकर्ताको भिड हुन्थ्यो। तर अहिले कोरोनाको प्रभाव कारण नेताका निवासमा भेट्न आउनेको संख्या बिस्तारै पातलिँदै गएको छ।
प्रधानमन्त्री ओली पनि आफ्नै निवासबाट निर्देशन दिँदै आएका छन्। ‘प्रधानमन्त्री ज्यूको भर्खरै मिर्गौला प्रत्यारोपण भएकाले बाहिर कार्यक्रममा जाने कुरा भएन। त्यसैमा कारोनाको प्रभाव बढ्न थालेपछि प्रायः निवासमै हुनुहुन्छ’, प्रधानमन्त्रीका एक सल्लाहकारले भने, ‘कुनै विषयमा बैठक बस्नुपर्ने भएमा गर्नु हुन्छ। नभए, फोनबाटै निर्देशन दिनुहुन्छ।’
कोरोनाले भेटघाट र बैठकहरुमा समेत दैनिकी फेरिएको ती सल्लाहकारले बताए।
यस्तै, कारोनाकै कारण अर्का अध्यक्ष प्रचण्डको भेटघाट र दैनिकीमा समेत परिवर्तन आएको छ। नेता कार्यकर्ताको भेटघाट धेरै व्यस्त हुने प्रचण्डले बिहानको खाना १२/१ बजेतिर खाने गरे पनि अहिले बिहानै १० बजेतिर खाने गरेको प्रचण्डका एक सहयोगीले बताए।
‘बिहान सामान्यतया पाँच बजे उठिसक्नु हुन्छ। उठे लगत्तै झन्डै २ घण्टासम्म पसिना आउनेगरी टेबल टेनिस खेल्नु हुन्छ। त्यसपछि नुहाउनु हुन्छ’, ती सहयोगीले भने, ‘त्यसपछि कालो चिया खाँदै पत्रिका पढ्नु हुन्छ। अत्याआवश्यक भेट्नैपर्ने भए भेट्नु हुन्छ।’
बाहिर भेट्ने कार्यक्रम नहुँदा प्रचण्डले निवासमै मार्क्सवादी पुस्तक, राजनीतिक, साहित्यक र पार्टीका महत्त्वपूर्ण दस्तावेज अध्ययन गर्दै आएका छन्। अरुबेला राति ११/१२ बजे सुत्ने गरे पनि अहिले ९ बजे सुत्ने गरेका छन्।
यस्तै माधव नेपालले शनिबार उपत्यकाका तीन जिल्लाका सांसदहरु एक कार्यक्रममा सहभागी हुन मण्डिखाटार पुगेका थिए। कोरोना नियन्त्रणमा कसरी पहल लिन सकिन्छ भन्ने विषयमा छलफल भएकाले मात्रै सहभागी भएको माधव नेपालका स्वकीय सचिव मोहन गौतमले बताए।
‘अहिले उहाँ(नेपाल)ले अत्याआवश्यक र भेट्नैपर्ने पाहुना भए मात्रै भेट्नु हुन्छ। नभए बिहानै योगा गर्ने, नुहाउने तथा कालो चिया खाने गर्नु हुन्छ’, गौतमले भने, ‘पत्रिकामा छापिएका समाचार पढ्ने गर्नु हुन्छ।’
बिहानको खाना समेत नेपालले पहिलेभन्दा छिट्टै खाने गरेका छन्। अहिले बाहिर कार्यक्रममा सहभागी हुन नजाने भएपछि पत्रिका, म्याजेजिन, साहित्यक, राजनीतिक पुस्तक पढेर बस्ने गरेको गौतमले बताए।
यस्तै नेकपा वरिष्ठ नेता झलनाथ खनालले पनि कोरोनाकै कारण भेटघाट बन्द गरेका छन्। बिहानै ५ बजे उठ्ने खनाल करिब २ घण्टासम्म योगामा बिताउने गरेको स्वाकीय सचिव कृष्ण भट्टराईले बताए। बिहान भेटघाट नहुने भएपछि अनलाइनमा कोराना अपडेट लिनुका साथै फोनबाटै नेता कार्यकर्तालाई सजकता अपनाउन निर्देशन दिने गरेको उनले बताए। खनाल पनि दिउँसो सभा समारोहका कार्यक्रम नहुने हुँदा घरमै बसेर पुस्तक पढ्ने तथा अनलाइनबाटै अपडेट हुने गरेका छन्।
नेकपा प्रवक्ता नारायणकाजी श्रेष्ठले कोरोना भाइरसका कारण आफ्नो दैनिकी फेरिएको बताए। ‘यसअघि अत्यन्तै व्यस्तता हुन्थ्यो। नेता कार्यकर्तासँग भेटघाट औपचारिक तथा अनौपचारिक कार्यक्रममा सहभागी होइन्थ्यो’, श्रेष्ठले भने, ‘अहिले भेट्नैपर्ने भए व्यक्ति भए भेट्छु। नभए घरमै बसेर पुस्तक अध्ययन गर्छु।’
कोरोनाका सम्बन्धमा ओली, प्रचण्ड तथा ईश्वर पोखरेल नेतृत्वको समितिको नियमित सम्पर्कमा हुनुका साथै भेटघाट र छलफलमा सहभागी हुने गरेको श्रेष्ठले बताए।
श्रेष्ठले कोरोना नियन्त्रणमा आफ्ना पार्टीका नेता कार्यकर्तालाई फोनबाटै निर्देशन दिने गरेका छन्। छिमेकी देश भारतबाट कोरोना भित्रिन सक्ने भएकाले अस्थायी रुपमा बोर्डर बन्द गर्ने सम्बन्धमा छलफल भइरहेको श्रेष्ठले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
